??സേതുബന്ധനം 4 ?? [M.N. കാർത്തികേയൻ] 355

“എന്തൊക്കെ ടൈപ്പ് വിശ്വാസങ്ങൾ ആടെ”

“നമ്മുടെ ഈ വിശ്വാസങ്ങൾ കാണാൻ വിദേശികൾക്ക് വരെ താൽപര്യമാണ്. ആകെയുള്ള പോരായ്മ വഴിക്കിരുവശവും മാലിന്യങ്ങൾ അവിടെവിടെയായി കുമിഞ്ഞു കൂടിയിട്ടുണ്ട്.കാശിവിശ്വനാഥ ക്ഷേത്രത്തിലേയ്ക്കുള്ള വഴിയുടെ അവസ്ഥയും വൃത്തിഹീനമാണെന്ന് പറയേണ്ടി വരുന്നതിൽ ഖേദമുണ്ട്.തെരുവുകൾ അലഞ്ഞു നടക്കുന്ന പശുക്കളുടെ വിഹാര കേന്ദ്രമാണ്.ഒപ്പം റിക്ഷാവാലകൾ സൃഷ്ടിക്കുന്ന ഗതാഗതതടസ്സവും. ഇതൊക്കെ ഇനി എന്നു മാറുമോ ആവോ”

“അതേ….. മലയാളം ഇത്രയും ഫ്ലുവന്റ് ആയി എങ്ങനെ പറയുന്നു.”

“അതോ … വീട്ടിൽ ഹിന്ദിയേക്കാൾ തമിഴും മലയാളവും ആണ് ഉപയോഗിക്കുന്നത്. പുസ്തകങ്ങൾ ഒക്കെ ഒരുപാട് വായിച്ചിട്ടുമുണ്ട് അതാവും….”

അവൻ എന്നെയും വലിച്ചു വീണ്ടും മുന്നോട്ട് നടന്നു. എന്നെയും കൊണ്ടു ഒരു തോണിയിൽ കയറി. അത് മുന്നോട്ട് നീങ്ങി. ഒരു പയ്യനാണ് തോണി തുഴയുന്നത്. അവന്റെ വായിക്കുമുണ്ട് പാൻ പരാഗ് പോലെ എന്തോ. പിള്ളേർ വരെ ഇങ്ങനെയാണോ ഇവിടെ.

അവനെന്നെ തട്ടി വിളിച്ചു കാഴ്ചകൾ കാണിച്ചു. നേരത്തെ കണ്ട ഖാട്ടുകൾ ഉൾപ്പടെ നിരവധി ക്ഷേത്രങ്ങൾ തോണിയിൽ ഇരുന്നു കണ്ടു. സത്യത്തിൽ അതായിരുന്നു കൂടുതൽ ഭംഗി.

മണികർണികയുടെ അവിടെ നിന്നും ഉയർന്ന ഒരു തരം ഗന്ധം ഉണ്ടായിരുന്നു. ആ ഗന്ധവും കാഴ്ചകളും എന്നിൽ ഉണർത്തിയ വികാരം ഒരു തരം അത്ഭുതം ആയിരുന്നു. എന്തൊക്കെ കൊള്ളരുതായ്മകൾ കാണിച്ചാലും മനുഷ്യൻ ഇത്രയെ ഉള്ളു എന്ന് മനസ്സിലാക്കി തരുന്ന ഒരു കാഴ്ച്ച. അവിടെ ചെല്ലുന്നവർ ഈ കാഴ്ച കാണാതെ മടങ്ങരുത്. ഭക്തിയും ഭജനയും മാത്രമല്ല മരണവും കാശിയുടെ പ്രത്യേകത ആണ്.

അവരെപ്പറ്റി മരണത്തെ വിറ്റ് ജീവിക്കുന്നവർ എന്നോ മറ്റോ എം.ടി എഴുതിയിരുന്നത് ആണ് എനിക്ക് അപ്പോൾ ഓർമ വന്നത്. മരണത്തെ ആഘോഷം ആക്കുന്നവർ. അതിനായി വരുന്നവർ. എന്തൊക്കെ തരം മനുഷ്യർ. എന്തൊക്കെ തരം വിശ്വാസങ്ങൾ.  ഇന്ത്യയുടെ ആത്മാവ് ഗ്രാമങ്ങളിൽ എന്നത് പോലെ ഇന്ത്യൻ സംസ്കാരത്തിന്റെ ആത്മാവ് ഇത് പോലുള്ള സ്ഥലങ്ങളിൽ ആണെന്ന് ഞാൻ മനസ്സിലാക്കി.

അവൻ എന്റെ കയ്യിലേക്ക് മിച്ചർ പോലുള്ള ഒരു സാധനം തന്നിട്ട് അതു കൈ വെള്ളയിൽ വെച്ചു പുറത്തേക്ക് നീട്ടി പിടിക്കാൻ പറഞ്ഞു. ഞാനത് പോലെ നീട്ടി പിടിച്ചപ്പോൾ അവൻ ഒരു ശബ്ദം ഉണ്ടാക്കി. കിളികൾ പറന്നു വന്നു കയ്യിൽ നിന്നും അത് കൊത്തി തിന്നാൻ തുടങ്ങി.  അല്പം ഇക്കിളി ഒക്കെ എടുത്തു എങ്കിലും ഞാൻ കൈ നീട്ടി തന്നെ പിടിച്ചിരുന്നു.

ആ പയ്യൻ അഞ്ഞൂറ് രൂപയാണ് ചാർജ് പറഞ്ഞത് എങ്കിലും അവൻ നാനൂറ് കൊടുത്തു ഒതുക്കി. ഞങ്ങൾ തോണി കരയ്ക്ക് അടുത്തപ്പോൾ ഇറങ്ങി മുകളിലേക്ക് നടന്നു.