?സ്നേഹ തീരം 4? [ ചെകുത്താനെ സ്നേഹിച്ച മാലാഖ ] 582

” ഏട്ടാ എനിക്ക് പേടിയാകുന്നു . ”

ഒരു പതറിയ സ്വരത്തിൽ പറഞ്ഞു കൊണ്ട് പാറു എന്റെ വലതു തോളിൽ മുറുക്കെ പിടിച്ചു.

” പാറു ഇറങ്ങ് ”

പാറു ഇറങ്ങിയതും ഞാൻ ബുള്ളറ്റിൻ നിന്ന് ഇറങ്ങി .

ജീപ്പിൽ നിന്ന് ആറേഴ് പേർ ഇറങ്ങി വന്നു . ഇവരെ അയാൾ പറഞ്ഞ് വിട്ടതാണ് എന്ന് എനിക്ക് മനസ്സിലായി . ഒരുത്തൻ അടിക്കാനായി ഓടി വന്നതും അവന്റെ വലത്തെ നെഞ്ചിൽ ഞാൻ ആഞ്ഞ് ചവിട്ടി അവൻ നിലത്തേക്ക് മലർന്നടിച്ച് വീണു . അടുത്ത് വന്നവന്റെ വലത് കൈ ഞാൻ പുറകോട്ട് പിടിച്ച് തിരിച്ചതും എന്റെ വയറ്റിൽ ശക്തമായ എന്തോ ഒന്ന് കുത്തി കയറിയതുപോലെ നോക്കിയപ്പോൾ മറ്റൊരുത്തൻ ഒരു വലിയ കത്തി എന്റെ വയറ്റിൽ കുത്തിയിറക്കിയിരിക്കുന്നു രക്തം ഷർട്ടിലൂടെ ഊർന്ന് ഇറങ്ങുന്നു . അവൻ ആ കത്തി വലിച്ച് ഊരി വീണ്ടും കുത്തി …..

” എട്ടാ…… ”

ഒരു നിലവിളിയോടെ പാറു എന്റെ അടുത്തേക്ക് ഓടി വന്നതും ഒരുത്തൻ അവളെ ബലമായി വണ്ടിയിൽ കയറ്റാനായി പിടി വലിച്ചു. ഞാൻ എന്നെ കുത്തിയവനെ തള്ളി താഴെ ഇട്ട് പാറുവിന്റെ അടുത്തേക്ക് പതിയെ കുത്തേറ്റ വേദനയും കൊണ്ട് നടന്നതും ഒരു ഭാരമുള്ള ഇരുമ്പ് വടി കൊണ്ട് പുറും തലയിൽ ശക്തമായ അടി കിട്ടിയതും ഒരുമിച്ചായിരുന്നു . അടിയേറ്റ് റോഡിലേക്ക് വീണ് കണ്ണുകൾ അടയുന്നേരും പാറുവിനെ വലിച്ചിഴച്ച് ജീപ്പിൽ കയറ്റി കൊണ്ട് പോകുന്നതാണ് ഞാൻ അവസാനം കണ്ടത് പതിയെ എന്റെ കണ്ണുകൾ അടഞ്ഞു …… ബോധം നഷ്ടമായി .

………………

ഐ സി യു വിനുള്ളിലെ കടും തണുപ്പ് ശരീരത്തിലാകെ വ്യാപിച്ചതും ഞാൻ മെല്ലെ കണ്ണ് തുറന്നു . മുഖത്ത് ഓക്സിജൻ മാസ്ക് നെഞ്ചിൽ ഇ സി ജി ഉപകരണത്തിന്റെ വയറുകൾ തലയിലും വയറ്റിലും വലിയ കെട്ടുകൾ അതോടൊപ്പം കുത്തി തുളയ്ക്കുന്ന വേദനയും . ആ മുറിക്കുള്ളിൽ നിരവധി മെഡിക്കൽ ഉപകരണങ്ങളുടെ ബീപ് ശബ്ദ് മുഴങ്ങി കൊണ്ടിരുന്നു . കയ്യിലൂടെ ട്രിപ്പ് അൽപാൽപമായി ശരീരത്തിലേക്ക് കയറുന്നു . വാ തുറക്കാനോ ഒന്നും സംസാരിക്കാനോ ഒന്ന് അനങ്ങാൻ പോലും പറ്റാത്ത അവസ്ഥ.

“പാറു … അവൾ ”

എന്റെ മനസ്സ് മന്ത്രിച്ചു. ഇവിടുന്ന് എണീക്കണം എന്നുണ്ട് പക്ഷെ …….

ഡോറ് തുറന്ന് ഒരു നഴ്സ് അകത്തേക്ക് വന്നു . എന്റെ തുറന്ന കണ്ണുകൾ കണ്ടിട്ടാകണം വന്നതിനേക്കാൾ വേഗത്തിൽ അവർ തിരിച്ച് പോയി .

അൽപ നേരം കഴിഞ്ഞതും ഒരു ഡോക്ടറും നേരത്തെ വന്ന നഴ്സും കൂടെ രണ്ട് പേരും അകത്തേക്ക് വന്നു . ഡോക്ടർ എന്റെ പൾസും
ഇ സി ജി റീഡിംഗ്സും നോക്കിയ ശേഷം എന്റെ മുഖത്തെ ഓക്സിജൻ മാസ്ക് മാറ്റി .

” ശ്വസിക്കാൻ എന്തെങ്കിലും ബുദ്ധി മുട്ട് തോന്നുന്നുണ്ടോ ? ”

ആ ഡോക്ടർ എന്നോട് ചോദിച്ചു .

” ഇ …. ല്ല . ”

ഞാൻ പതിയെ പറഞ്ഞു .

” അധികം സംസാരിക്കണ്ട കേട്ടോ . ഇനി ഇത് വേണ്ട ആന്റ് എനിവെ യു ആർ വെരി ലക്കി . അല്ലെങ്കിൽ ഇപ്പോൾ താൻ ജീവനോടെ ഉണ്ടാകുമായിരുന്നില്ല. ”