അനാമികയുടെ കഥ ( climax ) [പ്രൊഫസർ ബ്രോ] 344

അച്ചു പതിയെ അവന്റെ തലയിൽ തട്ടിക്കൊടുത്തു

“അച്ചൂ… താൻ ഇവിടെ ഇരിക്ക്… എനിക്ക് തന്നോട് കുറച്ചു സംസാരിക്കാൻ ഉണ്ട്”

അത്രയും സമയം ചിരിച്ചുകൊണ്ട് സംസാരിച്ച ഗൗതമിന്റെ ശബ്ദത്തിൽ പെട്ടന്നാണ് മാറ്റം ഉണ്ടായത്. അത് മനസ്സിലായതും അച്ചു അവൻ ഇരിക്കുന്നതിനടുത്തായി ഇരുന്നു

“എന്താ ഏട്ടാ…”

“എടൊ… താൻ പലവട്ടം ചോദിച്ചിട്ടുള്ള കാര്യമാണ്… ഞാൻ ഇത്രയും നാൾ ഒഴിഞ്ഞു മാറി… ഇനിയും അത് പറ്റില്ല… ഇന്ന് മുതൽ നമ്മൾ ഒന്നാണ് അപ്പൊ താൻ അറിയാത്ത ഒരു രഹസ്യവും എനിക്കുണ്ടാകുവാൻ പാടില്ല…”

“എന്തൊക്കെയാ ഏട്ടാ ഈ പറയുന്നത്… എല്ലാം നമുക്ക് നാളെ പറഞ്ഞാൽ പോരെ…”

“പോര… ഇപ്പൊ തന്നെ പറയണം… നാളെ ഞാൻ എല്ലാം പറഞ്ഞാൽ താൻ പറയില്ലേ… എന്റെ എല്ലാം എടുത്തിട്ട് എന്നെ ചതിച്ചു എന്ന്…”

ഗൗതം പറഞ്ഞതിന്റെ അർഥം ആദ്യം അച്ചുവിന് മനസ്സിലായില്ല, പിന്നെ മനസ്സിലായപ്പോൾ അവളുടെ നഖങ്ങൾ അവന്റെ കയ്യിൽ ആഴ്ന്നിറങ്ങുകയും ചെയ്തു

“ഓഹ്‌… വൃത്തികെട്ടത്…”

“ഹാവു… തൊലി പൊളിഞ്ഞു എന്ന് തോന്നുന്നു…. തമാശ ഒക്കെ അവിടെ നിൽക്കട്ടെ… ഞാൻ പറയാൻ പോകുന്നത് താൻ ശ്രദ്ധിച്ചു കേൾക്കണം…”

“ശരി… പറ..”

ഒരു ദീർഘ നിശ്വാസം വിട്ട് ഗൗതം പറയാൻ തുടങ്ങി

“താൻ ഒരിക്കൽ ചോദിച്ചില്ലേ അരുണിന് എന്ത് പറ്റി എന്ന്… അതിൽ എന്റെ പങ്ക് എന്തെങ്കിലും ഉണ്ടോ എന്ന്… ഉണ്ട്… അവൻ അങ്ങനെ ആകാൻ കാരണം ഞാൻ ആണ്…”

ഗൗതം അത് പറഞ്ഞിട്ടും അച്ചുവിൽ ഭാവമാറ്റം ഏതും ഉണ്ടായില്ല എന്നാലും അവൻ പറഞ്ഞ് തുടങ്ങി

“അന്ന് അച്ഛന് ആക്‌സിഡന്റ് ഉണ്ടായി എന്നറിഞ്ഞ ദിവസം നിങ്ങൾ വിളിച്ചിട്ട് ഞാൻ വീട്ടിലേക്ക് വന്നില്ലേ…അപ്പോൾ താൻ പറഞ്ഞ കാര്യങ്ങൾ അതാണ് എനിക്ക് അരുണിന്റെ മേൽ സംശയം ഉണ്ടാക്കാൻ കാരണം …

പിന്നെ അന്ന് പോലീസ് സ്റ്റേഷനിൽ പോയപ്പോൾ  അവർ പറഞ്ഞത് അതൊരു ആക്‌സിഡന്റ് ആണെന്നാണ് ,അങ്ങനെ കരുതിയത് കൊണ്ട് തന്നെ അവർ അതിൽ കൂടുതൽ അന്വേഷണങ്ങൾ നടത്തിയതുമില്ല. അവർക്കിതൊരു ആക്‌സിഡന്റ് ക്ലെയിം നേടിയെടുക്കാനുള്ള കേസ് മാത്രമായിയുന്നു

അവർ പറഞ്ഞതൊന്നും എനിക്ക് അംഗീകരിക്കാൻ പറ്റിയില്ല, അതുകൊണ്ടാണ് ഞാൻ തന്റെ അച്ഛന്റെ ഒപ്പം ആക്‌സിഡന്റ് നടന്ന സ്ഥലത്തേക്ക് പോയത് . അവിടെ നിന്നും എനിക്ക് മനസ്സിലായത് അത് വെറും ഒരു ആക്‌സിഡന്റ് ആയിരുന്നില്ല എന്നാണ്

ആക്‌സിഡന്റ് ആയിരുന്നു എങ്കിൽ അച്ഛന്റെ വണ്ടിയെ ഇടിച്ച ലോറി ബ്രേക്ക് പിടിച്ചതിന്റെ പാടുകളും അവിടെ കാണുമായിരുന്നു, പക്ഷെ അവിടെ ഉണ്ടായിയുന്നത് അച്ഛന്റെ ബൈക്ക് മറിഞ്ഞു തെന്നിയ പാടുകൾ മാത്രമായിരുന്നു

പിന്നെ അച്ഛന്റെ വണ്ടി ഒരു പോക്കറ്റ് റോഡിൽ നിന്നാണ് വന്നിരിക്കുന്നത്, ലോറി പിടിക്കുന്നതിനു മുൻപ് തന്നെ അച്ഛന്റെ വണ്ടി മറിഞ്ഞിരുന്നു അത് പാടുകളിൽ നിന്ന് വ്യക്തമാണ് , പെട്ടന്ന് എതിരിൽ വണ്ടി കണ്ടപ്പോൾ നിയന്ത്രണം പോയതാകാം എന്നിട്ടും ലോറി ബ്രേക്ക് പിടിക്കാതെ അച്ഛനെ ഇടിച്ചു തെറിപ്പിച്ചു അതെന്റെ സംശയങ്ങളെ ബലപ്പെടുത്തി