അപരാജിതൻ -47 5203

“അംഗഭൈരവാ,,ഈ ശാപം നിനക്ക് അനുഭവിക്കേണ്ടതായി തന്നെ വരും ,,അത് പൂർണ്ണമായും ഇല്ലാതെയാക്കുവാൻ നമുക്ക് കഴിവില്ല, ജീവിതകാലം മുഴുവൻ നീ നമുക്ക് അടിമയായി ഇരിക്കാമെന്നു സമർപ്പണം നല്കിയിട്ടുള്ളവനാണ്,,ആയതിനാൽ ഈ ശാപത്തിൽ  നിന്നും രക്ഷപ്രാപിക്കാനുള്ള മാർഗ്ഗം ഞാൻ നൽകാം,,,

ഇതിൽ നിന്നും നിന്നെ മോചിപ്പിക്കണമെങ്കിൽ അതിനുതകുന്ന ശക്തി നമുക്കുണ്ടാകണം,,

ഇപ്പോൾ നമുക്കതില്ല,,

അതിനായി ആര്യതാരയുടെ തേജസ് നമ്മിലേക്ക് നീ നൽകണം,”

“എന്താണ് ഞാനതിനു വേണ്ടി ചെയ്യേണ്ടത്, തേജസ് എടുക്കാൻ പോയതിന്റെ ശിക്ഷയല്ലേ ഞാനീ അനുഭവിക്കുന്നത്” വിഷമത്തോടെ അംഗഭൈരവൻ ചോദിച്ചു.

“അംഗഭൈരവാ,,കേൾക്കുക,,,ആര്യതാര, ഇച്ഛിക്കുകയാണെങ്കിൽ ഓരോ ആയിരം സംവത്സരം കൂടുമ്പോളും  ഈ മണ്ണിലെ യാതനകൾ അനുഭവിച്ചറിയുവാൻ വേണ്ടി സവിശേഷമായ മാനവ നാരിജന്മം ഉണ്ടാകും..

ആ നാരിജന്മം ആര്യതാരയുടെ അവതാരമോ പുനർജന്മമോ അല്ല,

പക്ഷെ ആര്യതാരയുടെ ആത്മാംശമാകും ആ പിറവികൊള്ളുന്ന പെൺകൊടി, അവൾ ആര്യതാരയുടെ ഗുണങ്ങളുടെ മാനവ രൂപമായിരിക്കും, ജന്മത്തിലും വളർച്ചയിലും അവൾക്ക് ആര്യതാരയുമായി ബന്ധമുണ്ടാകില്ല, അവൾ മറ്റു വിശ്വാസപ്രമാണങ്ങൾ അനുസരിച്ച് ജീവിക്കുന്നവളുമാകാം,ആര്യതാരയുടെ ഗുണവും ആത്മാംശവും ആ സവിശേഷജന്മത്തിനുണ്ടാകുമെന്നതിനാൽ  മഹിമയാർന്ന ദേവപദവി പോലും മനുഷ്യർ കൽപ്പിച്ചു നൽകിയേക്കാം , അത്രയും ഉത്തമമായ ജന്മങ്ങളാകും അവർ,,അങ്ങനെ ആരെങ്കിലും പിറവി എടുത്താൽ നാം നിന്നെ അത് മനസ്സിൽ തോന്നിപ്പിക്കും,,പക്ഷെ നീ അത് ആരെന്നു തേടി കണ്ടുപിടിക്കണം, കണ്ടു പിടിച്ചാൽ ആ പെൺജന്മത്തിലൂടെ ആര്യതാരയുടെ തേജസ്സ് കരസ്ഥമാക്കി എന്നിലേക്ക് സമർപ്പിച്ച് അവളെ നീയെനിക്ക് ബലി നൽകിയാൽ,,അതെ നിമിഷം നിന്റെ ശിരസിൽ ഏറിയ ഈ ശാപം ഞാൻ പൂർണ്ണമായും ഇല്ലാതെയാക്കാം”

@@@@@