അപരാജിതൻ -47 5203

അതിന്റെ തീവ്രത താങ്ങാനാകാതെ ഇരുവരും ഒരുമിച്ചു കണ്ണുകളടച്ചു.

അന്നേരം , കുതിരകുളമ്പടി ശബ്ദം ഉന്നതമായ ആവൃത്തിയിൽ പ്രതിധ്വനിച്ചു.

കുതിരപുറത്തു പാഞ്ഞു വരുന്ന കരുത്തുറ്റ യുവാവിനെ അവർ കണ്ടു.

അവന്റെ വലത്തെ കൈ നിവർത്തിപിടിച്ചിരിക്കുന്നു.

കൈപ്പത്തിക്കുള്ളിൽ ഉജ്ജ്വലമായി പ്രകാശിക്കുന്ന അതിവിശിഷ്ടമായ രത്നം,

ചിന്താമണി.

തത്ക്ഷണം

ആ ദൃശ്യം ഇല്ലാതെയായി പൂർണ്ണമായും ജലാശയം ശാന്തമായി.

“യോറി,,അത്ഭുതമാണല്ലോ,,അവലോകിതേശ്വര൯ ധാരണം ചെയ്യുന്ന മഹാശക്തിയുള്ള ചിന്താമണി വെറുമൊരു മനുഷ്യന് സ്വന്തമായി ഇരിക്കുന്നു എന്നല്ലേ ലാമോദേവി നമുക്ക് കാണിച്ചു തരുന്നത്,,ഇതൊന്നും എനിക്ക് മനസ്സിലാക്കാൻ സാധിക്കുന്നില്ലല്ലോ, ബോധിചിത്തനു മാത്രം സ്വന്തമായ ചിന്താമണി എങ്ങനെ ഈ യുവാവിന്റെ കൈകളിൽ”

നാബോ , ഉടനെ കൈകൾ കൂപ്പി.

ജോ രാമോ ജോ രാമോ രാമോ രാമോ -തുൻ ജോ

ഖലാരാഖ്ചെൻമോ അജ ദാജ തുൻ ജോ

രുലു രുലു ഹുങ്  ജോ ഹുങ്

മന്ത്രം ജപിച്ചു കൊണ്ട് പാൽഡൺ ലാമോ ദേവിയോട് അപേക്ഷിച്ചു.

“വിശുദ്ധധർമ്മപാലികേ,,,എന്റെയുള്ളിലെ ആശങ്കകൾക്ക് ഉത്തരമേകണേ,,വെറുമൊരു മനുഷ്യനായ ഇവനെങ്ങനെ അതിവിശിഷ്ടമായ ചിന്താമണി സ്വന്തമായി”

ആ ചോദ്യം തീരും മുൻപേ ജലാശയമാകെ ഇളകി.

അവിടെയെങ്ങും കൊടുംകാറ്റു വീശുവാനാരംഭിച്ചു.

അതിൽ നില തെറ്റിയപ്പോൾ നാബോ യോറിയെ മുറുകെപിടിച്ചു.

ജലാശയത്തിന്റെ നിറം മാറുവാൻ ആരംഭിച്ചു.

മെല്ലെ ജലാശയം പൂർണ്ണമായും സുവർണ്ണനിറത്തിലായി.

അതിൽ ചില പൗരാണിക രൂപങ്ങൾ തെളിഞ്ഞു വന്നു.

മഞ്ജുശ്രീയുടെ,

സമന്തഭദ്രന്റെ,

വജ്രപാണിയുടെ,

ഉഗ്രകോപത്തോടെ അമറുന്ന കാളയുടെ മുഖമുള്ള യമാന്തകവജ്രഭൈരവന്റെ,

ശിരസ്സിനു മുകളിൽ അടുക്കിവെച്ച

 പോലെ ശിരസുകളും ആയിരം കൈകളുമുള്ള

അവലോകിതേശ്വരന്റെ.,

ഏറ്റവും ഒടുവിലായി ചിന്തമണി കൈകളിൽ

ധാരണം ചെയ്ത യുവാവിന്റേയും.