അപരാജിതന്‍ 32 [Harshan] 8682

അവനെ കണ്ടതും മാമ എന്ന് പറഞ്ഞു ഗൗരി ഓടിവന്നു.

അവനവളെ അല്പം നേരം കൊഞ്ചിച്ചു.

“,മാമാ ,വാവയ്ക്ക് വേറെ കിങ്ങിണിയെ ആൻറി തന്നല്ലോ ,, ” എന്ന് പറഞ്ഞു കൊണ്ട് അവന്‍റെ താടിയിൽ പിടിച്ചു വലിച്ചു

അവൻ കസ്തൂരിയെ നോക്കി

“എന്താ ഇവളീ പറയുന്നത് ചേച്ചി ?”

“അനിയാ ,,പാർവ്വതി മോൾ ഇവിടെ വന്നിരുന്നു ”

അതുകേട്ടപ്പോൾ അവന്‍റെ മുഖത്തൊരു അനിഷ്‌ട൦ പ്രകടമായി

“നൂറ്റി അമ്പതു പശുക്കളെയും മുപ്പതോളം കിടാക്കളെയുമാ ഇങ്ങോട്ട് സമ്മാനമായി തന്നത് ”

അതുകേട്ടു അവനൊന്നമ്പരന്നു

“ഇങ്ങോട്ടോ ,?”

“അതേയനിയാ ,, അനിയൻ പോയ സമയത്താ വന്നത് ”

“ഓ ,,,അങ്ങനെ ,, ”

“അനിയനെ കാണണമെന്നു ആഗ്രഹവും പറഞ്ഞു ”

“എനിക്കാരെയും കാണണ്ട ”

“അതെന്താ ,,,ഒരു തവണ കണ്ടാൽ പിന്നെ അനിയൻ പാർവതി മോളുടെ അടുത്തു നിന്ന് മാറില്ല ,,അത്രക്കും സുന്ദരിയാ”

“ഓ ,,ഒരു സൗന്ദര്യം ,,”

അതുകേട്ടു കസ്തൂരി ചിരിച്ചു

“മാമാ ,,മാമാ ,,” ഗൗരി മോൾ വിളിച്ചു

“എന്താടാ പൊന്നെ ”

“ആൻറി വാവേ  കുറെ ഉമ്മ വെച്ചല്ലോ ,, “അവൾ കൊഞ്ചലോടെ പറഞ്ഞു

“മാമൻ ഉമ്മ വെക്കുന്നതാണോ ,,അതോ ആ ആൻറി ഉമ്മവെക്കുന്നതാണോ എന്‍റെ പൊന്നിന് ഇഷ്ടം ”

അവൾ അല്പംനേരം ആലോചിച്ചു

എന്നിട്ടവൾ ഇടത്തെ കുഞ്ഞിക്കവിളിൽ തൊട്ടു

“മാമൻ ഇവിടെ ”

എന്നിട്ട് വലത്തേ കവിളിൽ കൂടെ തൊട്ടുകൊണ്ട് “ആൻറി ഇവിടെ ,, ”

അതുകേട്ടു കസ്തൂരി വായ് പൊത്തി ചിരിച്ചു

ഗൗരി ആദിയുടെ മടിയിൽ നിന്ന് കൊണ്ട് അവന്‍റെ മീശ പിരിച്ചു മുകളിലേക്ക് വെച്ചു.പിന്നെ താഴേക്ക്

അവൾ അത്രയേറെ ഹൃദയം കൊണ്ട് ആദിയുമായി അടുത്ത് പോയിരുന്നു.

“മാമാ ,,,,,,,,” അവൾ സ്വകാര്യമായി അവന്‍റെ കാതിൽ പറഞ്ഞു

“എന്താ പൊന്നെ ”

“വാവേടെ ആൻറിയെ മാമൻ മംഗലം കയിക്കൊ ?”

ഒരു നടുക്കത്തോടെ അവൻ കസ്തൂരിയെ നോക്കി

“അടികൊള്ളും നിനക്ക് ,,,,,” കസ്തൂരി ഉറക്കെയവളെ ശാസിച്ചു.