??സേതുബന്ധനം 4 ?? [M.N. കാർത്തികേയൻ] 355

അവൻ എനിക്ക് ഗംഗയുടെ പടിക്കെട്ടുകൾ കാണിച്ചു തന്നു കൊണ്ടു പറഞ്ഞു.

“ഈ പടിക്കെട്ടുകൾ ആണ് ഖാട്ടുകൾ. മൊത്തം തൊണ്ണൂറോളം ഖാട്ടുകൾ ഉണ്ട്. ഓരോന്നും പറഞ്ഞു തരാം.

“ദശാശ്വമേധ് ഘാട്ട്, മണികർണിക ഘാട്ട്,പഞ്ചാഗ്നിഘാട്ട്,തുളസിഘാട്ട്,ഹരിശ്ചന്ദ്ര ഘാട്ട്,”എന്നിങ്ങനെ നിരവധി പേരുകളിലാണ് അറിയപ്പെടുന്നത്.

ദശാശ്വമേധ് ഘാട്ട്

അപ്രത്യക്ഷനായ പരമശിവനെ കണ്ടെത്തുന്നതിനായി ബ്രഹ്മാവ് പത്തു കുതിരകളെ വച്ച് യാഗം നടത്തിയ സ്ഥലമാണ് ദശാശ്വമേധ് ഘാട്ട്.”പ്രകാശനഗരം “എന്നു വാരണാസിക്കു പേര് നേടിക്കൊടുത്ത ഗംഗാ ആരതി നടക്കുന്നത് ദശാശ്വമേധ് ഘാട്ടിലാണ്.ഭക്തിസാന്ദ്രമായ സന്ധ്യയിൽ ഭഗവത്കീർത്തന ലഹരിയിൽ നിരവധി വിളക്കുകളുമായി പൂജാരികൾ ഗംഗയ്ക്ക് ആരതി നടത്തുമ്പോൾ ദീപനാളങ്ങൾ ഗംഗയെ അതിമനോഹരിയാക്കുന്ന കാഴ്ച്ച കാണേണ്ടതു തന്നെയാണ്.

അസി ഘാട്ട്

അസി നദി ഗംഗയിൽ സംഗമിക്കുന്ന ഇടമാണ് അസിഘട്ട്.പുണ്യപുരാണങ്ങളിൽ പരാമർശിച്ചിരിക്കുന്ന അസിഘാട്ട് വിദേശികൾക്ക് ഏറെ പ്രീയപ്പെട്ടതാണ്. ശുംഭനിശുംഭൻമാരെ വധിച്ച ശേഷം ദുർഗാദേവി വാൾ ഉപേക്ഷിച്ച സ്ഥലമാണത്രേ അസിഘട്ട്. ബോധിവൃക്ഷവും അതിനു കീഴിലുള്ള ശിവലിംഗവും പ്രതിഷ്ഠയായുള്ള അസി സംഗമേശ്വരക്ഷേത്രത്തിൽ തൊഴുതു മടങ്ങാം.

മണികർണിക ഘാട്ട്

ഇരുപത്തിനാലു മണിക്കൂറും.ചിതയെരിഞ്ഞു കൊണ്ടിരിക്കുന്ന മണികർണിക ഘാട്ട് മരണമെന്ന വലിയ സത്യത്തിന്റെ അവശേഷിപ്പാണ്.ദൂരദേശങ്ങളിൽ നിന്നും പോലും ശവങ്ങൾ ദഹിപ്പിക്കാനായി ഇവിടെയ്ക്കെത്തുന്ന കാഴ്ച്ച അമ്പരപ്പിക്കുന്നതാണ്. ഇതിനായി പ്രത്യേക എയർ ആംബുലൻസ്,ബസ് സർവീസുകൾ നടത്തുന്ന അനവധി ഏജൻസികളുമുണ്ട്!മണികർണികാഘട്ടിലെ ലോഡ്ജുകളിൽ നിരവധി പേരാണ് മരണം കാംക്ഷിച്ച് വർഷങ്ങളായി മുറിയെടുത്തു താമസിക്കുന്നത്.ഇവിടെ ദഹിപ്പിച്ചാൽ പുനർജ്ജന്മമുണ്ടാവില്ലെന്നും,ഭഗവത് പാദങ്ങളിൽ ലയിച്ചു ചേരുമെന്നും വിശ്വാസം.