അപരാജിതൻ -47 5341

“യോറി,,ഈ വൃദ്ധന്റെ പക്കലുള്ള എല്ലാ അറിവും നിനക്ക് വേണ്ടിയുള്ളതാണ് മോനേ” വാത്സല്യത്തോടെ നാബോ. യോറിയുടെ ശിരസിൽ തലോടി.

“ഞാൻ മുന്നേ പറഞ്ഞുവല്ലോ , അപരാജിതത്വത്തിലേക്കുള്ള തന്ത്രമാർഗ്ഗമാണ് അപരാജിതസൂത്രയിൽ ബോധിസേനൻ എഴുതിയത്, നിനക്കറിയാമല്ലോ ബുദ്ധനും ബോധിസത്വനും (/ബോധിചിത്തൻ) തമ്മിലുള്ള വ്യത്യാസം, സംസാരദുഖങ്ങളിൽ നിന്നുമെല്ലാം മോചനം നേടി അതിവിശിഷ്ടമായ മഹാബോധം നേടി ശൂന്യതയെ പ്രാപ്തമാകുന്ന അവസ്ഥയാണ് ബുദ്ധത്വം, അങ്ങനെ ഒരു തലത്തിലേക്ക് അർഹതനേടിയിട്ടും ബുദ്ധത്വം സ്വീകരിക്കാതെ  ഈ ലോകത്തുള്ള സകലരെയും ബുദ്ധത്വത്തിലേക്ക് നയിച്ചതിന് ശേഷം മാത്രം ബുദ്ധപദവി സ്വീകരിക്കാൻ തയ്യാറായ വിശിഷ്ടബോധം നേടിയ അവതാരങ്ങളാണ് ഓരോ ബോധിചിത്തന്മാരും.

ബോധിസേന൯ തന്റെ അപരാജിതസൂത്രത്തിൽ വെളിപ്പെടുത്തുന്നത് അഞ്ചുപേരാണ് അപരാജിതന്മാർ, ബോധിചിത്തന്മാരായ പഞ്ചാപാരാജിതൻമാർ,

ജ്ഞാനത്തിന്റെ സ്വരൂപമായ മഞ്ജുശ്രീ.

ബലത്തിന്റെ സ്വരൂപമായ വജ്രപാണി.

കനിവിന്റെ (അനുകമ്പയുടെ) മൂർത്തരൂപമായ അവലോകിതേശ്വര൯.

ക്രിയകളുടെയും ധ്യാനത്തിന്റെയും സ്വരൂപമായ സമന്തഭദ്രൻ.

ഈ നാലു പേരെ കൂടാതെ  മഞ്ജുശ്രീയുടെ തന്നെ മറ്റൊരു സ്വരുപമായ,  ഉഗ്രകോപവും സർവ്വനാശകസംഹാരബലവുമൊത്ത മഹാകാലനായ യമാന്തക വജ്രഭൈരവൻ

ഈ അഞ്ചുപേരുമാണ് അപരാജിതന്മാർ

അപരാജിതസൂത്രത്തിൽ അഞ്ചു തന്ത്രങ്ങളായി തിരിച്ച് അതായതു മഞ്ജുശ്രീ തന്ത്ര, വജ്രപാണി തന്ത്ര, അവലോകിത തന്ത്ര, സമന്തഭദ്ര തന്ത്ര, വജ്രഭൈരവ തന്ത്ര, കഠിനമായ  താന്ത്രിക ഉപാസനാ ക്രിയകളും വിധികളുമാണ്  എഴുതിയിട്ടുള്ളത്”

“പിതാമഹാ,,അങ്ങ് പറഞ്ഞതെല്ലാം എനിയ്ക്ക് മനസ്സിലായി, പക്ഷെ യോഗേന്ഷാ ആഗ്രഹിച്ച പോലെ , അതിനുമപ്പുറമായി ഞാൻ ആഗ്രഹിക്കുന്ന  അപരാജിതത്വത്തെ എനിക്കെങ്ങനെ നേടാം എന്ന് വ്യക്തമാക്കിത്തരൂ ”

“യോറി,,, ആദ്യത്തെ വഴി”

നാബോ ഒന്ന് നിർത്തി മുരടനക്കി ചുമച്ചു.