?സ്നേഹ തീരം 4? [ ചെകുത്താനെ സ്നേഹിച്ച മാലാഖ ] 582

ഞാൻ ഫ്രഷായി റൂമിൽ എത്തിയതും കിച്ചു ചോദിച്ചു .

” അവൾ കോളേജിൽ വന്നില്ലേ ….. ? ”

ഞാൻ അല്പം ഞെട്ടലോടെ കിച്ചുവിനോട് ചോദിച്ചു.

” ഇല്ല . എന്താ ചേട്ടാ പ്രശ്നം . ”

കിച്ചു എന്നോട് ചോദിച്ചു.

ഞാൻ ഫോണെടുത്ത് വീണ്ടും പാറുവിനെ വിളിച്ചു . സ്വിച്ച് ഓഫ് അതായിരുന്നു മറുപടി . എനിക്ക് എന്തോ അൽപം പേടി തോന്നി തുടങ്ങി .

” എന്താ ചേട്ടാ …. എന്താ കാര്യം ?”

ഒന്നു മനസ്സിലാകാതെ എന്റെ മുഖത്തെ പരിഭ്രമം കണ്ട് കിച്ചു ചോദിച്ചു .

ഞാൻ കിച്ചുവിനോട് ഇന്നലെ ബീച്ചിൽ വച്ച് നടന്ന കാര്യങ്ങൾ പറഞ്ഞു.

” ചേട്ടാ എനിക്ക് എന്തോ ഒരു പേടി തോന്നുന്നു . ചേട്ടൻ പാർവ്വതി ചേച്ചിയുടെ വീട് വരെ ഒന്ന് പോയി നോക്ക് …… ”

” മ് ….. ”

കിച്ചു പറഞ്ഞത് ശരിയാണെന്ന് എനിക്ക് തോന്നി . ഞാൻ വേഗം ഡ്രെസ് മാറി റെഡി ആയതും കട്ടിലിൽ കിടന്ന എന്റെ ഫോൺ ശബ്ദിക്കാൻ തുടങ്ങി . എടുത്ത് നോക്കിയപ്പോൾ പരിചയം ഇല്ലാത്ത ഒരു നമ്പർ ആണ് . ഞാൻ കോൾ എടുത്തു .

“ഹലോ …. അരാണ് ? ”

ഫോണിന്റെ മറുവശത്ത് നിന്ന് ഒരു കരച്ചിലാണ് ഞാൻ കേട്ടത് ……

” പാറു ….. പാറൂ …. എന്തിനാ കരയുന്നേ …. ”

ആ ശബ്ദം പാറുവിന്റേത് ആണെന്ന് മനസ്സിലാക്കിയ ഞാൻ ചോദിച്ചു.

” ഏട്ടാ…… അയാൾ എന്നെ തല്ലി ……. ”

അവൾ അതും പറഞ്ഞതും കരച്ചിലിന്റെ തീവ്രത ഒന്നു കൂടി കൂടി …..

” പാറു എന്താ ഉണ്ടായത് തെളിച്ച് പറ ”

” ഏട്ടൻ ആരാണ് എന്താണ് നമ്മൾ തമ്മിൽ എന്നൊക്കെ എന്നോട് ചോദിച്ചു. നമ്മൾ തമ്മിൽ ഇഷ്ടത്തിലാണെന്ന് ഞാൻ പറഞ്ഞു …. അയാൾ ഏട്ടനെ മറക്കണം എന്ന് പറഞ്ഞു . ഞാൻ പറ്റില്ല എന്നു പറഞ്ഞു . അതിന് എന്നെ തല്ലി എന്റെ ഫോൺ എറിഞ്ഞ് പൊട്ടിച്ച ശേഷം എന്നെ എന്റെ റൂമിൽ അടച്ചിട്ടു . ഞാൻ ഇപ്പോൾ ഇവിടെ ജോലിക്ക് നിൽക്കുന്ന ആന്റിയുടെ ഫോണിൽ നിന്നാ വിളിക്കുന്നത് . കുറച്ച് മുൻപ് അയാൾ വന്ന് പറഞ്ഞു നാളെ അയാളുടെ ഏതോ ബിസിനസ് പാട്ണറുടെ മകനുമായി എന്റെ വിവാഹം നിശ്ചയിക്കാൻ പോകുകയാണ് എതിർത്താൻ എന്നെ വെറുതെ വിടില്ല എന്ന് … ”

പാറു അത് പറഞ്ഞ് വീണ്ടും കരയാൻ തുടങ്ങി .

“പാറൂ ….. താൻ കരയാതെ …. ”

ഞാൻ അതും പറഞ്ഞ് അവളെ ആശ്വസിപ്പിക്കാൻ ശ്രമിച്ചു . ഞാൻ ഒരു നിമിഷം ആലോചിച്ചു.

” പാറു ഞാൻ വന്ന് വിളിച്ചാൽ താൻ ഇറങ്ങി വരുമോ …… ?”

എന്റെ ആ ചോദ്യം കേട്ടതും അവളുടെ കരച്ചിൽ പെട്ടെന്ന് നിന്നു .

“വരാം….. വരാം…. ”