നിയോഗം 2 Dark World Part IX (മാലാഖയുടെ കാമുകൻ) 1513

അതിനു ശേഷം ക്വീൻ എന്റെ കയ്യിൽ അവളുടെ കൈ വച്ച് അവർ ഒരു സ്വർണ നിറമുള്ള തുണി കൊണ്ട് കെട്ടി… അതിനു ശേഷം അതിലേക്ക് എന്തോ ഒരു ദ്രാവകം ഒഴിച്ചപ്പോൾ തുണി കത്താൻ തുടങ്ങി..

കൈ പൊള്ളും എന്ന് കരുതി എങ്കിലും പൊള്ളുന്നില്ല.. അതങ്ങനെ നീല നിറത്തിൽ കത്തുന്നു…

കിവെറ ട്രിനിറ്റിയുടെ കിരീടം ഊരി മാറ്റി.. ക്വീൻ മരച്ചുവട്ടിൽ വച്ചിരുന്ന ഒരു നീല പെട്ടി തുറന്നു ഒറ്റ നീലക്കല്ലുകൾ പിടിപ്പിച്ച കിരീടങ്ങൾ എടുത്തു..

അപ്പോഴേക്കും ഡെൽറ്റ ഞങ്ങളുടെ കയ്യിൽ കെട്ടിയ തുണി അഴിച്ചു എടുത്തു.. അത് വേറെ ഒരു പെട്ടിയിൽ വച്ചു.

ക്വീൻ അവരുടെ ഭാഷയിൽ എന്തൊക്കെയോ പറഞ്ഞു.. അതിനു ശേഷം അത് ഞങ്ങളുടെ കയ്യിൽ തന്നു…

“പൂർണ മനസോടെ അവളുടെ തലയിൽ വച്ച് കൊടുക്കുക.. അതോടെ അവൾ നിന്റെ ആകും, റോഷൻ..”

ക്വീൻ പറഞ്ഞപ്പോൾ ഞാൻ ട്രിനിറ്റിയെ നോക്കി.. നീല കണ്ണുകളിൽ ലജ്ജ ആണ്… സന്തോഷവും..

ഞാൻ അത് അവളുടെ തലയിൽ വച്ച് കൊടുത്തു..

“പൂർണ മനസോടെ അവന്റെ തലയിൽ വച്ച് കൊടുക്കുക.. അതോടെ അവൻ നിന്റെ ആകും, ട്രിനിറ്റി…”

ക്വീൻ അതുപോലെ അവളോടും പറഞ്ഞപ്പോൾ അവൾ എന്റെ തലയിൽ കിരീടം വച്ച് തന്നു..

ഉടനെ കുറച്ചുപേർ ഒരു കൊമ്പ് പോലത്തെ വസ്തു ഊതി ശബ്ദം ഉണ്ടാക്കി..

എന്നെയും അവളെയും സ്വർണ നിറമുള്ള തുണി ദേഹത്ത് കൂടി ചുറ്റി..

മരത്തിൽ നിന്നും പൂക്കൾ കൊഴിഞ്ഞു വീണു..
ഞങ്ങളുടെ ദേഹത്തേക്കും അവിടെ നിന്നവരുടെ ദേഹത്തേക്കും..

“മെയ്‌വൂൺ നിങ്ങളെ അനുഗ്രഹിച്ചിരിക്കുന്നു…”

ക്വീൻ അത് പറഞ്ഞു എന്റെ കൈ അവളുടെ കയ്യിൽ വീണ്ടും പിടിപ്പിച്ചു, നേരത്തെ കെട്ടിയതു പോലെ വേറെ ഒരു തുണി കൊണ്ട് കെട്ടി.. വീണ്ടും ഒരു ദ്രാവകം അതിൽ ഒഴിച്ചു..

ഈ പ്രാവശ്യം ചുവന്ന നിറത്തിൽ ആണ് തീ കത്തിയത്.. അതോടെ എല്ലാവരും സന്തോഷം നിറഞ്ഞ ശബ്ദങ്ങൾ പുറപ്പെടുവിച്ചു..

“അവളെയും കൊണ്ട് ഈ മരം ഒരു പ്രാവശ്യം ചുറ്റി വരൂ റോഷൻ.. “

ഞാൻ അവളെയും കൊണ്ട് മരം ചുറ്റി വന്നപ്പോൾ തീയുടെ നിറം പച്ച നിറം ആയി മാറി..

ഡെൽറ്റ അത് അഴിച്ചു മാറ്റി ആ മരത്തിന്റെ ഒരു കമ്പിൽ കെട്ടി..

അതോടെ ചടങ്ങുകൾ കഴിഞ്ഞു..

“അങ്ങനെ നമ്മുടെ കൂട്ടത്തിൽ ആദ്യമായും അവസാനമായും ഒരാൾ വിവാഹിത ആയിരിക്കുന്നു.. ഇന്ന് എല്ലാവർക്കും കൊട്ടാരത്തിൽ ആണ് ഭക്ഷണവും താമസവും… “

ക്വീൻ അത് പറഞ്ഞ ഉടനെ എല്ലാവരും വന്നു ഞങ്ങളെ അഭിനന്ദിച്ചു.. എനിക്ക് ആകെ നാണം ആയിരുന്നു…

എന്റെ നിയോഗം.. അത് എഴുതിയ ആൾ ആരാണാവോ എന്ന് ഞാൻ ചിന്തിക്കാതെ ഇരുന്നില്ല…

***

ട്രിനിറ്റി കുട്ടികളെ ഉറക്കാൻ കിടത്തുന്നത് ഞാൻ നോക്കി നിന്നു..

അവർ പ്രായപൂർത്തി ആകാൻ ആയി എന്നാലും അവർക്ക് അമ്മ ആണ് എല്ലാം ചെയ്തു കൊടുക്കുന്നത്..