അപരാജിതന്‍ 27 [Harshan] 9766

 

അന്ന് മുറാക്കബയില്‍

സൂഫി ദേവാലയത്തിനു ചുറ്റും പനിനീർപ്പൂക്കൾ കണ്ണിനു കുളിർമ്മയും സന്തോഷവും പകർന്നുകൊണ്ട് വിരിഞ്ഞു നിൽക്കുന്നു.ദേവാലയത്തിനു ഉള്ളിൽ പുകയുന്ന ചന്ദനമരകഷ്ണങ്ങളുടെയും ഊദിന്റെയും പരിമളം പാർത്ഥന പോലെ തന്നെ ദേവാലയത്തിനുള്ളിലും പുറത്തും പരിമളം നൽകികൊണ്ടിരുന്നു.

സൂഫിസത്തിനു സുഗന്ധവുമായി അഭേദ്യമായ ബന്ധമുണ്ട്.സുഗന്ധം മനസിനെ ഉണർത്തുന്നു , അത് പ്രാർത്ഥനയിലൂടെ ഈശ്വരനോട് സംവദിക്കുന്ന അവസ്ഥയെ കൂടുതൽ ത്വരിതപെടുത്തുന്നു.

രാവിലെ മുതൽ അമീറും ആലം ഉപ്പാപ്പയും മറ്റുള്ള സാധുക്കളും പ്രാർത്ഥനകളിൽ മുഴുകിയിരിക്കുകയായിരുന്നു.എല്ലാവരും മുട്ടുമടക്കി കണ്ണുകളടച്ചു തസ്ബീഹ് മണികൾ ഓരോന്നായി എണ്ണി ദിക്റുകൾ ജപിച്ചു കൊണ്ടിരിക്കുകയായിരുന്നു.

ആലം ഉപ്പാപ്പ മാത്രം ഒരു മൂലയിൽ കാലുകൾ നീട്ടി വെച്ച് നിലത്തിരുന്നാണ്

പ്രാർത്ഥിച്ചു കൊണ്ടിരുന്നത്.

പെട്ടെന്നായിരുന്നു

ആലം ഉപ്പാപ്പ ആകെ എന്തോ കണ്ട പോലെ ഭയന്ന് വിറക്കാൻ തുടങ്ങിയിരുന്നത്.

ദേവാലയത്തിനുള്ളിൽ തെളിയിച്ചു വെച്ചിരിക്കുന്ന ദീപങ്ങൾ കാറ്റിൽ ഉലയാൻ തുടങ്ങി.

അദ്ദേഹമാകെ വിറക്കുവാൻ തുടങ്ങിയിരുന്നു.

പ്രാർത്ഥന പൂർത്തിയാക്കാനാകാതെ അദ്ദേഹം തളർന്നു വീണു

അദ്ദേഹത്തിന്‍റെ കൈയിലെ തസ്‌ബീഹ് മാല നിലത്തേക്ക് പതിച്ചു.

ശബ്ദം കേട്ട് എല്ലാവരും വേഗം എഴുന്നേറ്റു ഉപ്പാപ്പയുടെ അടുത്തേക്ക് വന്നു.

എല്ലാം മറന്നു പ്രാർത്ഥനയിൽ മുഴുകിയിരുന്ന അമീറിനെ അവർ പോയി തൊട്ടുണർത്തി.

അമീർ തിരിഞ്ഞു നോക്കിയപ്പോൾ ഉപ്പാപ്പയെ മറ്റുള്ളവർ ദേഹം തടവുകയും വെള്ളം തളിച്ച് ഉണർത്താൻ ശ്രമിക്കുകയും ചെയ്യുന്നു.

“ഉപ്പാപ്പാ ” എന്ന് അലറി വിളിച്ചുകൊണ്ടു അമീർ എഴുന്നേറ്റ് ഉപ്പാപ്പയുടെ അരികിലെത്തി.

ഉപ്പാപ്പയെ വേഗം കൈയിൽ വാരിയെടുത്ത് കൊണ്ട് അമീർ പുറത്തേക്കോടി.

അമീറിന് പുറകിൽ മറ്റുള്ളവരും

ആരോ ഒരു ഓട്ടോ വിളിച്ചു വരുത്തി.

അപ്പോളേക്കും നാദിയായും ഓടി വന്നിരുന്നു

അമീറും നാദിയായും ഉപ്പാപ്പയെ ഓട്ടോയിൽ ചായ്ച്ചു കിടത്തി

ഓട്ടോ വേഗം ആ ഗ്രാമത്തിനു അപ്പുറത്തുള്ള സർക്കാർ പ്രാഥമിക ആരോഗ്യകേന്ദ്രത്തിലേക്ക് വേഗത്തിൽ കുതിച്ചു.

ഓട്ടോയിൽ ഇരുന്നുകൊണ്ട് അമീറും നാദിയായും പലവട്ടം അദ്ദേഹത്തിനെ കവിളിൽ തട്ടി ഉപ്പാപ്പ എന്ന് വിളിച്ചു കൊണ്ടിരുന്നു

മൂളുന്നതല്ലാതെ അദ്ദേഹം സ്വബോധത്തിലേക്ക് വന്നിരുന്നില്ല

ദേഹമാകെ വിയർക്കുകയായിരുന്നു അദ്ദേഹത്തിന്റെ.

എങ്കിലും അദ്ദേഹം എന്തോ പറയാൻ ശ്രമിക്കുകയായിരുന്നു

അമീർ അദ്ദേഹം അവ്യക്തമായി പറയുന്നത് എന്തെന്ന് കാതോർത്തു

” മുറാ ക്കബക്കു മേലെ ,, കരി നിഴൽ ,,,അപ ,,,കടം ,,,,,യാ അല്ലാഹ് ,,,,”

അമീറും നാദിയയും ആശങ്കയോടെ പരസ്പരം നോക്കി