അപരാജിതൻ -47 5341

ഇതോടൊപ്പം ബൗദ്ധതാന്ത്രിക വിജ്ഞാനത്തിൽ ഉന്നതനായിരുന്ന അദ്ദേഹം തന്റെ കൈകളാൽ  പഞ്ചേന്ദ്രിയങ്ങളെയും പഞ്ചഭൂതങ്ങളെയും  പ്രതിനിധാനം ചെയ്തു അഞ്ചു ലോഹങ്ങളിൽ അഞ്ചു വജ്രയന്ത്രങ്ങൾ നിർമ്മിക്കുകയും താന്ത്രിക ഉപാസനകളാൽ അതിനുള്ളിൽ ബോധമായ അറിവിനെ പ്രാണപ്രതിഷ്ഠ നടത്തി പ്രതിഷ്ഠ ചെയ്തു.

അതിൽ മൂന്നു വജ്രകൾ, വജ്രയാന ബുദ്ധധർമ്മമാചരിക്കുന്ന മൂന്നു ദേശങ്ങളിലെ ബുദ്ധഭിക്ഷുക്കൾക്ക് രഹസ്യമായി സംരക്ഷിക്കാൻ നൽകി. മറ്റു രണ്ടു വജ്രകൾ അദ്ദേഹം തന്റെ ശിഷ്യന്മാർ വഴി അജ്ഞാതമായ ഇടങ്ങളിൽ ഭദ്രമാക്കി സൂക്ഷിച്ചു,

യോറി അത്ഭുതകഥകൾ കേൾക്കുന്ന കുട്ടിയുടെ ആകാംക്ഷയോടെ തന്റെ പിതാമഹൻ പറയുന്നത് കേട്ടിരുന്നു.

“പിതാമഹാ,,രഹസ്യമായത് എങ്ങനെ തടവിൽ കഴിയുന്ന യോഗേ൯ഷാ അറിഞ്ഞു?” യോറി സംശയം ചോദിച്ചു.

“ലോകത്തെ നശിപ്പിച്ചു പുതിയ ലോകക്രമം സൃഷ്ടിക്കാൻ വെമ്പിനടന്നിരുന്ന അയാൾക്ക് അറിവുകൾ നേടാൻ പലയിടത്തു നിന്നും മാർഗ്ഗങ്ങളുണ്ടായിരുന്നു, ബോധിസേനൻ എഴുതിസംരക്ഷിച്ച അപരാജിതസൂത്രയെ കുറിച്ചും അദ്ദേഹം നിർമ്മിച്ച് കൈമാറ്റം ചെയ്ത വിശിഷ്ഠ വജ്രകളെകുറിച്ചും അയാൾ അറിഞ്ഞു, അപരാജിതസൂത്ര രഹസ്യമായി പലരിലൂടെ കൈമറഞ്ഞു,

ഒടുവിൽ അത് ലഭിച്ചത് ഒരു ബുദ്ധഭിക്ഷുവിനായിരുന്നു,

അദ്ദേഹമത് ഓക്കിഗഹാര വനത്തിലെ അവലോകിത ക്ഷേത്രത്തിൽ സൂക്ഷിച്ചിരുന്നു.

എങ്ങനെയോ അത് യോഗേന്ഷാ അറിഞ്ഞു ,

പക്ഷെ അതെടുക്കാൻ സാധിച്ചില്ല, അന്ന് തന്നെ കൊലപാതക കുറ്റത്തിന് അയാൾ തടവിലാകുകയുണ്ടായി”

“പിതാമഹാ,,എനിക്ക് മനസിലായി, എന്നിൽ അമിതമായി വിശ്വസിച്ച യോഗേന്ഷാ ആ അറിവ് എനിക്ക് നൽകി,,വിഡ്ഢി”

ഉറക്കെ ചിരിച്ചു കൊണ്ട് യോറി പറഞ്ഞു.

അൽപ്പം കഴിഞ്ഞു

“പിതാമഹാ,,എന്താണ് ഈ ഗ്രന്ഥത്തിലുള്ളത്, ഞാൻ തുറന്നുനോക്കിയെങ്കിലും എനിക്ക് കൂടുതലായി ഗ്രഹിക്കാൻ സാധിച്ചില്ല”

നാബോ പുഞ്ചിരിച്ചു.

“അനാദിയായ ബോധമാണ് ഇതിന്റെ പൊരുൾ,

വിശിഷ്ടമായ ബോധത്തിലൂടെ ബോധിസത്വപദവിയിലേക്കും അമരത്വത്തിലേക്കും അജയ്യതയിലേക്കും അപരാജിതത്വത്തിലേക്കും നയിക്കുന്ന അറിവാണ് ബോധിസേനൻ അപരാജിതസൂത്രയിൽ എഴുതിവെച്ചിട്ടുള്ളത്”

അത് കേട്ട് യോറി ഏറെ ആകാംക്ഷയിലായി.

“എന്താണത് , എനിക്ക് പറഞ്ഞു തരൂ പിതാമഹാ, അതെല്ലാമല്ലേ എന്റെ സ്വപ്നങ്ങളും”

യോറി , നാബോയുടെ കാലുകളിൽ പിടിച്ചു യാചിച്ചു.