Wonder 7 [Nikila] 2419

“അങ്ങനെ അവരൊക്കെ സന്തോഷത്തോടെ കഴിയുന്നുണ്ടെങ്കിൽ അതൊന്നും തന്റെ മിടുക്കല്ല. പക്വതയുള്ള തിരിച്ചറിവ് കൊണ്ടാണ്. എന്റെ കൂടെ താമസിക്കുന്ന പങ്കാളി സ്വന്തം വീട്ടുക്കാരെയും സുഖങ്ങളെയും ഉപേക്ഷിച്ചു വന്നത് എന്നോടുള്ള വിശ്വാസം കൊണ്ടും സ്നേഹം കൊണ്ടുമാണെന്ന തിരിച്ചറിവ്. അങ്ങനെയുള്ള അവളെ/അവനെ മാത്രമേ ഞാൻ സ്നേഹിക്കൂ, അവരെ മാത്രമേ കാമിക്കൂ എന്നുള്ള ബോധം. അതാണ് അവരെ ഇപ്പോഴും ഒന്നിച്ചു നിർത്തുന്നത്. കൂട്ടത്തിൽ സൃഷ്ടാവായ ദൈവം കൊടുത്ത അനന്തമായ സ്നേഹവും അവരെ സന്തോഷത്തിലുള്ള ബന്ധത്തിൽ കൂടുതൽ കാലം നിലനിർത്തുന്നു”

 

എന്നാൽ ഞാൻ ഇത്രയും പഞ്ച് ഡയലോഗ് അടിച്ചിട്ടും തിരിച്ചവിടുന്ന് പുച്ഛചിരിയായിരുന്നു എനിക്കു കിട്ടിയത്. അതിന്റെ കാരണവും എനിക്കു മനസിലായി.

 

“ഓ, ഞാൻ സ്നേഹം എന്ന വാക്ക് ഉപയോഗിച്ചപ്പോൾ താൻ ജയിച്ചെന്ന് ഒരു വിചാരമുണ്ടാവും. എന്നാൽ താൻ ശരിക്കും കേട്ടോ പ്രണയം-സ്നേഹം ഇതു രണ്ടും ഒന്നല്ല. രണ്ടിനും അതിന്റേതായ വ്യത്യാസങ്ങളുണ്ട്. പലരുടേയും വിചാരം ഈ സ്നേഹം, സഹനം, പ്രണയം അങ്ങനെ ഇതു മൂന്നും ഒന്നു തന്നെയാണെന്നാ. എന്നാ അങ്ങനെയല്ല. ഈ മൂന്നെണ്ണവും തമ്മിലൊരു കണക്ഷൻ ചിലപ്പോൾ ഉണ്ടായേക്കാം. പക്ഷെ അപ്പോഴും ഈ മൂന്നും മൂന്നു തരത്തിലാണ്”

 

“എടാ നീ… 😡”

 

“കിടന്ന് തിളയ്ക്കല്ലേ, ബാക്കികൂടി പറയട്ടെ. സഹനം എന്നു പറയുന്നത് നമ്മുടെ സ്വന്തം ഇഷ്ടങ്ങളെല്ലാം മാറ്റി വയ്ച്ച് നമ്മുക്ക് വേണ്ടപ്പെട്ടവരുടെയോ അല്ലെങ്കിൽ മാറ്റാരുടെയെങ്കിലുമോ ഇഷ്ടങ്ങൾ നേടിയെടുക്കാൻ അവരുടെ കൂടെ നിൽക്കുന്നതാണ്. എന്നാൽ സ്നേഹത്തിന്റെ കാര്യത്തിലേക്ക് അതു സഹനത്തേക്കാൾ ഒരു പടി മുന്നിൽ നിൽക്കും. സ്നേഹമുള്ളിടത്ത് അയാൾ മറ്റൊരാളുടെ ഇഷ്ടങ്ങൾക്ക് വേണ്ടി കൂടെ നിൽക്കുമെന്ന് മാത്രമല്ല അവരുടെ സന്തോഷമാണ് നമ്മുടെ സന്തോഷം എന്ന ചിന്തയോടെ അവരുടെ കൂടെ എപ്പോഴും ഉണ്ടാകും. തിരിച്ചൊന്നും പ്രതീക്ഷിക്കാതെ യാതൊരു നിബന്ധനകളുമില്ലാത്ത സ്വാർത്ഥതയ്ക്കോ അഹങ്കാരത്തിനോ തീരെ സ്വാധീനമില്ലാത്ത സന്തോഷത്തിലും സങ്കടത്തിലും മറ്റുള്ളവരുടെ കൂടെ നിൽക്കാൻ പ്രേരിപ്പിക്കുന്ന സൃഷ്ടാവായ ദൈവം നൽകിയ സ്നേഹം. സ്നേഹം എപ്പോഴും വിശാലമാണ്. സ്നേഹം എന്നത് അച്ഛന് മകനോടും ഭാര്യയ്ക്ക് ഭർത്താവിനോടും കൂട്ടുക്കാർ തമ്മിലും സഹോദരങ്ങൾ തമ്മിലും ചിലപ്പോൾ ശത്രുക്കൾ തമ്മിലും അങ്ങനെ ആരോടു വേണമെങ്കിലും തോന്നാം. ഈ ഭൂമിയിൽ എല്ലാവരും സ്നേഹിക്കുവാനും സ്നേഹിക്കപ്പെടാനും ആഗ്രഹിക്കുന്നുണ്ട്. ആ സ്നേഹം ദൈവം തന്നെയാണ്. സ്നേഹിക്കുന്നവരിൽ എപ്പോഴും ദൈവികതയുണ്ടാകും.

 

പക്ഷെ നീ…..”

 

ഞാൻ ക്യൂപ്പിടിന്റെ നേരെ കൈ ചൂണ്ടി സംസാരിച്ചു.

 

“നീയൊരു സ്വാർത്ഥതതയാണ്. നീയും സ്നേഹം പോലെ തന്നെയാണെന്ന് വരുത്തി തീർത്തു മറ്റുള്ളവരെ പറ്റിക്കുകയാണ്. നീ കാരണം പ്രേമം തോന്നുന്നവരെല്ലാം തന്റെ ഇണയുടെ കൂടെ തന്നെയുണ്ടാകും. അവരുടെ ഇഷ്ടത്തിന് വേണ്ടി എന്തും ചെയ്യും, എന്തു ത്യാഗവും സഹിക്കും. പക്ഷെ എല്ലാം എന്തിനു വേണ്ടി ? എനിക്കു വേണ്ടി, എനിക്കു വേണ്ടിയെന്ന ചിന്ത ഒന്നുക്കൊണ്ട് മാത്രം. സ്വന്തം ഇണയുടെ കൂടെ നിന്ന് അവരെ സന്തോഷിപ്പിച്ചു അവർക്ക് വേണ്ടി എല്ലാം സഹിക്കുന്നുണ്ടെങ്കിൽ അതിനു ഒരൊറ്റ ലക്ഷ്യമേയുള്ളൂ. അവനെ/അവളെ സ്വന്തമാക്കണമെന്ന ചിന്ത മാത്രമുള്ളതുക്കൊണ്ട്. നേരത്തെ ഞാൻ പറഞ്ഞ ബൈക്കിന്റെ ഉദാഹരണക്കഥ പോലെത്തന്നെ. അവൻ/അവൾ ഒരിക്കൽ എന്റേതാകുമെന്ന വിചാരത്തിൽ എല്ലാം ചെയ്യുന്നു. ഒരു പക്ഷെ വിചാരിച്ചത് നേടാൻ കഴിഞ്ഞില്ലെങ്കിൽ അവിടെ തുടങ്ങും നിരാശ. പ്രണയനൈരാശ്യം വന്ന് ജീവിതത്തിലെ വിലപ്പെട്ട കാര്യങ്ങൾ പലതും നഷ്ടമാക്കിയവരെ എനിക്കു നേരിട്ടറിയാം. ചിലപ്പോൾ നൈരാശ്യം ഒരു വൈരാഗ്യമായി മാറാനും സാധ്യതയുണ്ട്. എന്റേതാവാത്തത് ഈ ലോകത്തിൽ വേണ്ട എന്ന തോന്നൽ ആ സമയങ്ങളിൽ അവരുടെ മനസിൽ കേറി വരും. അവിടെയൊന്നും സ്നേഹമല്ല ഉള്ളത്. സ്നേഹമുള്ളിടത്ത് സ്വാർത്ഥതയ്ക്കോ അഹങ്കാരത്തിനോ പ്രസക്തിയില്ല. സ്നേഹമുള്ളിടത്ത് സ്വാർത്ഥതയോ അഹങ്കാരമോ വന്നാൽ അതിന്റെ അവസാനം നാശത്തിലായിരിക്കും”

 

ക്യൂപ്പിട് കോപം കൊണ്ട് അന്ധനാവുന്ന അവസ്ഥ വരെയെത്തി കാര്യങ്ങൾ. പക്ഷെ എനിക്കൊരു ഭയവും തോന്നിയില്ല. കാരണം ഇതു എന്റെ സ്വപ്നമാണ്.

 

“നീ…. നീയെന്നെ അപമാനിക്കുന്നു”

 

“അങ്ങനെ തനിക്കു തോന്നുന്നുണ്ടെങ്കിൽ അതിനു കാരണം തന്റെ അഹങ്കാരമാണ്. തനിക്കൊക്കെ മറ്റുള്ളവരുടെ മേലേ അധികാരം കാണിക്കാനാണ് താല്പര്യം. അല്ലാതെ അവരെ സഹായിക്കാനല്ല. താനിത്രയും നാള് എന്റെ പുറകെ നടന്നിട്ടുണ്ടെങ്കിൽ അതിനു തനിക്കൊരു ലക്ഷ്യമേയുള്ളൂ. തനിക്കെന്നെ പ്രേമത്തിൽ കീഴ്പ്പെടുത്തണം. അങ്ങനെ തന്റെ അധികാരം കാണിക്കണം. പക്ഷെ എന്തോ ഒരു കാരണം കൊണ്ട് താനും തന്റെ കുടുംബവും എന്റെ മുന്നിൽ തോറ്റു പോയി. ഇപ്പോഴും തന്റെ ലക്ഷ്യം എന്നെ അടിമയാക്കണമെന്നാണ്. ഇതുതന്നെയാണ് പലപ്പോഴും പ്രേമിക്കുന്നവരുടെ കാര്യത്തിലും സംഭവിക്കുന്നത്. കൂടെയുള്ള ഇണ ആരു തന്നെയായാലും അവർ തന്റേതാണെന്ന ബോധമുണ്ടാവുന്നത് നല്ലതാ. എന്നാൽ തന്റേത് മാത്രമാണെന്ന വാശിയാണ് പലരും കാണിക്കുന്നത്. ഇതൊക്കെ നാശത്തിലേ അവസാനിക്കൂ”

 

“ഇല്ല, എനിക്കങ്ങനെ നിന്നെ അടിമയാക്കണമെന്ന് ആഗ്രഹമില്ല”

 

“Seriously? 🤨. പിന്നെ എന്തുണ്ടാക്കാനാടോ താൻ കേറി വന്നപ്പോൾ തന്നെ എന്നോട് മുട്ടുകുത്തി നിൽക്കാനും തന്റെ അടിമയാവനും പറഞ്ഞേ ?”