നിയോഗം 2 Dark World Part IX (മാലാഖയുടെ കാമുകൻ) 1502

അത് പ്രതീക്ഷിക്കാത്ത എന്റെ പിടി അല്പം അയഞ്ഞപ്പോൾ അവൾ ഒന്ന് കൂടി വെട്ടിതിരിഞ്ഞു കുതറി.. ഒപ്പം കൈകൾ രണ്ടും പുറകോട്ട് ഇട്ടു എന്റെ വയറിന്റെ ഇരുവശത്തും ആഴത്തിൽ നഖങ്ങൾ ഇറക്കി..

“ആഹ്ഹ്ഹ്….”

വല്ലാത്ത ഒരു കരച്ചിലോടെ ഞാൻ പിടി വിട്ടു ഉരുണ്ടു മാറി.. അവൾക്ക് ശ്വാസം കിട്ടാത്തത് പോലെ അവൾ നെഞ്ചിൽ അടിച്ചു..

എന്നാലും അവൾ എഴുന്നേറ്റു നിന്നു ദുർബലം ആയി എന്റെ നേരെ കൈവീശി എന്നാൽ മറുകൈ ശക്തം ആയി എന്റെ കഴുത്തിൽ പിടിച്ചു.. ഞാനും തിരിച്ചു പിടിച്ചു…

അവളുടെ കയ്യിലെ നഖങ്ങൾ എന്റെ കഴുത്തിൽ മെല്ലെ ഇറങ്ങിയപ്പോൾ അവളെ ഞാൻ ഒരു കൈകൊണ്ടു അവളുടെ കഴുത്തു ഞെരിച്ചു അവളെ അങ്ങനെ ഉയർത്തി…

“തോൽവി സമ്മതിക്ക്..”

അവൾ ശ്വാസം എടുക്കാൻ ബുദ്ധിമുട്ടി തന്നെ മുരണ്ടു..

“ഇല്ല….നിന്നെയും കൊണ്ടേ ഞാൻ പോകു….”

ഞാൻ മെല്ലെ പറഞ്ഞു.. ഉടനെ അവളുടെ പിടി മുറുകി..

എനിക്കും ശ്വാസം മുട്ടി.. എന്റെ കണ്ണുകൾ തുറിച്ചു.. വാ തുറന്നു.. അവളുടെയും… അവൾ കാലുകൾ വച്ച് എന്നെ ചവുട്ടി.. അവളുടെ ചലനം മെല്ലെ മെല്ലെ കുറഞ്ഞു വന്നു.. ശരീരം വെട്ടി വിറച്ചു..

എന്നാലും രണ്ടുപേർക്കും പിടി വിടാൻ മനസ് ഇല്ലായിരുന്നു.. ശക്തം ആയി തന്നെ പിടുത്തം തുടർന്നു… എന്റെ കണ്ണിൽ ഇരുട്ട് കയറി എന്റെ ബോധം പോകാൻ നിമിഷങ്ങൾ മാത്രം ഉള്ളപ്പോൾ.. ഞാൻ സർവ്വ ശക്തിയും എടുത്തു അവളുടെ കഴുത്ത് ഞെരിച്ചു..

ഉടനെ ഒരു സൈറൺ കേൾക്കുകയും രണ്ടു പെണ്ണുങ്ങൾ ചാടി വന്നു എന്റെയും അവളുടെയും പിടി വിടുവിക്കുകയും ചെയ്തു..

എന്നെ അവർ വലിച്ചെടുത്തു.. ഞാൻ തളർന്നു നിലത്തേക്ക് വീണു നിവർന്നു കിടന്നു ശ്വാസം ആഞ്ഞു വലിച്ചു..

വേറെ ആർക്കും അനക്കം ഇല്ല.. ക്വീൻ സ്തംഭിച്ചു നിൽക്കുന്നു..

ഡെൽറ്റക്ക് അനക്കം ഇല്ല..
അവർ ഡെൽറ്റയേ നെഞ്ചിൽ അമർത്തിയപ്പോൾ അവൾ വീണ്ടും ശ്വാസം വലിക്കാൻ തുടങ്ങി.. വാ തുറന്നു അവൾ ആഞ്ഞു ശ്വാസം വലിച്ചു..

ഞാൻ എഴുന്നേറ്റു ഇരിക്കാൻ ശ്രമം നടത്തി, കഴിഞ്ഞില്ല .. കയ്യിലെ ഒരു ഭാഗം മാംസം അടർന്നിരിക്കുന്നു.. വായിൽ നിറയെ ചോര..

വയറിന്റെ ഇരുവശവും ആഴത്തിൽ മുറിവ്.. കഴുത്തിൽ നിന്നും ചോര.. വേദന… അവൾ എന്നെ ഇഞ്ചു ഇഞ്ചു ആയി കൊന്നത് പോലെ.. ഇതിലും ബേധം മരിക്കുകയായിരുന്നു എന്നെനിക്ക് തോന്നി..

എനിക്ക് ശ്വാസം വലിക്കാൻ വല്ലാതെ ബുദ്ധിമുട്ട് അനുഭവപെട്ടു.. വാരിയെല്ല് പൊട്ടി എന്നെനിക്ക് തോന്നി… വല്ലാതെ വേദന..

ട്രിനിറ്റി എന്നെ നോക്കി കുട്ടികളെ ചേർത്ത് പിടിച്ചു നിൽക്കുന്നു.. അവളുടെ ഭാവം എന്താണെന്നു എനിക്ക് മനസിലാകുന്നില്ല… കണ്ണിൽ നിന്നും വെള്ളം ഒഴുകുന്നുണ്ട്..
ഞാൻ അവിടെ തന്നെ കിടന്നു.. കുട്ടികൾ എന്റെ അടുത്തേക്ക് വരാൻ നോക്കി എങ്കിലും അവൾ വിട്ടില്ല. അതാണ് നിയമം.

രണ്ടു പേര് വന്നു എന്നെ നോക്കി.. ഞാൻ അവരെ തടഞ്ഞു.. മെല്ലെ എഴുന്നേറ്റ് ഇരുന്നു.. വായിൽ ചോര.. എന്നാലും ഒരാൾ വന്നു എന്റെ മുറിവുകളിൽ ഒരു മരത്തിന്റെ പശ തേച്ചു.. അതിന് ശേഷം ചോര തുടച്ചു.. എനിക്ക് കുടിക്കാൻ വെള്ളം തന്നു.