അപരാജിതന്‍ 27 [Harshan] 9784

ആദി അവളെ പലപ്പോഴും ചുന്ദരി എന്നാണു വിളിക്കുന്നത്

“മാമനോ ,,അതാരാ ,,,,,” പാർവതി ചോദിച്ചു

“വാവേടെ മാമനാ ,,,പാവം മാമന്‍ ” അവൾ ചിരിച്ചു കൊണ്ട് പറഞ്ഞു

“ആണോടി ,,ചുന്ദരി,,എന്നാ ഈ ആന്‍റിയും ചുന്ദരി എന്നെ വിളിക്കൂട്ടോ ” എന്നുപറഞ്ഞുകൊണ്ടു അവൾക്കു ആ കവർ അപ്പാടെ സമ്മാനിച്ചു

“ഇതെന്താ ,,?,” അവൾ കൊഞ്ചലോടെ ചോദിച്ചു

” ഇത് മൊത്തം ഈ ചുന്ദരിക്കുള്ള പലഹരങ്ങളാ ,,,”

“വാവെടെ കൂട്ടാര്‍ക്ക് കൊടുത്തോട്ടെ ”

” പിന്നെന്താ ,,അപ്പൊ നല്ല കുട്ടിയാണല്ലോ ,,,,” എന്നുപറഞ്ഞു കൊണ്ട് പാർവതി അവളുടെ കവിളിൽ അമർത്തി ചുംബിച്ചു

“മാമനും വാവേ ഇങ്ങനെയാ മുത്തുന്നെ .” അവൾ പറഞ്ഞു

അതുകേട്ടു പാർവ്വതിയൊന്നു ചിരിച്ചു

ചായയൊക്കെ കുടിച്ചു കഴിഞ്ഞു അവർ ഇറങ്ങാനുള്ള തയ്യാറെടുപ്പായി.

ഗൗരി അപ്പോളേക്കും പാർവ്വതിയുമായി ഒരുപാട് അടുത്തിരുന്നു.

“വാവ ആന്‍റിയെ മുത്തിക്കോട്ടെ ?’ അവൾ നിഷ്കളങ്കമായി ചോദിച്ചു

പാർവ്വതി അവളുടെ അരികിലേക്ക് കവിൾ കാണിച്ചു

അവൾ കെട്ടിപിടിച്ചു പാർവതിക്ക് മുത്തം കൊടുത്തു

പാർവതി അവളെ എടുത്തു ഒക്കത്തിരുത്തി.

കസ്തൂരിക്ക് അതുകണ്ടു ഏറെ സന്തോഷമായി

തുളുമ്പുന്ന കണ്ണുകൾ ചേലത്തലപ്പ് കൊണ്ട് ഒപ്പി.

അവർ പുറത്തേക്കിറങ്ങി

“ആന്‍റി പോവാണോ ?” ഗൗരി ചോദിച്ചു

“പോവണ്ടേ ,,, ?” പാർവതി അവളോട് തിരിച്ചു ചോദിച്ചു

“വേണ്ട ,,,”

“അപ്പോ ആന്‍റി എവിടെ കിടക്കും ,,?”

“അവിടെ കിടന്നോ ” എന്നുപറഞ്ഞുകൊണ്ടു അവൾ ആദിയുടെ മൺവീട് ചൂണ്ടി കാട്ടി

“ആ വീട്ടിലോ ?”

“ഹമ് …വാവെടെ മാമന്‍റെ വീടാ ,,,,”

“അതിനു മാമൻ സമ്മതിക്കോ ….?” ചിരിയോടെ പാര്‍വ്വതി ചോദിച്ചു

“ഈ ആന്‍റിക്കു ഒന്നും അറീല്ലല്ലോ ,, വാവെടെ മാമൻ ഇപ്പോ അവിടെയില്ല ,, ജീപ്പും കൊണ്ട് പോയേക്കുവാ ,,,”

“അപ്പൊ മാമൻ വന്നാലോ ,, ?”

“അപ്പോ ആന്‍റി മാമനോടൊപ്പം താമസിച്ചോ ,,മാമൻ പാവാ ഇഷ്ടമുള്ളതൊക്കെ വാങ്ങി തരും ,,കെട്ടിപ്പിടിക്കും .. കുറെ മുത്തം തരും ,,,, ” എന്നു പറഞ്ഞു കൊണ്ട് വേഗമവൾ പാർവതിയുടെ കവിളിൽ കുറെ മുത്തം കൊടുത്തു

“മോളെ ,,എന്തൊക്കെയാ ഈ പറയുന്നത് ” എന്നു പറഞ്ഞു കൊണ്ട് കസ്തൂരി വേഗമവളെ വാങ്ങി ഒക്കത്തിരുത്തി