അപരാജിതന്‍ 27 [Harshan] 9784

“പൊന്നൂ …എന്താ ഇത് ,,,,,ഞാൻ വരാം ”

“വേണ്ടാ ,,,എനിക്കൊറ്റയ്ക്ക് പോകാനറിയാം ”

“അയ്യോ ,,സോറി സോറി ,,എന്‍റെ പൊന്നുംകുടമല്ലേ ,,, ” എന്നുപറഞ്ഞു കൊണ്ട് അവൻ ഏത്തമിടുന്ന പോലെ കാണിച്ചു

“വെരി സോറി ,,മൈ മിസ്റ്റേക്ക് ,,,” എന്നുപറഞ്ഞു ആ റോഡിൽ നിന്നുകൊണ്ട് ഏത്തമിടാൻ തുടങ്ങി.

ഒടുവിൽ പാവം തോന്നി അവൾ “മതി ” എന്നുപറഞ്ഞു കൊണ്ട് കാറിൽ കയറി.

ഇങ്ങനെയുള്ള ഡയലോഗുകൾ പറഞ്ഞാൽ ഏട്ടൻ ഓടി വരുമെന്നവൾക്കു നല്ലപോലെയറിയാം

“പൊന്നൂ ,,എന്ത് വേണമെങ്കിലും ഞാൻ ചെയ്തു തരാം ,,എവിടെ വേണമെങ്കിലും ഞാൻ കൊണ്ട്പോകാം ,,ഉള്ളു നോവിക്കുന്ന വാക്കുകളൊന്നും പറയരുത് ,,സഹിക്കാനാകില്ല ,,” വിഷമത്തോടെ ശ്യാം പറഞ്ഞു.

‘അത് ഏട്ടൻ നേരത്തെ മര്യാദയ്ക്ക് സംസാരിച്ചിരുന്നെങ്കിൽ ഞാൻ പറയില്ലായിരുന്നു ,, എനിക്ക് സങ്കടം വന്നപ്പോൾ പറഞ്ഞതാ ,,, ”

“അത് വിട് ,,,എവിടെയാ നിനക്ക് പോകേണ്ടത് ,,,?”

“ശിവശൈലത്ത് ”

“ശിവശൈലത്തോ ,,,അത് അടിമകളുടെ നാടല്ലേ ,, മുത്തശ്ശിയറിഞ്ഞാൽ ,,,” ഭയത്തോടെ ശ്യാം ചോദിച്ചു.

“ഏട്ടന് ഭയമുണ്ടോ ,,ആരുമറിയില്ല ,,നമുക്കവിടെ വരെയൊന്നു പോയി വരാം ,, ”

“ശരി ,,, “ ശ്യാം വേഗം മാലിനിയെ വിളിച്ചു , ഒന്ന് ചുറ്റികറങ്ങിയേച്ചും വരാമെന്നു പറഞ്ഞു കൊണ്ട് അവൻ കാറെടുത്തു.

പോകും വഴി

“ഏട്ടാ ,,, എനിക്കു കുറച്ചു സാധനങ്ങൾ വാങ്ങണം ”

“എന്ത് സാധനങ്ങൾ ?”

“കുറെ ചോക്കോളറ്റ്സ് ..”

“അതെന്തിനാ ?”

“അവിടത്തെ കുട്ടികൾക്ക് കൊടുക്കാനാ ,,”

“ഹമ് ,,” എന്ന് മൂളികൊണ്ടു ശ്യാം മുന്നിൽ കണ്ട ഒരു സൂപ്പർ മാർക്കറ്റിൽ വണ്ടി നിർത്തി

അവൾക്കു സാധനങ്ങൾ വാങ്ങാനുള്ള കാശ് അവൻ പേഴ്സിൽ നിന്നുമെടുത്തു കൊടുത്തു.

അവൾ പോയി ഒരു വലിയ കവറുനിറയെ ചോകൊലെറ്റും മധുരപലഹാരങ്ങളും വാങ്ങി കാറിലേക്ക് കയറി

അരമണിക്കൂർ കൊണ്ട് അവരിരുവരും ശിവശൈലത്ത് എത്തിചേർന്നു.

ഒരു കാർ വന്നു നിന്നത് കണ്ടു വൈദ്യർ മുത്തശ്ശൻ വേഗം പുറത്തേക്കിറങ്ങി.

സ്വാമി മുത്തശ്ശൻ അന്നേരം അവിടെയില്ലായിരുന്നു.

പുറകെ കസ്തൂരിയും ശംഭുവും എത്തി.

അവരെ കണ്ട് പാർവ്വതിയും ശ്യാമും അവർക്കു നേരെ നടന്നു.

എല്ലാവരും ആകെ അതിശയത്തിലായിരുന്നു.

ആരാണെന്നു മനസ്സിലാകുന്നില്ല.