അനാമികയുടെ കഥ ( climax ) [പ്രൊഫസർ ബ്രോ] 344

“ഇല്ല ഡോക്ടർ…”

“ശരി… ഞാൻ വരാം…”

“എന്നാൽ ഞാൻ റൂമിലേക്ക് പോട്ടെ ഏട്ടാ…”

ഗൗതം ക്യാഷ്‌വാലിറ്റിയിലേക്ക് പോകാൻ ഒരുങ്ങിയതും അനാമിക തിരിച്ചു റൂമിലേക്ക് നടക്കാൻ തുടങ്ങി

“വേണ്ട… നീയും വാ ഏട്ടന്റെ ഒപ്പം… കുറച്ചു സമയം ആ റൂമിൽ നിന്ന് ഒന്ന് മാറി നിൽക്കാം”

അനാമികയുടെ ഉത്തരം അനുകൂലം ആയിരിക്കില്ല എന്നറിയാവുന്നത് കൊണ്ട് അവളുടെ മറുപടിക്ക് കാക്കാതെ അവളുടെ കയ്യിൽ പിടിച്ചു കൊണ്ട് ഗൗതം നടന്നു

“ഏട്ടാ… അരുൺ…”

ആക്‌സിഡന്റ് പറ്റിക്കിടന്നിരുന്ന ചെറുപ്പക്കാരനെ കണ്ടതും അനാമിക ഗൗതമിന്റെ കയ്യിൽ ചുറ്റിപ്പിടിച്ചു. പക്ഷെ ആ സമയത്ത് ഗൗതമിന്റെ മുഖത്തുണ്ടായിരുന്ന പുഞ്ചിരി ആരും കണ്ടില്ല

⚪️⚪️⚪️⚪️⚪️

“ഏട്ടാ… ഇതെന്തെടുക്കുവാ… സമയം എന്തായി എന്നറിയോ… മുഹൂർത്തം ഏട്ടന് വേണ്ടി കാത്തു നിൽക്കില്ല…”

ഗൗതമിന്റെ റൂമിന്റെ വാതിലിൽ കൊട്ടിക്കൊണ്ട് അനാമിക അലറി വിളിച്ചു

“ദാ വരുന്നു പെണ്ണേ… ഒന്നടങ്ങ്, സമയം ഉണ്ടല്ലോ”

തല തുവർത്തിക്കൊണ്ട് വാതിൽ തുറന്നു വന്ന ഗൗതമിന്റെ രൂപം കണ്ടതും അനാമികയുടെ മുഖം ഒരു കപട ദേഷ്യത്താൽ മൂടി

“ആഹാ… ഇപ്പൊ കുളിക്കുന്നതെ ഉള്ളോ… ഇന്നാരുടെ കല്യാണമാ എന്ന് വല്ല ഓർമയും ഉണ്ടോ… ”

“എന്തായാലും നിനക്ക് കെട്ടാൻ പ്രായമായിട്ടില്ലല്ലോ… ”

“ദേ ഏട്ടാ… കളിക്കാൻ നിൽക്കല്ലെട്ടോ… സമയം പോകുന്നു വേഗം റെഡി ആക്, വീഡിയോ എടുക്കാൻ ആളുകൾ ഒക്കെ വന്നിട്ടുണ്ട്”

“ദേ ഒരഞ്ചു മിനിറ്റ് ഇപ്പൊ റെഡി ആകാം…”

“ആ… ഇല്ലെങ്കിൽ ഞാൻ ലക്ഷ്മിയമ്മയെ ഇങ്ങോട്ട് പറഞ്ഞ് വിടും..”

“അയ്യോ… വേണ്ടായേ… ഞാൻ വന്നോളാം”

അനാമിക തിരികെ പോയതും ഗൗതം റെഡി ആകാൻ തുടങ്ങി

“ഇനി ദക്ഷിണ വാങ്ങാനുള്ളവർക്ക് വാങ്ങാം”

വീഡിയോ ഗ്രാഫറിന്റെ തീരുമാനം വന്നപ്പോഴേക്കും ലക്ഷ്മിയും സീതയും അങ്ങോട്ട്‌ വന്നു. ആദ്യം ലക്ഷ്മിക്കും പിന്നെ സീതക്കും ഗൗതം ദക്ഷിണ കൊടുത്തു കാൽ തൊട്ട് വന്ദിച്ചു

“ഇനി ആരും ഇല്ലേ…”

“ഒരാൾ കൂടിയുണ്ട്…”

മടിച്ചു പിന്നിൽ മാറിനിന്ന രാഘവനെ അനാമികയാണ് നിർബന്ധിച്ചു മുന്നിലേക്ക് കൊണ്ട് വരുന്നത്

ഗൗതമിന്റെ മുഖത്തു നിന്നും അവൻ അത് ആഗ്രഹിച്ചിരുന്നില്ല എന്ന് വ്യക്തമായിരുന്നു , അവന്റെ ഉള്ളിൽ ലക്ഷ്മി എന്ത് കരുതും എന്ന ഭയം ആയിരുന്നു

ഗൗതം ഒരു ചോദ്യ ഭാവേന ലക്ഷ്മിയുടെ മുഖത്തേക്ക് നോക്കി, അത്ര സന്തോഷത്തോടെ അല്ലെങ്കിലും സമ്മതം എന്ന ഭാവത്തിൽ തല കുലുക്കി

വെറ്റിലയും അടക്കയും ഒറ്റനാണയവും വച്ച ദക്ഷിണ വാങ്ങുമ്പോൾ രാഘവന്റെ കൈകൾ വിറക്കുകയായിരുന്നു, കാലിൽ തൊട്ട് വന്ദിച്ചു അനുഗ്രഹം വാങ്ങാനായി കുനിഞ്ഞ ഗൗതമിന്റ തലയിൽ രണ്ടു തുള്ളികൾ ഇറ്റ് വീഴുന്നത് അവൻ അറിഞ്ഞു