അപരാജിതൻ -47 5203

“അഞ്ചു ബോധിസത്വന്മാരിൽ ആരുടെയെങ്കിലും അവതാരമായി നീ വേദനയും യാതനയും നിറഞ്ഞ ഈ ലോകത്തിൽ ജനിക്കണം”

യോറി സംശയത്തോടെ നാബോയെ നോക്കി.

“അതിനു ഞാൻ മരിക്കണ്ടേ,,മരിച്ചാലൂം അങ്ങനെയൊരു പുനർജന്മം എനിക്ക് സാധിക്കുമോ പിതാമഹാ”

“ഇല്ലാ,, സാധിക്കില്ല,,ഒരു സാധാരണ മനുഷ്യനും അത് സാധിക്കില്ല മകനെ,, പിന്നെയുള്ളത് മറ്റു താന്ത്രികഉപാസനാക്രിയാമാർഗ്ഗങ്ങളിലൂടെ അപരാജിതത്വം നേടണം,  ”

ആശ്ചര്യത്തോടെ ഒന്നും മനസ്സിലാകാതെ യോറി , നാബോ പറയുന്നത് കേട്ടിരുന്നു.

ഈ അഞ്ചു ബോധിസത്വ൯മാരുടെ അവതാരമായി ജനിക്കാൻ സാധിച്ചില്ലെങ്കിലും, അപരാജിതസൂത്രയിൽ എഴുതിയിട്ടുള്ള അതികഠിനമായ തന്ത്രോപാസനക്രിയകളിലൂടെ ഈ ബോധിസത്വൻമാരിൽ ആരുടെയെങ്കിലും വിശിഷ്ടമായ ഗുണം ആർജ്ജിക്കണം”

നാബോ പറഞ്ഞുനിർത്തി.

“പിതാമഹാ,,എനിക്ക് താങ്കൾ പറയുന്നത് വ്യക്തമാകുന്നില്ല”

“യോറി,,ഞാൻ വ്യക്തമാക്കി നൽകാം,,

ശ്രദ്ധിക്കൂ,,ഈ അപരാജിതസത്വന്മാർക്ക് വിശേഷഗുണങ്ങളുണ്ട്,

മഞ്ജുശ്രീയുടെ ഗുണം ജ്ഞാനമാണ്, വജ്രപാണിയുടെ ഗുണം ശക്തിയും, സമന്തഭദ്രന്റെ ഗുണം ആത്മീയമായ ധ്യാനാവസ്ഥയും  യമാന്തക വജ്രഭൈരവന്റെ ഗുണം ഉഗ്രകോപമാർന്ന സംഹാരശക്തിയും, അവലോകിതേശ്വരന്റെ ഗുണം അനുകമ്പയുമാണ്. ഇതിലേതെങ്കിലും ഗുണം അതെയളവിൽ നീ ഉഗ്രസാധനകളിലൂടെ ആ ഗുണനാഥനായ ബോധിചിത്തനെ പ്രീതിപ്പെടുത്തി നേടിയെടുക്കണം”

അത് കേട്ടപ്പോൾ യോറിയുടെ മുഖം പ്രസന്നമായി.

“എനിക്ക് പറഞ്ഞു തരൂ പിതാമഹാ,,അതിനായി എന്ത് തന്ത്രസാധനയാണ് ഞാൻ അനുഷ്ഠിക്കേണ്ടത്?”

നാബോ അത് കേട്ട് പുഞ്ചിരിച്ചു.

“അതിനായി ഒരുപാട് വർഷം നീ തന്ത്രഉപാസന ചെയ്യണം യോറി,,സമന്തഭദ്രസാധനയ്ക്ക്  പതിനെട്ടുവർഷങ്ങൾ , വജ്രപാണി സാധനയ്ക്ക് ഇരുപത്തിഏഴു വർഷങ്ങൾ , മഞ്ജുശ്രീ സാധനയ്ക്ക് നാൽപ്പത്തിഒന്ന് വർഷങ്ങൾ, യമാന്തക വജ്രഭൈരവ സാധനയ്ക്ക് .അറുപതു വർഷങ്ങൾ, അവലോകിതേശ്വര സാധനയ്ക്ക്  എഴുപത്തി രണ്ട് വർഷങ്ങൾ,,അത്രയും നിനക്ക് സാധിക്കുമോ?”

നാബോയുടെ ചോദ്യം കേട്ട് സ്തബ്ധനായി യോറി ഉത്ക്കണ്ഠയോടെ അപരാജിതസൂത്രയിലേക്ക് ദൃഷ്ടിപായിച്ചു.

“അസാധ്യമായതാണല്ലോ പിതാമഹാ ഈ പറയുന്നതെല്ലാം,,എന്റെ ഈ സ്വപ്നങ്ങൾ എല്ലാം വ്യർത്ഥമാകുമോ?”

നാബോ , ആ ചോദ്യം കേട്ട് മന്ദഹസിച്ചു.