അനാമികയുടെ കഥ ( climax ) [പ്രൊഫസർ ബ്രോ] 344

അച്ചു തന്റെ പിന്നിൽ നിന്നും പിറുപിറുത്തു കൊണ്ട് വരുന്നത് അനാമിക കേട്ടെങ്കിലും അവൾ അതിന് പ്രതികരിച്ചില്ല

അച്ചു നടന്ന് എത്തുമ്പോഴേക്കും അനാമിക വണ്ടി സ്റ്റാർട്ട്‌ ആക്കി നിർത്തിയിരുന്നു. അച്ചു പിന്നിൽ കയറി ഇരുന്നതും അനാമിക വണ്ടി മുന്നോട്ട് എടുത്തു

നീങ്ങിത്തുടങ്ങിയ അനാമികയുടെ വണ്ടിയുടെ മുന്നിലായി പൊടി പറത്തിക്കൊണ്ട് ഒരു പൾസർ 200ns വന്ന്‌ ചവിട്ടി നിർത്തി

ആ വണ്ടിയെ ഇടിക്കാതിരിക്കാനും അവർ വീഴാതിരിക്കാനുമായി അനാമികക്ക് നന്നേ ബുദ്ധിമുട്ടേണ്ടി വന്നു . അനാമികയുടെ ഹൃദയ സ്പന്ദനം വേഗത്തിൽ ആയി

അപ്പോഴും പൾസറിൽ വന്ന ആളുടെ വലത് കൈ മുന്നോട്ടും പിന്നോട്ടും ചലിച്ചുകൊണ്ടിരുന്നു

അനാമികയുടെ ഡാഷ്ബോർഡിൽ തലവെച്ചുള്ള ഇരുത്തം കണ്ട് ഭയന്ന അച്ചു വണ്ടിയിൽ നിന്നും ഇറങ്ങി. മുന്നോട്ട് നടക്കുന്നതിനൊപ്പം അവൾ ആ വണ്ടിയിൽ വന്ന ആളെ രൂക്ഷമായി നോക്കുകയും ചെയ്തു

“അനൂ… എന്താടാ… നീ എന്നെ ഒന്ന് നോക്ക്”

അച്ചു അനാമികയുടെ മുഖം തന്റെ കയ്യാൽ പതിയെ ഉയർത്തി. അവൾ നന്നായി ഭയന്നിരുന്നു എന്ന് ആ കണ്ണുകൾ കണ്ടാൽ മനസ്സിലാകുമായിരുന്നു

“തനിക്കെന്താടോ കണ്ണില്ലേ…”

അച്ചു അനാമികയുടെ അവസ്ഥയിലും തന്റെ വണ്ടിയിൽ നിന്നും ഇറങ്ങാതെ ഇരിക്കുന്ന ആളെ നോക്കി കയർത്തു. ഹെൽമെറ്റ്‌ വച്ചിരിക്കുന്ന അയാളുടെ മുഖം വ്യക്തമായിരുന്നില്ല

ആക്‌സിലേറ്ററിൽ നിന്നും കൈ എടുത്ത അയാൾ ചാവി തിരിച്ചു വണ്ടി ഓഫ് ആക്കി. വലതു കയ്യാൽ തന്റെ ഹെൽമെറ്റ്‌ തലയിൽ നിന്നും പതിയെ ഊരിമാറ്റി

“അരുൺ…”

അനാമികയുടെ ശബ്ദം പതിഞ്ഞതായിരുന്നു എങ്കിലും അവളുടെ അടുത്തു നിന്ന അച്ചു അത് വ്യക്തമായി കേട്ടു .അനാമിക പറഞ്ഞ കഥകളിൽ നിന്നും അവൾ കാണിച്ചു തന്നിട്ടുള്ള ഫോട്ടോയിൽ നിന്നും മാത്രം പരിചയമുള്ള അരുണിന്റെ മുഖം അച്ചു ആദ്യമായി കാണുകയായിരുന്നു

“അപ്പൊ നിനക്കെന്റെ മുഖം ഓർമയുണ്ട്… അല്ല അങ്ങനെ മറക്കാൻ പറ്റുന്ന ഒരു ബന്ധം ആയിരുന്നില്ലല്ലോ നമ്മൾ തമ്മിൽ”

അവന്റെ വാക്കുകളിൽ ഒരു പുച്ഛം നിഴലിച്ചിരുന്നു

അവൻ  സംസാരിച്ചു തുടങ്ങിയപ്പോളാണ് അനാമിക പറഞ്ഞത് അവനും കേട്ടു എന്നവർക്ക് മനസ്സിലായത്.

“നീ പറഞ്ഞത് ശരിയാണ് അരുൺ… അങ്ങനെ മറക്കാൻ പറ്റുന്നതൊന്നും അല്ലല്ലോ നീ എന്നോട് ചെയ്തിട്ടുള്ളത്”

എപ്പോഴും ചിരിച്ചു കളിച്ചു മാത്രം കണ്ടിട്ടുള്ള അനാമികയുടെ ആ ഉറച്ച ശബ്ദം അച്ചുവിനെ അതിശയിപ്പിച്ചു

“നീയോ… അങ്ങനെ ആയിരുന്നില്ലല്ലോ നീ എന്നെ വിളിച്ചിരുന്നത്… ഓ ഇപ്പൊ നിന്നെ രക്ഷിക്കാൻ നിന്റെ പുതിയ ചേട്ടൻ ഉള്ളതിന്റെ അഹങ്കാരം ആയിരിക്കും…”

“ആണെന്ന് തന്നെ വച്ചോ… ബന്ധങ്ങളുടെ വില അറിയാത്ത നിനക്കൊന്നും ആ സ്നേഹം തരുന്ന വിശ്വാസം ഒരിക്കലും മനസ്സിലാകില്ല”

അനാമികയും വിട്ടുകൊടുക്കാൻ ഒരുക്കമായിരുന്നില്ല