Wonder 7 [Nikila] 2417

“അപ്പോ…. അപ്പോൾ ജോ ക്ക് ജൂവൽ ചേച്ചി ഐ ലവ് യൂ ന്ന് പറഞ്ഞപ്പോഴേക്കും മുള്ളാൻ മുട്ടിയല്ലേ ?” മിഖി

 

ചിരിക്കിടയിൽ ചെറിയ ഗ്യാപ്പ് കിട്ടിയപ്പോൾ മിഖിയെന്നോട് ചോദിച്ച ചോദ്യമായിരുന്നു ഇത്. 

 

“സത്യാടാ, കുറച്ചു നേരം കൂടി ആ റൂമിൽ നിന്നിരുന്നെങ്കിൽ ശരിക്കും വൃത്തികേടായേനെ?. പിന്നെ ഞാൻ തന്നെ ആ മുറി തുടച്ചു വൃത്തിയാക്കേണ്ടി വരും. എങ്ങനെയെങ്കിലും ഊരിപ്പോരാമെന്ന് വിചാരിപ്പോ അവളെന്റെ മുന്നില് വട്ടം കേറി നിന്ന് പിന്നേം ഒരാവശ്യമില്ലാതെ സെന്റിയടിച്ചു തകർക്കായിരുന്നു. നീയെന്നെ ഫോൺ വിളിച്ചില്ലായിരുന്നെങ്കിൽ ഞാൻ ശരിക്കും പെട്ടേനേ”

 

“വേഗം പോന്നത് നന്നായി. ഇല്ലെങ്കിൽ നാളെ നേരം വെളുക്കുമ്പോൾ കഥ ഇങ്ങനെ വന്നേനെ ;

 

“പ്രണയഭ്യർത്ഥന നടത്തിയതിന്റെ വൈരാഗ്യത്തിൽ യുവതിയുടെ റൂമിൽ മലമൂത്രവിസർജനം നടത്തി യുവാക്കൾക്ക് മാതൃകയായി ജോസഫ് സി ജെ”. എങ്ങനെയുണ്ട്  ?” മിഖി.

 

ഇതു കേട്ടതോടെ റോയ് പൊട്ടിച്ചിരിച്ചു. എനിക്കും ചിരി വന്നു.

 

“എന്നിട്ട് നീ അവള് പറഞ്ഞതൊന്നും ശ്രദ്ധിച്ചില്ലേ ?” റോയ്.

 

“അവള് എന്തൊക്കെയാ ഛർദിച്ചേന്നൊന്നും ഞാൻ നോക്കിയില്ല. എങ്ങനെയെങ്കിലും രക്ഷപ്പെട്ടാ മതിയെന്നായിരുന്നു ആ നേരത്ത്?” ഞാൻ.

 

“എന്തായാലും ഇതീന്നൊരു കാര്യം പഠിക്കാൻ പറ്റി” മിഖി.

 

“എന്താടാ ?” ഞാൻ

 

“ഒരു പെണ്ണിന്റെ കണ്ണീരിനേക്കാളും കാഠിന്യം കൂടുതല് കക്കൂസിലേക്ക് പോവാൻ മുട്ടി നിൽക്കുന്ന ആളുടെ അവസ്ഥക്കാ?” മിഖി.

 

പിന്നെ ഒരു കൂട്ടച്ചിരിയായിരുന്നു. അപ്പുറത്തുള്ള ടേബിളിലുള്ളവരൊക്കെ ഞങ്ങളെ കളിച്ചിരിയൊക്കെ കണ്ട് ഡിസ്റ്റർബ്ഡ് ആയി. അതുക്കൊണ്ട് ഞങ്ങള് ചിരി കണ്ട്രോള് ചെയ്തു. ശേഷം റോയ് ;

 

“ജോ, സംഭവം നമുക്കിപ്പോ ഇതെല്ലാം കോമഡി പോലെയാ. പക്ഷെ നീയാ ജൂവലിന്റെ അവസ്ഥയാലോചിച്ചിട്ടുണ്ടോ ? അവൾക്ക് നല്ല വിഷമമായിക്കാണും”

 

“എന്തിന് ? ജോ മൂത്രമൊഴിക്കാൻ പോയതിനാ ?” മിഖി 

 

“ടാ ചെക്കാ, നീ മിണ്ടാണ്ടിരുന്നോ”

 

“ഒക്കെ ബ്രോ?”

 

“ജോ, നീയാവളോട് ഇഷ്ടമില്ലാന്ന് പറഞ്ഞപ്പോൾ അവൾക്കെന്ത് മാത്രം വിഷമമായെന്ന് നിനക്കറിയോ ?”

 

റോയ് സംസാരിക്കാൻ വരുന്ന ടോപിക് കാരണം ഞാനും ഗൗരവത്തിലായി.

 

“അവൾക്ക് വിഷമമായെന്നറിയാം. എന്നു വച്ചു അവള് വിഷമിക്കാതിരിക്കാൻ ഇല്ലാത്ത ഇഷ്ടം ഉണ്ടെന്ന് നുണ പറയണോ ?”

 

“അതല്ലെടാ ജോ, നീയങ്ങനെ പറഞ്ഞത് കാരണം അവളിനി മുറിക്ക് പുറത്തിറങ്ങാതെ നല്ല കരച്ചിലായിരിക്കും. നമ്മളെപ്പോലെയല്ല ഈ പെണ്ണുങ്ങളുടെ കാര്യമൊക്കെ” റോയ്.

 

റോയ് അവൾക്ക് വേണ്ടി വാദിക്കുന്നത് കേട്ട് എനിക്കു ചെറിയ നീരസം തോന്നി. മിഖിയെ നോക്കിയപ്പോൾ അവൻ ഇതിലൊന്നും താല്പര്യമില്ലാത്ത മട്ടിൽ പിന്നെയും ഫോണെടുത്ത് ഗെയിം കളിക്കുകയായിരുന്നു. എന്നാലും കക്ഷിയുടെ ചെവി ഇങ്ങോട്ടാണ് കൂർപ്പിച്ചു വച്ചിരിക്കുന്നത്.

 

“റോയ്, നീയൊപ്പോ പറയുന്നത് ജൂവലിനി മുറിക്കകത്ത് ഉണ്ണാതെയും ഉറങ്ങാതെയും രാത്രി മുഴുവൻ കരഞ്ഞിരിക്കുമെന്നാണോ ?”

 

“ഏയ്, ജൂവൽ ചേച്ചിക്ക് മുള്ളാൻ മുട്ടിയാൽ ടോയ്‌ലെറ്റിലോട്ടൊക്കെ പോവും ?” മിഖി.

 

ഇവൻ മൊബൈൽ ഫോണിലാണ് ശ്രദ്ധിക്കുന്നതെന്ന് ഞാൻ വിചാരിച്ചപ്പോൾ മിഖി ഞങ്ങളുടെ സംസാരത്തിനിടയ്ക്ക് കേറി സംസാരിച്ചു.

 

“ഡേയ്, നീയാ വിഷയത്തീന്ന് ഇതു വരെ പിടി വിട്ടില്ലേ ??”