ഒരു ബൈക്ക് യാത്രികൻ [Sajith] 1356

ഞങ്ങൾ മുപ്പൈനാട് എത്തുന്നതിന് മുൻപ് തന്നെ ഡീവിയേഷനെടുത്ത് അമ്പലവയൽ വഴി മീനങ്ങാടി എത്തി ചേർന്നിരുന്നു.  പിന്നെ റൂട്ട് വല്ല്യ പിടികിട്ടുന്നില്ല നാട്ട്കാരോട് ചോയിക്കുന്നതാണ് ഇങ്ങനെ ഉള്ള സമയങ്ങളിൽ ഉചിതം നല്ല നാട്ടാരാണെങ്കി പറഞ്ഞെരും പ്രകാശനെ പോലെ ഉള്ളോരാണങ്കി പണി കിട്ടും.  

അനിരുദ്ധൻ: ഏട്ടാ ഈ മാനന്തവാടിക്ക് എതിലേ പോവാ. 

അപരിചിതൻ: അത് ഇതിലെ മേലക്ക് പോയാൽ കണിയാമ്പാറ്റ പനമരം അങ്ങനെ മാനന്തവാടിക്ക് പൂവാം. നേരെ പോയാ കൽപ്പറ്റ എത്തും അവടെന്ന് യൂട്ടേൺ വയനാട് പിന്നെ പനമരത്ത്ന്ന് നേരെ വിട്ടോ.

അനിരുദ്ധൻ: ഓക്കെ ഏട്ടാ ശേരി എന്നാ.

അപരിചിതൻ: എങ്ങോട്ടാ.

അനിരുദ്ധൻ: ഞങ്ങൾ മാനന്തവാടിക്ക് പൂവാ.

അപരിചിതൻ: എന്താ കാര്യം.

അനിരുദ്ധൻ: ഒന്നുല്ലേട്ടാ വെറുതെ കറങ്ങാൻ.

അപരിചിതൻ: ന്നാലും.

അനിരുദ്ധൻ: ഒന്നുല്ലേട്ടാ കറങ്ങാൻ എറങ്ങിയതാ. ശരി എന്നാ സമയം ഇല്ല പോട്ടേ

അപരിചിതൻ: ശരി എന്നാ.

 

അയാൾക്കൊരു ഹൈ വോൾട്ടേജ് ചിരിയും കൊടുത്ത് എന്നോട് വണ്ടി എടുക്കാൻ പറഞ്ഞു. കൂടുതൽ ചുറ്റാൻ വയ്യാത്തോണ്ട് കൽപറ്റ വഴി പോവാൻ തന്നെ തീരുമാനിച്ചു. 

അനിരുദ്ധൻ: അതൊന്നും അല്ല.

ഞാൻ: പിന്നെ?

അനിരുദ്ധൻ: ഇതിലെ കൊറച്ച് ദൂരം പോവാന്ണ്ട്. അന്റെ ഭാക്കി കഥപറയ്.

ഞാൻ: എന്ത് കഥ.

അനിരുദ്ധൻ: മറ്റേ മിന്നൂന്റെ.

ഞാൻ: എന്തിന്? അനക്ക് കേക്കണ്ടന്നല്ലേ പറഞ്ഞെ.

അനിരുദ്ധൻ: ഇയ് പറയടാ ഒരാളേം കൂടി മൂഞ്ചിയ ലൗ സ്റ്റോറി കേക്കാൻ നല്ല രസാ. 

ഞാൻ: ശവത്തി കുത്തല്ലെ ഷാജിയേട്ടാ.

അനിരുദ്ധൻ: മ്മം… എന്ത് നാട്ടാരാണല്ലേ എന്തൊക്കെ അറിയണം സൈക്കോസിസിന്റെ ഏറ്റവും ഊച്ചാളി വേർഷൻ.

ഞാൻ: എന്തോന്ന്.

അനിരുദ്ധൻ: എടാ അയാള് എന്തൊക്കെ ചോയിച്ചെ. ഇതൊക്കെ അറിയണ്ട കാര്യം എന്താ അയാക്ക് ഓരോരോ നടരാജവിഗ്രഹങ്ങള്. 

ഞാൻ: ഇതിപ്പൊ ആദ്യായിട്ടൊന്നും അല്ലല്ലോ. 

അനിരുദ്ധൻ: മ്മം… ഞാൻ UK ക്ക് പോവാ ഇവടെ കംപ്ലീറ്റ് അസഹിഷ്ണുതയാ.

ഞാൻ: എന്താന്ന്?

അനിരുദ്ധൻ: ഒന്നുല്ലോ ഇയ് വണ്ടി ഇട്ക്ക്, ഭാക്കി കഥ പറയ്.

ഞാൻ: ആയി.

 

വയനാടിന്റെ വന്യ സൗന്ദര്യം മാറി കൽപ്പറ്റയ്ക്കുള്ള വഴികളൊക്കെ അത്യാവശ്യം വികസനം പ്രാപിച്ചിട്ടുണ്ട്. എന്നാലും തണുപ്പ് പഴേ പോലെ തന്നെ. വണ്ടി എഴുപതിൽ കുതിച്ചു, തണുത്ത കാറ്റ് മുഖത്തടിച്ച് മാസ്ക് പാറികളിക്കുന്നുണ്ട്. സ്റ്റേറ്റ് ഹൈവേയിലെ വീതിയെറിയ റോഡിലൂടെ.