🔰🏇സേതുബന്ധനം 3 🚩👑 [M.N. കാർത്തികേയൻ] 403

“എന്താ അച്ഛനെ ധിക്കാരിക്കാൻ വയ്യാത്തത് കൊണ്ട് ആണോ. അതോ ഇനി വല്ല പെണ്ണും ഉള്ളിൽ കയറി കൂടിയോ?”

സത്യത്തിൽ അവനോടു എങ്ങനെ ഇത് ചോദിച്ചു എന്നെനിക്ക് അറിയില്ല. ചുരുങ്ങിയ സമയം കൊണ്ട് തന്നെ എന്നെ അവനുമായി അടുപ്പിക്കുന്ന എന്തോ ഒന്ന് ഉണ്ട്. അതേതോ മുജ്ജന്മ ബന്ധം ആകാം. അവനോടു എനിക്ക് അടുത്തിടപഴകാനും നല്ലവണ്ണം സംസാരിക്കാനും കഴിയുന്നു. എന്താ കാരണം എന്നെനിക്ക് അറിയില്ല.

എന്റെ ചോദ്യം അവനിൽ ഒരു പുഞ്ചിരി വിടർത്തി. ആ ചിരിക്ക് വല്ലാത്ത ഒരു ചന്തം ആയിരുന്നു. അവൻ കടലിലേക്ക് നോക്കി ദീർഘ നിശ്വാസം എടുത്തു. ശേഷം എന്റെ നേർക്ക് തിരിഞ്ഞു. അവന്റെ കണ്ണുകളിലെ കാന്തിക ശക്തിയും ആ തിളക്കവും എന്നെ പിടിച്ചു ഉലച്ചു. ലോകം മുഴുവൻ അവന്റെ കണ്ണുകളിലൂടെ എനിക്ക് കാണാനാകും. ചുറ്റുമുള്ള ഒന്നും എന്നെ അലട്ടുന്നില്ല. അവയൊന്നും ഞാൻ കാണുന്നില്ല എന്നതാണ് സത്യം. എന്റെ മുന്നിൽ അവന്റെ കണ്ണുകൾ മാത്രം. എന്റെ കണ്ണുകളിലേക്ക് നോക്കി അവൻ പറഞ്ഞു തുടങ്ങി.

“ടീച്ചർ വിചാരിച്ചത് ശെരിയാ.. എനിക്ക് ഒരു പെണ്കുട്ടിയെ ഇഷ്ടമാണ്”

അവന്റെ വാക്കുകൾ എന്നെ ഉണർത്തി. ഉള്ളിൽ എന്തോ ഒരു വേദന ഉണ്ടാകുന്നത് ഞാനറിഞ്ഞു. എങ്കിലും അത് കടിച്ചമർത്തി മുഖത്തു ഒരു വിളറിയ ചിരി ഞാൻ വരുത്തി.

“ആരാ ആൾ…..” തൊണ്ട ഇടറാതെ ആ ചോദ്യം ഞാൻ ചോദിച്ചു.