🔰🏇സേതുബന്ധനം 4 🚩👑 [M.N. കാർത്തികേയൻ] 355

ഞാൻ ഞെട്ടി വെള്ളത്തിൽ നിന്നും പൊങ്ങി. ഞാൻ പൊങ്ങി ചെവിയിൽ ഒക്കെ ഒന്നു വിരലിട്ടു നോക്കി കൊണ്ടിരുന്നപ്പോൾ അവനും പൊങ്ങി.

“ആ അണ്ണൻ നേരത്തെ പൊങ്ങിയോ. അപ്പൊ ഞാൻ ജയിച്ചു.”

“ടാ എന്റെ ചെവിയിൽ ഒരു പാട്ട് പോലെ എന്തോ കേട്ടു. അതാണ് പെട്ടെന്ന് പൊങ്ങിയത്”

“എന്റെ ചേട്ടാ തോറ്റാൽ ഉടായിപ്പ് കാണിക്കല്ലേ. വെള്ളത്തിനടിയിൽ ആര് പാട്ട് പാടാനാണ്.അതുമല്ല ഇങ്ങടെ തൊട്ടു അടുത്തു മുങ്ങിയ ഞാൻ കേട്ടില്ലല്ലോ.”

“എടാ സത്യമാണ്. തോറ്റാൽ സമ്മതിക്കാൻ എന്താ പാട്. ഇത് ഒളിമ്പിക്‌സ് ഒന്നുമല്ലല്ലോ. ഇത് സത്യമാണ്. നമ്മൾ ഈ സ്റ്റാറ്റസിൽ ഒക്കെ ബാക്ക് ഗ്രൗണ്ട് ഇടുന്ന ഒരു പാട്ട് ഉണ്ടല്ലോ ദേവരാജസേവ്യമാനപാവനാംഘ്രിപങ്കജം എന്നു തുടങ്ങുന്ന. അതാണ് കേട്ടത്.”.

” അത് സ്റ്റാറ്റസ് പാട്ടല്ല. കാല ഭൈരവ അഷ്ടകം എന്നു പറയും. ഒരു മന്ത്രമാണ്. നിങ്ങൾക്ക് തോന്നിയത് ആവും എന്തായാലും പറഞ്ഞത് നന്നായി. കാലഭൈരവ ക്ഷേത്രത്തിൽ കൂടി ഒന്നു പോയി വരാം.”

ഞങ്ങൾ കരയിലേക്ക് കേറുമ്പോഴും ഞാൻ ഓർത്തത് എന്റെ കാതിൽ മാത്രം ആ പാട്ട് എന്തു കൊണ്ട് കേൾക്കുന്നു എന്നതാണ്. അത് ഞാൻ വ്യക്തമായി കേട്ടത് ആണ്. എന്റെ ജീവിതത്തിൽ മാത്രം ഇങ്ങനെ ഒക്കെ വിചിത്രമായ സംഭവങ്ങൾ ഉണ്ടാവുന്നത് എന്താണാവോ

“നമുക്ക് കാല ഭൈരവ മൂർത്തിയെ പോയി തൊഴുത് വരാം. വിശ്വ നാഥനെ കാണും മുൻപ് അവിടെ പോയി അനുവാദം വാങ്ങണം എന്നാണ്. കാശിയുടെ സംരക്ഷകൻ ആണ് ഭൈരവൻ.

ത്രിമൂർത്തികളിൽ ആരാണ് ശക്തൻ എന്ന തർക്കം ഉണ്ടയപ്പോൾ മഹർഷികൾ ഉൾപ്പടെ എല്ലാരും സഭ ചേർന്നു. സഭയുടെ തീരുമാനം അന്തിമം എന്ന കാര്യം പറഞ്ഞു. സഭ പറഞ്ഞത് ശിവൻ ആണ് ഏറ്റവും ശക്തൻ എന്നാണ്. അങ്ങനെ തീരുമാനം വിഷ്ണു ഉൾപ്പെടെ എല്ലാരും അംഗീകരിച്ചപ്പോഴും ബ്രഹ്മാവ് അംഗീകരിക്കാതെ അഹങ്കാരം നടിച്ചു ശിവനെ പൊതു സഭയിൽ വെച്ചു അപമാനിച്ചു. അങ്ങനെ മഹാദേവൻ കപാല മാലകൾ ചാർത്തിയ പ്രചണ്ഡ രൂപമെടുത്തു എന്നും ബ്രഹ്മാവിന്റെ ഒരു തല വെട്ടി എന്നുമാണ് പറയുന്നത്. ആ രൂപമാണ് കാല ഭൈരവൻ.

ബ്രഹ്മാവിന്റെ തല വെട്ടിയതിനാൽ ബ്രാഹ്മണ ഹത്യ പാപം ഒഴിവാക്കാൻ എല്ലാ നദിയിലും മുങ്ങി. അങ്ങനെ ഗംഗയിലും മുങ്ങി. അങ്ങനെ മോക്ഷം കിട്ടിയ ഭൈരവനെ കാശി സംരക്ഷകൻ ആയി മഹാദേവൻ നിയമിച്ചു എന്നതാണ് ഐതീഹ്യം.”