Wonder 7 [Nikila] 2416

എനിക്ക് മിഖിയെക്കുറിച്ചോർത്തപ്പോൾ ചെറിയൊരു അഭിമാനം തോന്നി. അവൻ പറഞ്ഞത് ശരിയാണ്. ഒരുപാട് പുലിവാലും പൊല്ലാപ്പുകളുമായി മുന്നോട്ട് പോവുന്ന ഞങ്ങളുടെ ലൈഫിൽ പുതിയൊരു പ്രശ്നവും കൂടി കേറി വന്നെന്നും പറഞ്ഞു എന്തുണ്ടാവാനാണ്. വരുന്നത് വരട്ടേയെന്ന് കരുതുക. ഞാൻ മിഖിയെ അത്ഭുതത്തോടെ നോക്കി. അവൻ പറയാനുള്ളതെല്ലാം പറഞ്ഞു കഴിഞ്ഞപ്പോൾ എന്നെയൊന്നും മൈൻഡ് ചെയ്യാതെ കാറിനു പുറത്തുള്ള ഇരുട്ടിലേക്ക് കണ്ണും നട്ടിരിക്കാണ്. ഇവൻ ഒരു അത്ഭുതം തന്നെയാണ്. പലപ്പോഴും പ്രായത്തെ കടത്തിവെട്ടുന്ന ചിന്തകളാണ് അവനുള്ളത്. റോയ് ഒരക്ഷരം പോലും മിണ്ടാതെ ഡ്രൈവിംഗിൽ മാത്രം ശ്രദ്ധിക്കുന്നു. അൽപ്പം മുൻപ് റോയ് എന്നോട് പറഞ്ഞത് ജൂവലിനി എന്റെ സ്വസ്ഥത ഇല്ലാതാക്കുന്ന മാതിരി പിന്നാലെ നടന്ന് ശല്യം ചെയ്യുമെന്നാണ്. അവന്റെ ആ വാദത്തെയാണ് മിഖി ഒരു എക്സാമ്പിള് കാണിച്ചു പൊളിച്ചടുക്കിയത്. അതിന്റെ കുശുമ്പ് തന്നെയാ അവന്?. എന്തായാലും ഇവനെയും കൂടി ഉഷാറാക്കിയേക്കാം.

 

“റോയ്….”

 

“എന്താടാ ?” അവൻ താല്പര്യമില്ലാതെ വിളി കേട്ടു.

 

“സത്യത്തിൽ ഈ ദൈവങ്ങളൊക്കെ ഉണ്ടോടാ. അതായത് ഈ ക്യൂപ്പിട്, വീനസ്, ജൂപ്പിറ്റർ അങ്ങനത്തെ ടീംസൊക്കെ ?”

 

എന്റെ ചോദ്യം കേട്ടതുക്കൊണ്ടാകാം അവനെന്നെ സംശയഭാവേന നോക്കി. ഞാൻ പിന്നെയും തുടർന്നു ;

 

“ഈ യൂണിവേഴ്സിന് ഒരു ക്രീയേറ്റർ ഉണ്ടെന്ന് പറഞ്ഞാൽ വിശ്വസിക്കാം. അല്ലാതെ ഈ കാണുന്ന പ്രപഞ്ചമടക്കം എല്ലാം ഉണ്ടായത് ശൂന്യതയിൽ നിന്നാണെന്ന് പറയുന്നതില് ഒരു പോയിന്റുമില്ല. എന്നു വച്ചു ഈ ലോകത്തിലെ ദൈവങ്ങൾ നമ്മളിന്ന് ആരാധിക്കുന്ന ദൈവങ്ങളൾ തന്നെയാണെന്ന് ഉറപ്പുണ്ടോ ?” ഞാൻ.

 

എന്റെ ചോദ്യത്തിൽ കഴമ്പുള്ളതുക്കൊണ്ടാകാം റോയിക്ക് ഈ വിഷയത്തിൽ താല്പര്യം തോന്നി.

 

“എല്ലാം സത്യമാണെന്ന് നീ വിചാരിക്കണ്ടെടാ. കുറെയൊക്കെ മനുഷ്യന്മാര് ഉണ്ടാക്കി വിടുന്നതാ. പിന്നെ അതു ഏറ്റുപ്പിടിച്ച് പുതിയ കഥകളുണ്ടാക്കാൻ വേറെ കുറേ മണ്ടന്മാരുമുണ്ട്” റോയ്.

 

“എന്നാലും ഈ ദൈവങ്ങളെ വച്ചു ഉണ്ടാക്കിയിട്ടുള്ള കഥകളൊക്കെ കേൾക്കാൻ തന്നെ നല്ല രസമാണല്ലേ ?. ക്രിസ്തു, വിഷ്ണു, നബി, ബുദ്ധൻ, സ്യൂസ്, ജൂപ്പിറ്റെർ അങ്ങനെ എത്രയെത്ര ദൈവങ്ങളാ അല്ലേ. അതില് കുറേയെണ്ണം അധികാരം കാണിക്കാൻ വേണ്ടി നടക്കുന്നവരാ. അതാവുമ്പോ അവരുടെ ആൾദൈവങ്ങൾക്ക് അതും പറഞ്ഞു മറ്റുള്ളവരെ ഭരിക്കാമല്ലോ, അല്ലേ ?” ഞാൻ.

 

“എസ്ക്യൂസ് മീ?️” മിഖി.

 

“എന്താടാ മിഖി ?”

 

“ഞാനും കൂടി ഈ ഡിസ്‌കഷനിൽ വന്നോട്ടെ?”

 

ഇത്തിരി മുൻപ് പുറത്തേക്ക് കണ്ണും നട്ടിരുന്ന ആളാണ്. തലയിടേണ്ട വിഷയങ്ങളിലൊക്കെ ഇവൻ തലയിടും. തലയിടാൻ പാടില്ലാത്ത കാര്യങ്ങളിലും ഇവൻ തലയിടും?.

 

“അനുവാദം ചോദിച്ചു കേറി വരാൻ ഇത് ഫുട്‌ബോൾ മാച്ചൊന്നുമല്ലെടാ. നിനക്ക് എന്തെങ്കിലും പറയാനുണ്ടെങ്കീ നീ പറയെടാ” ഞാൻ

 

“അങ്ങനെയാണെങ്കിൽ എനിക്കൊരു കാര്യം പറയാനുണ്ട്”

 

“ആ, പറഞ്ഞോളാൻ പറഞ്ഞില്ലേ” റോയ്.

 

“ഈ ദൈവങ്ങളുടെ കഥയൊക്കെ അടിപൊളിയായിരിക്കാം പക്ഷെ പലതും കോപ്പി ക്യാച്ചാണ്”

 

“എന്നു വച്ചാൽ ?”

 

“ഈ ക്യൂപ്പിട് ഒക്കെയുള്ള ഗ്രീക്ക് മിത്തോളജി തന്നെയെടുത്ത് നോക്കാം. അതിലെ പല സംഭവങ്ങൾക്കും മഹാഭാരതവും രാമായണവുമായി സാമ്യമുണ്ട്. കൃത്യമായി പറഞ്ഞാൽ നമ്മുടെ രാമായണത്തിലെ രാമരാവണ യുദ്ധവും അതേപോലെ ഗ്രീക്ക് മിത്തോളജിയനുസരിച്ചുള്ള ട്രോജൻ യുദ്ധവും തമ്മിലൊരു സിമിലാരിറ്റി ഉണ്ട്. രണ്ടു യുദ്ധവും നടന്നിരിക്കുന്നത് പെണ്ണിന് വേണ്ടിയാണ്. ഇവിടെ സീതയാണെങ്കിൽ അവിടെ ഹെലൻ”

 

“പോടാ, രാമായണത്തിലെ യുദ്ധം പോലെയാണോ ട്രോജൻ യുദ്ധം?” റോയ്.

 

“ശരി വിശ്വസിക്കണ്ട. വേറൊരു ഉദാഹരണം പറയാം, മഹാഭാരതത്തിലെ അക്കിലീസ്സും അവിടുത്തെ ശ്രീകൃഷ്ണനും…..”

 

“എന്തോന്ന് ?? മഹാഭാരതത്തില് അക്കലീസ്സോ ?”

 

“ഛെ! പുല്ല്, മാറിപ്പോയി ?. അതായത് മഹാഭാരതത്തിലെ ശ്രീ കൃഷ്ണന്റെയും ഗ്രീക്ക് മിത്തോളജിയിലെ അക്കിലീസ്സിന്റെയും മരണം ഏതാണ്ട് ഒരേ പോലെയാ. രണ്ടു പേരുടെയും ദേഹത്തു അമ്പ് കൊണ്ടാൽ മരിക്കില്ല. പക്ഷെ രണ്ടു പേരും കാലിൽ അമ്പ് കൊണ്ടാ മരിച്ചത്”

 

“ആ ഉദാഹരണം ഏകദേശം അടുത്തെത്തിയിട്ടുണ്ട്?. നെക്സ്റ്റ്” ഞാൻ