??സേതുബന്ധനം 3 ?? [M.N. കാർത്തികേയൻ] 403

“ഉവ്വ്. കണ്ടിട്ടുണ്ട്. അതൊക്കെ കാണാതെ പോയാൽ വലിയ നഷ്ടമല്ലേ. കമൽ ഹാസൻ എന്ന ലെജൻഡ് ഒരു ജീനിയസ് കൂടിയാണ് എണ്ണടയാളപ്പെടുത്തുന്ന പടം. എന്റെ ഫേവറിറ്റ് ലിസ്റ്റിൽ ഉണ്ട്. അത് പോട്ടെ. അപ്പൊ നമ്മൾ നമ്മുടെ മനസ്സിലെ നന്മയെ വിശ്വസിച്ചാൽ ദൈവവിശ്വസി ആയി എന്നാണോ അർത്ഥം.”

“തീർച്ചയായും. ഒരാൾ ദൈവമാകുന്നത് എപ്പോഴാണ് എന്നറിയാമോ. അന്യന്റെ സന്തോഷത്തിനു കാരണമാകുമ്പോൾ. കുഷ്ഠ രോഗികളുടെ കണ്ണീർ ഒപ്പിയ മദർ തെരേസയും പാവപ്പെട്ടവരെ സഹായിക്കുന്ന സാമൂഹ്യ പ്രവർത്തകയും ഒക്കെ ദൈവങ്ങൾ ആണ്. പൂജാമുറിയിൽ അല്ല സഹായം സ്വീകരിച്ചവരുടെ ഹൃദയത്തിൽ ആണ് അവരെ ദൈവത്തിന്റെ സ്ഥാനം നൽകി വെച്ചിരിക്കുന്നത് എന്നേ ഉള്ളു. ശബരിമലയിൽ തത്വമസി എന്നെഴുതി വെച്ചിരിക്കുന്നത് കണ്ടിട്ടില്ലേ. അത് നീ ആകുന്നു എന്നാണ് അതിന്റെ അർത്ഥം. പോട്ടെ ശ്രീനാരായണ ഗുരുവിന്റെ കണ്ണാടി പ്രതിഷ്ഠ കേട്ടിട്ടില്ലേ. നമ്മൾ വണങ്ങാൻ നിൽക്കുമ്പോൾ ആ കണ്ണാടിയിലൂടെ സ്വന്തം പ്രതിബിംബം തന്നെ കാണാനാകും. അതിലൂടെ അദ്ദേഹം ഉദ്ദേശിച്ചത് നീ തന്നെയാണ് നിന്റെ ഈശ്വരൻ. നിന്നിലാണ് ആത്മാവും ചൈതന്യവും. അത് നീ തന്നെ തിരിച്ചറിയുക എന്നതാണ്. അത് തിരിച്ചറിയുമ്പോൾ നമ്മളിൽ പൂര്ണതയുടെ പ്രകാശം വീഴും. അത് തിരിച്ചറിഞ്ഞാലെ മതത്തെയും വിശ്വാസത്തെയും മുതലെടുത്ത് ജീവിക്കുന്ന ചിലരൊക്കെ നന്നാവൂ.