Wonder 7 [Nikila] 2416

നേരെ നടന്നു പോകാനുള്ള വഴിയെങ്കിലും ഒന്നു കണ്ടിരുന്നെങ്കിലെന്ന് ഞാൻ മനസ്സിലാലോചിച്ചു. അത്ഭുതമെന്ന് പറയട്ടെ, ഞാനങ്ങനെ വിചാരിച്ചതും എന്റെ തൊട്ടു മുന്നിൽ ഒരു റോഡ് തെളിഞ്ഞു വന്നു. ഇത്രേം ഇരുട്ടിലും എനിക്കു ഈ റോഡ് ശരിക്കും വ്യക്തമായി കാണാൻ കഴിയുന്നുണ്ട്. എന്നാൽ ഇവിടെ ചുറ്റുപാടും വേറെ വെളിച്ചമോ സ്ട്രീറ്റ് ലാംപോ അങ്ങനെയൊന്നും തന്നെ കാണാൻ പറ്റുന്നില്ലാതാനും. എന്നിട്ടും ഈ റോഡ് മാത്രം എങ്ങനെ വ്യക്തമായി കാണാൻ പറ്റുന്നു എന്ന് ഞാൻ ആലോചിക്കാതിരുന്നില്ല. എന്നാൽ ആലോചിച്ചു സമയം കളയേണ്ടാ എന്നു കരുതി ഞാൻ മുന്നിൽ കണ്ട പാതയിൽ കൂടി മുന്നോട്ടു നടന്നു.

അങ്ങനെ ഞാൻ നടന്നു നീങ്ങവേ അടുത്ത നിമിഷം പിന്നിൽ നിന്നും കൊടുങ്കാറ്റിന്റെ ഇരമ്പൽ ശബ്ദം കേട്ടു. അപ്പോഴും എനിക്കു കാര്യമെന്താണെന്ന് മനസിലായില്ല. ആ ഇരമ്പൽ ശബ്ദം കൂടുതൽ അടുത്തേക്ക് വരുന്നതായി തോന്നി. അങ്ങനെ ആ ശബ്ദം ശ്രവിച്ചുക്കൊണ്ട് മുന്നോട്ട് നീങ്ങിയപ്പോൾ പെട്ടന്ന് മറ്റൊരു ശബ്ദം കൂടുതൽ അടുത്തേക്ക് വരുന്നതായി അനുഭവപ്പെട്ടു.

WHOOOOSSSSHHH

എന്തോ അപകടം മണത്തറിഞ്ഞ ഞാൻ ഞെട്ടി സൈഡിലോട്ട് മാറി. ആ സെക്കന്റിൽ തന്നെ ഞാൻ നേരത്തെ നിന്ന സ്ഥലത്ത് പിന്നിൽ നിന്നും അതി വേഗതയിൽ പാഞ്ഞു വന്ന ഒരു അമ്പ് തറച്ചു നിന്നു. ആ അമ്പ് സ്പർശിച്ച തറയ്ക്ക് ചുറ്റും വിണ്ടു കീറിയ പാടുകൾ കാണപ്പെട്ടു. ഞാൻ ആശ്ചര്യപ്പെട്ടു പോയി. അതു ഒരു സാധാരണ അസ്ത്രമല്ല. സ്വർണ നിറത്തിൽ തിളങ്ങുന്ന ഒരു അസ്ത്രമായിരുന്നു അത്. ഒരു കൗതുകം തോന്നിയ ഞാൻ നിലത്തു മുട്ടുകുത്തി ചെറിയൊരു ഭയത്തോടെ ആ അസ്ത്രത്തിൽ തൊടാൻ പോയതും അടുത്ത സെക്കന്റിൽ അത് തീഗോളമായി കത്തി ജ്വലിച്ചു പൂർണ്ണമായും മാഞ്ഞു പോയി. എന്റെ മനസ്സിൽ ചെറുതായി ഭയം കടന്നു കൂടി. ഒരുപാട് നാളായി ഞാൻ ഭയത്തോടെ നോക്കിയിരുന്ന എന്തോ ഒന്ന് എന്നെ തേടി വരുന്നു എന്നൊരു ചിന്ത എനിക്ക് വന്നു.

നേരത്തെ കേട്ട ആ കൊടുങ്കാറ്റിന്റെ ഇരമ്പൽ ശബ്ദം കൂടുതൽ അടുത്തേക്ക് വന്നു. ആ ശബ്ദം എന്റെ തൊട്ടുമുകളിലെത്തിയപ്പോൾ ഞാൻ വിറച്ചുക്കൊണ്ട് മുകളിലേക്ക് നോക്കി. അപ്പോൾ കണ്ട കാഴ്ച്ച എനിക്കു വിശ്വസിക്കാനായില്ല. എന്റെ തലയ്ക്കു മുകളിലൂടെ ഒരു മനുഷ്യരൂപം പറന്നു പോകുന്നു. ഒരു പുരുഷനായിരുന്നു അത്, അയാളുടെ തോളിൽ പറക്കാനായി രണ്ടു ചിറകുകളുണ്ട്. അയാൾ പറന്നു വന്ന് എന്റെ മുൻപിൽ എനിക്കഭിമുഖമായി അൽപ്പം അകലെയായി അന്തരീക്ഷത്തിൽ ചിറകടിച്ചുകൊണ്ട് നിന്നു. എന്റെ മുന്നിൽ നിന്ന അയാളെ വ്യക്തമായി കണ്ടപ്പോൾ ഞാൻ പേടിച്ചു വിളറി. ഒരുപാട് ഛായാ ചിത്രങ്ങളിൽ കണ്ടു പരിചയമുള്ള മുഖം. അതെ അതു തന്നെ, ഞാൻ ഇത്രയും നാൾ പേടിയോടെ കണ്ടിരുന്ന പ്രണയത്തെ മറ്റുള്ളവർക്ക് വിതരണം ചെയ്യുന്നവൻ. സാക്ഷാൽ ക്യൂപ്പിട്.

ക്യൂപ്പിടിനെ കണ്ടപ്പോൾ എന്റെ ശരീരമാസകലം ചുട്ടുപൊള്ളുന്നതുപോലെ അനുഭവപ്പെട്ടു. എന്നാൽ ആ ഭയം മുഴുവൻ എന്റെ വലം കയ്യിൽ മാത്രം ഒരു വിറയലായി വന്നു. വിറയ്ക്കുന്ന എന്റെ വലം കയ്യ് ഞാൻ പുറകിലേക്ക് മറച്ചു പിടിച്ചു. നല്ല പോലെ പേടിച്ചിരിക്കുകയാണ് ഞാൻ. ഇത്രയും നാൾ പ്രണയത്തെ പേടിച്ചിരുന്ന എന്റെ മുന്നിലിപ്പോൾ ഇതാ പ്രണയം പടർത്തുന്ന ക്യൂപ്പിട് തന്നെ വന്നു നിൽക്കുന്നു. ഒരുപാട് പുസ്തകങ്ങളിലായുള്ള കേട്ടറിഞ്ഞതും പല ചിത്രങ്ങളിലുമായി കണ്ടറിഞ്ഞതുമായ കാര്യങ്ങൾ ശരി വയ്ക്കുന്ന തരത്തിലായിരുന്നു ക്യൂപ്പിടിന്റെ രൂപം. ഒരു ഗ്രീക്ക് പൗരന്റെ മുഖത്തിന് സമാനമായ പാറ്റേൺ തന്നെയായിരുന്നു ക്യൂപ്പിടിന്റേതും, എന്നാൽ അവരിൽ നിന്നും വ്യത്യസ്തമായി കൂടുതൽ സുന്ദരമായ മുഖമായിരുന്നു അയാളുടേത്. ആ കണ്ണുകളിൽ ഒരിക്കൽ നോക്കിയാൽ വീണ്ടും നോക്കാൻ തോന്നും. അത്രത്തോളം ആരെയും ആകർഷിക്കുന്ന കണ്ണുകളായിരുന്നു ക്യൂപ്പിടിന്റേത്. ഒരൊറ്റ രോമം പോലും ഇല്ലാത്ത സ്വർണ്ണ ശോഭയിൽ തിളങ്ങുന്ന സിക്സ് പാക്ക് ശരീരം. ആ ശരീരം ഒരു വെള്ളത്തുണിക്കൊണ്ട് മറച്ചിരിക്കുന്നു. കാലിൽ സ്വർണചെരുപ്പ്. വലത്തേക്കയ്യിൽ സ്വർണം കൊണ്ട് തയ്യാറാക്കിയ വില്ല്. എന്നാൽ അസ്ത്രം മാത്രം കാണുന്നില്ല. എന്തായാലും ക്യൂപ്പിടിനെ കാണാൻ ആകെ സ്വർണമയം ആണ്.

അത് എന്നെയാണ് നോക്കുന്നത്. എന്നാൽ അതൊരു സൗമ്യമായുള്ള നോട്ടമല്ല. ഒരു പ്രതികാരത്തിനുള്ള രൗദ്രഭാവമാണ് എന്നെ നോക്കുമ്പോൾ അത് പ്രകടിപ്പിക്കുന്നത്. അത് പിന്നെ അങ്ങനെയല്ലേ വരൂ, ഇത്രേം നാളും പ്രണയമെന്ന് കേൾക്കുമ്പോൾ തന്നെ ഒഴിഞ്ഞു മാറി നടന്നവനല്ലേ ഞാൻ. അപ്പോൾ ഉറപ്പായും എന്നോട് ദേഷ്യം കാണും.

“ജോസഫ്…..”

ക്യൂപ്പിട് എന്നെ നോക്കി ദേഷ്യത്തോടെ അലറി. പേടിച്ചു വിറച്ച ഞാൻ ആ വിളിക്കു മറുപടിയായി മുന്നോട്ടു കാൽ വച്ചു നടന്നു. അപ്പോഴും എന്റെ വിറയൽ നിന്നിരുന്നില്ല. ഈ വിളിക്കുന്നത് കൊല്ലാനാണോ വളർത്താനാണോ എന്നൊന്നും അറിയില്ലല്ലോ?. എന്റെ കാലുകൾ മുന്നോട്ടു നീങ്ങാൻ മടിച്ചു. അയാൾ എന്നെ കണ്ണുരുട്ടി നോക്കിയപ്പോൾ ഞാൻ പേടിച്ചു വീണ്ടും മുന്നോട്ടു നടന്നു.

ദൈവമേ, ഇതൊക്കെ സത്യം തന്നെയാണോ. അതോ വെറും സ്വപ്നമാണോ.

ഒരു മിനിറ്റ് ?

ഇത് ശരിക്കും സ്വപ്നം തന്നെയല്ലേ ?. അതേ, സ്വപ്നം തന്നെയാണ്. അല്ലെങ്കിൽ പിന്നെ ഞാനെങ്ങനെ ഈ സ്ഥലത്ത് എത്താനാണ് ? ഇപ്പോൾ ഞാൻ കണ്മുന്നിൽ കാണുന്നതൊന്നും യാഥാർഥ്യമല്ല. എല്ലാം എന്റെ സങ്കല്പങ്ങൾ മാത്രമാണ്. കാറിലിരുന്ന് റോയിയുമായി നടത്തിയ ചർച്ച കാരണം ക്യൂപ്പിട് എന്ന ദൈവം എന്റെ മനസ്സിൽ കേറിയതുക്കൊണ്ടാണ് ഇപ്പോൾ സ്വപ്നത്തിലും ഇത് വന്നിരിക്കുന്നത്.