അപരാജിതൻ -47 5203

നാബോ, തന്റെ ഭാണ്ഡത്തിൽ ഒരു മണി കൈയിലെടുത്ത് പിടിച്ചു, പാൽഡൺ ലാമോയുടെ മന്ത്രങ്ങൾ ജപിച്ചു.

ഓരോ വട്ടവും ഓരോ ദിക്കിലേക്ക് തിരിഞ്ഞു നിന്ന് പ്രത്യേക രീതിയിൽ മണിമുഴക്കി പാൽഡൺ ലാമോയുടെ മന്ത്രങ്ങൾ ജപിച്ചു കൊണ്ട് എട്ടുദിക്കുകളും പൂർണ്ണമാക്കി.

അദ്ദേഹം  യോറിയുടെ അടുത്തേക്ക് തിരിഞ്ഞു.

“യോറി,,,,”

“എന്താ പിതാമഹാ”

“നിനക്കറിയുമോ,,,മൂന്നാമത്തെ മാർഗ്ഗമായ ശംഗ്രിലയിലേക്കുള്ള പ്രവേശനം, ശംഗ്രിലയിലേക്കുള്ള താക്കോലിനെ നിയന്ത്രണവിധേയമാക്കാൻ വേണ്ടിയാണ് ബോധിസേനൻ ആ വജ്രകൾ നിർമ്മിച്ച്  വിശിഷ്ട ബോധത്തെ അതിനുള്ളിൽ പ്രാണപ്രതിഷ്ഠ ചെയ്തത്”

“ശംഗ്രിലയിലേക്കുള്ള താക്കോലോ?” അത്ഭുതത്തോടെ യോറി ചോദിച്ചു.

“അതെ,, പരമദിവ്യവും അഭീഷ്ടവരദായകമായ ഒരു വസ്തു”

“എന്താണത് പിതാമഹാ” അടക്കാനാകാത്ത ആകാംക്ഷയോടെ യോറി ചോദിച്ചു.

നാബോ ഒന്ന് ശ്വാസമെടുത്തു, കൈകൾ കൂപ്പി ഭക്തിയോടെ പറഞ്ഞു.

“ചിന്താമണി,, അതാണാ താക്കോൽ””

“ചിന്താമണിയോ?”

“അതെ യോറി ,,ചിന്താമണി,,സാക്ഷാൽ അവലോകിതേശ്വര൯ ധാരണം ചെയ്തിരിക്കുന്ന അതിവിശിഷ്ടമായ രത്‌നം

,

അതാണ് ചിന്താമണി,,അത് തന്നെയാണ് ശംഗ്രിലയിലേക്കുള്ള താക്കോലും,, അവലോകിതതന്ത്രത്തിനുള്ളിൽ ചിന്താമണി ഉപതന്ത്രം എന്നൊരു ഭാഗവും ബോധിസേനൻ എഴുതിയിട്ടുണ്ട്, അതിലാണ്  ചിന്താമണിയെ നിയന്ത്രണാധീനത്തിലാക്കുവാനുള്ള കർമ്മങ്ങൾ സ്പഷ്ടമാക്കിയിരിക്കുന്നത്”

യോറി അത്ഭുതത്തോടെ കണ്ണിമ ചിമ്മാതെ പിതാമഹനായ നാബോയെ സാകൂതം നോക്കിനിന്നു.

“വരൂ,,,സൂര്യൻ ഉദിക്കാൻ വളരെ കുറച്ചു സമയം മാത്രം,, കണ്ണുകളടച്ചു ലാമോ ദേവിയെ പ്രാർത്ഥിക്കുക, എന്റെ ദേഹത്ത് സപർശിച്ചു കൊണ്ട് ഈ മണിമുഴക്കി നമുക്ക് ഈ ദിവ്യമായ ജലാശയത്തിൽ നമുക്കുള്ള ചോദ്യങ്ങൾക്ക് ഉത്തരം തേടാം”

നാബോയെ അനുസരിച്ചു യോറി കണ്ണുകളടച്ചു പാൽഡൺ ലാമോ ദേവിയെ പ്രാർത്ഥിച്ചു മണിമുഴക്കി.

നാബോ, നെഞ്ചിൽ കൈ വെച്ച് പാൽഡൺ ലാമോ ദേവിയുടെ മന്ത്രജപം നടത്തി.