Wonder 7 [Nikila] 2416

“ശരി, സമ്മതിച്ചു. പക്ഷെ നീയാ ഹോറർ ഹൌസിൽ ചെയ്തത് എന്ത് ഉദ്ദേശം വച്ചാ ? നിന്റെയാ പോക്കിരിത്തരം കാരണം എനിക്കു ഹാർട്ട് അറ്റാക്ക് വന്നുരുന്നെങ്കിലോ?”

 

“അതിന് ഒന്നും പറ്റിയില്ലല്ലോ”

 

“ഉവ്വ്, ഒന്നും പറ്റിയില്ലാന്ന് ?. ഒരു മുറീടെ പല സൈഡീന്നും തോന്നിയ പോലെ ഗോറില്ലേം കുരങ്ങനും അസ്ഥിക്കൂടവുമൊക്കെ എന്നെ ഫ്രഞ്ച് കിസ്സടിക്കാൻ വന്നാ പേടിക്കാണ്ട് നിൽക്കാൻ ഞാൻ കട്ടബൊമ്മനുമല്ല. ആ കാര്യമൊക്കെ വീണ്ടും ആലോചിക്കുമ്പോ എന്റെ വലത്തേ കൈ ഇപ്പോഴും വിറക്കാ, ദാ നോക്ക്”

 

എന്നും പറഞ്ഞു ഞാനെന്റെ വലം കൈ അവരുടെ നേരെ നീട്ടി. സാധാരണ ഞാൻ വല്ലാതെ പേടിച്ചാലോ അല്ലെങ്കിൽ അമിതമായി ടെൻഷനടിച്ചാലോ അതിനനുസരിച്ചു ആദ്യം എന്റെ ശരീരത്തിലെ വലത്തേ കൈ ആണ് വിറയ്ക്കുക.

 

“ഇത് അതല്ല, ജൂവൽ ചേച്ചി ഐ ലവ് യൂ പറഞ്ഞതിന്റെയാ”

 

പുല്ല്?, അതും കണ്ടു പിടിച്ചു. ഞാൻ ചമ്മല് മറയ്ക്കാൻ ലൂക്ക് എങ്ങോട്ടോ മാറ്റി.

 

ഞാൻ പിണങ്ങിയതാണെന്ന് കരുതി അവസാനം മിഖി എന്റെടുത്തേക്ക് വന്ന് പിണക്കം മാറ്റാനായി എന്നോട് ചേർന്ന് കെട്ടിപ്പിടിച്ചു നിന്നു. അതോടെ അതും കോംപ്രമൈസായി?. ഞങ്ങളുടെ ഈ കലിപ്പും പിണക്കവുമൊക്ക വെറും ജാഡ മാത്രമാ.  ശരിക്കും ഈ പ്രശ്നങ്ങളൊന്നും ഞങ്ങള് ഗൗരവമായി എടുക്കാറില്ല. ഞങ്ങളെ അടുത്തറിയാവുന്നവർക്ക് ഞങ്ങളുടെ ഈ പിണക്കവും ഇണക്കവും കാണുമ്പോൾ പലപ്പോഴും അസൂയ തോന്നാറുണ്ട്. ശരദാന്റിയും ഫിലിപ്പ് അങ്കിളുമാണ് ഈ അസൂയയും കൊണ്ട് നടക്കുന്ന പ്രധാന ആളുകൾ.

 

“ടാ, ജോ. നീയിനിയും ആ ജൂവലിന്റെ കാര്യം പറഞ്ഞില്ല. നീ നേരത്തെ അവളുടെയടുത്തേക്ക് പോയിട്ട് എന്താടാ ഉണ്ടായേ ? അവള് ഇഷ്ടമാണെന്ന് പറഞ്ഞപ്പോ നീയെന്താ തിരിച്ചു പറഞ്ഞേ ?” റോയ്.

 

പന്നി, പിന്നെയുമെന്നെ ആ കാര്യം തന്നെ ഓർമിപ്പിച്ചു. ഇത്തിരി നേരം മുൻപ് അവളുടെ മുറിയിലിരുന്ന് വിയർത്തതും മുള്ളാൻ മുട്ടിയതുമൊക്കെ പിന്നെയും ഓർമ്മ വന്നു. ഇതൊക്കെ പിന്നേം ഓർക്കുമ്പോഴേ ഒരു പരിഭ്രാന്തിയാണ്. എല്ലാം ഒന്ന് മറന്നു വന്നതാ. അവിടെയാണ് ഇവന്റെയൊരു കോ….. ? അതായത് കോതമംഗലത്തെ ഒരു ചോദ്യം. ഇവന്റെ തലയിലോട്ട് മേലെ കിടന്നു കറങ്ങുന്ന ഫാനൊന്ന് പൊട്ടി വീണിരുന്നെങ്കിൽ?. ഞാൻ മുകളിലോട്ട് നോക്കി. പുല്ല്, ഈ തണുപ്പൊക്കെയുള്ള ഊട്ടിയിലെ മുറിയിലൊക്കെ ആര് ഫാൻ പിടിപ്പിക്കാനാണ്?. ഓരോരോ ഗതികേട്.

 

“ജോ, നീയൊന്നും പറഞ്ഞില്ല ??” റോയ്.

 

“ഒന്നു പോയേടാ, അതൊക്കെ ആലോചിക്കുമ്പോഴാ കയ്യും കാലും വിറക്കാ. അപ്പോഴാണ് ഇനി വിശദീകരണവും കൂടി ഉണ്ടാക്കാത്തതിന്റെ സൂക്കേട്?”

 

ആ കാര്യങ്ങളൊക്കെ ഓർത്തപ്പോൾ പിന്നെയും എന്റെ നെഞ്ചൊന്ന് പാളി. ടെൻഷൻ മൂത്ത് കയ്യിലെ നഖം കടിക്കാൻ വേണ്ടി കൈ നോക്കിയപ്പോഴാണ് വീണ്ടും അടുത്ത ഗതികേട്. എന്റെ കൈ വിരലിലിനി ഒരു നഖം പോലും ബാക്കിയില്ല. ഇന്നലെ രാത്രി വീട്ടില് വെറുതെയിരുന്നപ്പോൾ കയ്യിലെയും കാലിലെയും നഖമെല്ലാം നേരംമ്പോക്കിന് വെട്ടികളിച്ചത് ഇപ്പോഴാണ് ഓർമ്മ വന്നത്.

 

“ജോ, ടെൻഷൻ മറക്കാൻ ഒരു വഴിയുണ്ട്” റോയ്.

 

“എന്താടാ ?”

 

“രണ്ടു പെഗ്ഗടിച്ചാ മതി, ഊട്ടിയിലെ തണുപ്പിന് ബെസ്റ്റാടാ?. നിന്റെ ടെൻഷനും മാറിക്കിട്ടും”

 

എനിക്കങ്ങട് കലി കേറി വന്നു.

 

“മദ്യം രുചിച്ചു പോലും നോക്കാത്ത എന്നോട് തന്നെ മദ്യസേവ ചെയ്യാൻ പറയുന്നോടാ കള്ളുകുടിയാ?”

 

റോയ് എന്നെ നോക്കി ഇളിച്ചു കാണിച്ചു.

 

“ജോ, കൂൾ കൂൾ. നീയൊന്ന് അടങ്ങടാ. ഞാൻ ചുമ്മാ പറഞ്ഞതാ. നിനക്ക് വേണ്ടെങ്കിൽ വേണ്ട?” 

 

“ജോ, എന്നാ എന്റേല് വേറൊരു ഐഡിയ ഉണ്ട്” മിഖി.

 

“എന്തുവാടാ ?”

 

“നമുക്കൊരു ചോക്ലേറ്റ് കോഫി കുടിച്ചാലോ ?”

 

ചോക്ലേറ്റ് കോഫി. അതു സംഗതി കൊള്ളാം. ഭാഗ്യം, ഇവൻ പറഞ്ഞത് അത്ര വലിയ പൊട്ടാത്തരാമായിരുന്നില്ല.

 

“ചോക്ലേറ്റ് കോഫിയോ ? അതു കുടിച്ചിട്ട് എന്താ കാര്യം ?” റോയ്.

 

“ചോക്ലേറ്റ് കോഫി നല്ല ടേസ്റ്റുള്ള സാധനമാ. അതു കുടിച്ചോണ്ടിരിക്കുന്ന നേരത്തെ ആ കോഫിയുടെ ടേസ്റ്റ് അല്ലാതെ വേറൊന്നും നമ്മളാലോചിക്കില്ല. എങ്ങനെയുണ്ട് ഐഡിയ? ?”