??സേതുബന്ധനം 3 ?? [M.N. കാർത്തികേയൻ] 403

സേതു ഏതോ സ്വപ്നലോകത്തിൽ ആയിരുന്നു. ലോകം കീഴടക്കിയ സന്തോഷം. ആശ്രയം എത്തിയത് അവൻ അറിഞ്ഞില്ല. മൂളിപ്പാട്ടും പാടി ചുണ്ടിൽ ഒരു ചെറു ചിരിയും ആയി പടി കയറി വരുന്ന സേതുവിനെ അച്ഛൻ അത്ഭുതത്തോടെ നോക്കി.

“എന്താടാ ഇത്ര സന്തോഷം?”

“ഏയ് ഒന്നൂല്ല. ചുമ്മാ ഒരു സന്തോഷം”

“ഉവ്വ. വിശ്വസിച്ചു. ആ പെണ്ണ് ഏതാ എന്നു കൂടി പറഞ്ഞിട്ട് പോ”

“പെണ്ണോ ഏത് പെണ്ണ്. അച്ഛനിതെന്തൊക്കെയാ പറയുന്നത്. എനിക്കൊന്നും മനസ്സിലാകുന്നില്ല”

ഉള്ളിൽ വന്ന ആശ്ചര്യം പുറത്തു കാണിക്കാതെ അവൻ പറഞ്ഞൊപ്പിച്ചു.

“ടാ മോനെ നീ കിടന്നു ഉരുളണ്ട. നിന്റെ മുഖം കണ്ടാൽ എനിക്ക് കാര്യം മനസ്സിലാവും.ഞാനൊക്കെ ഈ പ്രായം കഴിഞ്ഞാ വന്നത്. അതോണ്ട് സംഗതി തെളിച്ചു പറഞ്ഞിട്ട് പോയാൽ മതി.”

“ഹോ ഇത് വരെ ആരും പറയാത്ത ഫ്രഷ് ഡയലോഗ്. ഈ പ്രായം കഴിഞ്ഞു വന്നു എന്ന ക്ളീഷേ ഡയലോഗ് മാറ്റാറായില്ലേ”

“മോനെ വിഷയം മാറ്റാതെ ആളാരാണെന്നു പറ”

“എന്റെ ടീച്ചറാണ്. പേര് ആയിഷ.”

അവനൊരു കള്ളച്ചിരിയോടെ മറുപടി നൽകി.

“ടാ മതമൊന്നും പ്രശ്നമല്ല നമുക്ക്. പക്ഷെ പ്രായം നിന്നെക്കാൾ കൂടുതൽ അല്ലേടാ.”

“അത് നല്ലതല്ലേ. ഒരു കെയറിങ് ഒക്കെ ഉണ്ടാവും. മാത്രമല്ല സച്ചിൻ കെട്ടിയത് പ്രായം കൂടിയ പെണ്ണിനെ അല്ലേ”

“ഹോ ആരും പറയാത്ത ഫ്രഷ് ഡയലോഗ്. എടാ പ്രായത്തിൽ മുതിർന്ന പെണ്ണിനെ പ്രേമിക്കുന്ന എല്ലാവനും പറയുന്ന ഡയലോഗ് ആണിത്. ഈ ക്ളീഷേ മാറ്റാറായില്ലേ മോനെ”.

“ഓ അവസാനം നമുക്കിട്ട് ഒന്നു വെച്ചല്ലേ…”

“പോടാ… പോയി വല്ലോം കഴിച്ചിട്ട് കിടന്നുറങ്ങാൻ നോക്ക്.”

സേതു ചിരിയോടെ റൂമിലേക് പോയി. ഡ്രസ് ഒക്കെ മാറ്റി ആഹാരവും കഴിച്ചു അവൻ കിടന്നുറങ്ങി.