?സ്നേഹ തീരം 4? [ ചെകുത്താനെ സ്നേഹിച്ച മാലാഖ ] 582

” തനിക്ക് എന്താ പറ്റിയത് പാറു . അദ്ദേഹം കണ്ടു എന്നല്ലേ ഉള്ളൂ . മറ്റൊന്നും സംഭവിച്ചില്ലല്ലോ ….. ”

ഞാൻ പാറുവിനോട് ചോദിച്ചു.

” ഒന്നും ഇല്ല ഏട്ടാ.. എന്നാലും മനസ്സിൽ ഒരു പേടി പോലെ … ”

” താൻ എന്തിനാ വെറുതെ പേടിക്കുന്നത് ഞാനില്ലേ ….. ”

ഞാനതു പറഞ്ഞപ്പോൾ ഒന്നുകൂടി അവൾ എന്നെ മുറുക്കെ കെട്ടിപ്പിടിച്ച് ഇരുന്നു

അവളുടെ വീടിന്റെ മുൻപിൽ ഞാൻ ബുള്ളറ്റ് നിർത്തിയതും പാറു വണ്ടിയിൽ നിന്ന് ഇറങ്ങി.

” പാറൂ എന്തുണ്ടെങ്കിലും എന്നെ വിളിക്കണം ”

” ശരി ഏട്ടാ…. ”

അവൾ ഒരു ചെറു പുഞ്ചിരിയോടെ പറഞ്ഞു. ഞാൻ ബുള്ളറ്റ് തിരിച്ച് വന്ന വഴിയെ മടങ്ങി .

……….

രാത്രി ഞാൻ പാറുവിനെ വിളിച്ചു , എന്നാൽ ഫോൺ സ്വിച്ച് ഓഫ് എന്നായിരുന്നു മറുപടി . എനിക്കും വല്ലാതെ പേടി തോന്നി …… രാത്രി ഉറങ്ങാൻ കിടന്നിട്ടും ഉറക്കവും വന്നില്ല. മനസ്സിൽ പല ചിന്തകളും വന്ന് മൂടി . ഗതികെട്ട് ഞാൻ ചേട്ടായിയെ വിളിച്ച് നടന്നതെല്ലാം പറഞ്ഞു .

” എടാ …. കുഴപ്പമൊന്നും കാണില്ല . ചാർജ് ഇല്ലാഞ്ഞിട്ട് ഫോൺ സ്വിച്ച് ഓഫ് ആയതായിരിക്കും നീ സമാധാനപ്പെട് ……. ”

ചേട്ടായി എന്നോട് പറഞ്ഞു .

” എന്നാൽ ശരി ചേട്ടായി ”

ഞാനതും പറഞ്ഞ് കോൾ കട്ട് ചെയ്തു.

……..

രാവിലെ ഞാൻ പതിവ് പോലെ ഗ്യാരേജിലേക്ക് പോയി . രാവിലെ വിളിച്ചപ്പോഴും സ്വിച്ച് ഓഫ് എന്നായിരുന്നു മറുപടി , ചിലപ്പോൾ കോളേജിൽ പോകുന്നതിന്റെ തിരക്കിലാകും എന്ന് ഞാൻ കരുതി. ഞാൻ ഗ്യാരേജിലെ വർക്ക് ഒക്കെ കഴിഞ്ഞ് തിരിച്ച് വീട്ടിൽ എത്തിയപ്പോഴേക്കും അൽപം വൈകിയിരുന്നു .

” ഏട്ടാ…. പാർവ്വതി ചേച്ചി ഇന്ന് കോളേജിൽ എത്തിയില്ലല്ലോ എന്താ കാര്യം …. ”

( എന്റെ അനുജത്തിയാണ് കിച്ചു എന്നറിഞ്ഞതിൽ പിന്നെ പാറുവും കിച്ചുവും തമ്മിൽ നല്ല കൂട്ടാണ്. )