??സേതുബന്ധനം 4 ?? [M.N. കാർത്തികേയൻ] 355

“ചേട്ടാ ഈ ഇടവഴികൾക്ക് ഒരു പേരുണ്ട്. എന്താ എന്നറിയുമോ”

ഞാൻ ഇല്ലെന്നു തലയാട്ടി.

“ഇതാണ് ഗല്ലി. ഇത് മാത്രമല്ല പരമ്പരാഗത ഗുസ്തി പഠിപ്പിക്കുന്ന സ്ഥലങ്ങളുമുണ്ട് അവയെ അഖാറകൾ അല്ലെങ്കിൽ അഘാടകൾ എന്നൊക്കെ വിളിക്കും.

ഇവിടുത്തെ പട്ടും സുഗന്ധ വ്യഞ്ജനങ്ങളും ശിവമൂലിയും ഭാങ്ങും ഒക്കെ പ്രസിദ്ധമാണ്”

ഞാൻ അതെല്ലാം കേട്ടു മൂളിക്കൊണ്ടിരുന്നു.

“വരുണ, അസി എന്നീ രണ്ട് നദികൾക്ക് ഇടയിൽ ആയത് കൊണ്ടാണ് വാരണാസി എന്നു പേര് വന്നത്. ഗംഗ തീരത്തു ആയതിനാൽ ബനാറസ് എന്നും വിളിക്കുന്നു. പുരാതന കാലം മുതൽക്കേ വിദ്യ തേടി നിരവധിയാളുകളാണ് ബനാറസ്സിൽ എത്തിയിരുന്നത്, പിൽക്കാലത്തു ബനാറസ്സിൽ ഒരു ഹിന്ദു സർവകലാശാല തന്നെ  സ്ഥാപിക്കപെട്ടിട്ടുണ്ട്.

പണ്ഡിതന്മാരുടെ ചർച്ചകൾ കൊണ്ടും,  സംവാദങ്ങൾ കൊണ്ടും ഈ തീരം എന്നും  ധന്യമായിരുന്നു. കാശി എന്നതിന് പ്രകാശമാനം എന്നും അർത്ഥമുണ്ട്. എല്ലാകാലത്തും  ജ്ഞാനത്താൽ ദീപ്തമായിരുന്നു കാശി എന്നാണ് ഈ വാക്കിന് അർത്ഥം.

 കാശി നഗരത്തിലേയ്ക്ക് പ്രവേശിക്കുവാൻ എഴ് പ്രവേശന കവാടങ്ങളാണുള്ളത്. ഓരോ കവാടവും കടന്ന് മഹാശിവ സന്നിധിയിലെത്തുന്ന ഏതൊരാളുടെയും സർവ്വപാപങ്ങളും ഒഴിഞ്ഞു പോകുമെന്നാണ് വിശ്വാസം. ശവദാഹത്തിനും മരണാനന്തരകർമ്മങ്ങൾക്കും പിതൃതർപ്പണത്തിനുമായി നിത്യം  ലക്ഷക്കണക്കിനാളുകളാണ് കാശിയിലെത്തുന്നത്. നിരവധി  ക്ഷേത്രങ്ങളുള്ള കാശിയിലെ  ഏറ്റവും പ്രധാനപ്പെട്ടത് വിശ്വനാഥ ക്ഷേത്രമാണ്.

ഭാരതത്തിലെ 12 ജ്യോതിർലിംഗങ്ങളിലൊന്നാണ് കാശിയിലേത്. 7 അടി ഉയരമുള്ള നന്തികേശന്റെ കല്ലിൽ കൊത്തിയ രൂപം കിഴക്ക് ഭാഗത്തായി പ്രതിഷ്ഠിച്ചിരിക്കുന്നു. വടക്കു ഭാഗത്തുള്ള “ജ്ഞാനവ്യാപി”എന്നവിശുദ്ധ കിണറിൽ നിന്നാണ് ശിവലിംഗം ലഭിച്ചതെന്ന് കരുതുന്നു. ശ്രീ ശങ്കരാചാര്യരാണ് കാശിയിലെ ഇന്നത്തെ നിലയിലുള്ള ശിവപൂജയ്ക്ക് തുടക്കമിട്ടത് എന്നാണ് കരുതുന്നത്.”