ഒരു ബൈക്ക് യാത്രികൻ

Author :Sajith

പുകവലി ആരോഗ്യത്തിന് ഹാനികരം🚭

 ഇത് ഒരു യാത്രാ വിവരണമാണ് രണ്ട് സുഹൃത്തുക്കൾ  നടത്തുന്ന ഒരു യാത്രയുടെ വിവരണം. അവരിലൂടെ തന്നെയാണ് കഥ നീങ്ങുന്നത്. കഥാപാത്രങ്ങളെല്ലാം തന്നെ സാങ്കൽപ്പികം.

ഒരു ബൈക്ക് യാത്രികൻ

       എണ്ണമറ്റ സപ്ലികളോടെ കലാലയ ജീവിതം സമാപിച്ച സമയം. വീട്ടുകാരുടെ ചീത്തവിളികളും നാട്ടുകാരുടെ അർത്ഥം വെച്ചുള്ള അസ്ഥാനത്തെ പ്രയോഗങ്ങളും വകഞ്ഞു മാറ്റിക്കൊണ്ട് തിരക്കു പിടിച്ച ജനതയുടെ കരിമ്പിൻ കാട്ടിലേക്ക് ഞാനും കത്തിയെടുത്ത് കയറിയ നേരം. 

മൂന്നു വർഷത്തെ കലാലയം ജീവിതം തന്നത് പതിനാറ് സപ്ലിയും ഒരു അടിക്കേസും വെള്ളമടിയും ടീച്ചർമാരുടെ പ്രാക്കും പിന്നെ ചുരുക്കം സംഘ്യയിൽ അവസാനിക്കുന്ന എന്റെ സുഹൃത്തുക്കളും. ആർട്‌സ് കോളേജിൽ കലാലയ വർഷം അവസാനിച്ചാലും മൂന്നു വർഷം കൂടി പോയ പേപ്പറുകൾ എഴുതി എടുക്കാം അങ്ങനെയല്ലെ, ആണെന്നാണ് എൻ്റെ അറിവ്. ഞാൻ പറഞ്ഞതല്ല കേരളത്തിലെ ഒരു പ്രമുഖ യൂണിവേഴ്‌സിറ്റിയിൽ കാലികളെ വളർത്തുന്ന തൊഴുത്തു പാലകരുടെ വാദമാണ്. ഇനി മൂന്നു വർഷത്തിനുള്ളിൽ ഡിഗ്രി എടുത്തെ പറ്റു എന്നായപ്പോൾ ഞാനും ശപദം ചെയ്തു എടുക്കാം. എന്നാൽ ടെസ്റ്റിന്റെ തലേന്ന് മാത്രം ക്യൂട്ടിയും ഇൻഗം ടാക്‌സുമൊക്കെ തുറന്ന് നോക്കിയിരുന്ന എനിക്ക് അത് അത്ര എളുപ്പമായിരിക്കില്ലെന്ന് ഞാൻ മനസ്സിലാക്കാൻ ഒരു പാട് വൈകി പോയിരുന്നു. 

എന്റെ ഭാഗ്യം കൊണ്ടോ കാർണ്ണവൻമാര് ചെയ്ത പുണ്യംകൊണ്ടോ പോയ വിഷയമൊക്കെ ഒന്നോ രണ്ടോ മാർക്കിന് തോൽക്കാതെ കൈച്ചിലാക്കി. അതൊക്കെ മോഡറേറ്റ് ചെയ്ത് തന്നതാണെന്ന് മനസ്സിലാക്കാൻ പത്താംക്ലാസും ഗുസ്തിയും മാത്രം മതിയാവും. പിറ്റെ വർഷം സെപ്റ്റംബറിൽ തന്നെ കാലിത്തൊഴുത്ത് യൂണിവേഴ്‌സിറ്റി പുതിയൊരു ഗ്രേഡ് കാർഡ് പുറത്തിറക്കി. പതിനാറ് സപ്ലിയിൽ നിന്ന് മൂന്നെണ്ണത്തിലേക്ക് റിസൾട്ട് എത്തി. ഞാൻ അങ്ങനൊരു വിപ്ലവം സ്വപ്നേവി നിരീച്ചില്ല. എന്നാലും ഒരു പ്രശ്നം അവിടെ നിലനിന്നു ഗ്രേഡ് കാർഡ് വീട്ടിൽ സബ്മിറ്റ് ചെയ്താൽ വീട്ടിൽ നിന്നും എന്നെ അപ്ലോഡ് ചെയ്യും കാരണം എല്ലാം നാൽപതെ നാൽപതാണ്. ഒരു മാർക്ക് ഇങ്ങോട്ടിറങ്ങിയാൽ ഞാനും ഡിഗ്രിയും തവിട് പൊടി. എന്ത് ചെയ്യുംമെന്ന് ഒരു പിടിയും കിട്ടണില്ല.