??സേതുബന്ധനം 3 ?? [M.N. കാർത്തികേയൻ] 403

സ്വാമി പുറത്തേക്ക് ഇറങ്ങി വന്നു.

“എന്താ സാറിന്റെ മുഖം ഒക്കെ വല്ലാതെ ഇരിക്കുന്നത്. ” സ്വാമി ചോദിച്ചു.

“അത്… അത് പിന്നെ സ്വാമി പറഞ്ഞത് പോലെ തന്നെ സംഭവിച്ചു. അവർ.. അവർ മരിച്ചു. അല്ല… കൊല്ലപ്പെട്ടു….”

“ഹഹ്ഹഹാഹഹഹ്ഹ ……. ഞാൻ പറഞ്ഞില്ലേ അവനെ വിലകുറച്ചു കാണരുത് എന്ന്. അവന്റെ നിഴൽ വീണാൽ അതിനർത്ഥം മരണം പുൽകി എന്നാണ്.”

“പക്ഷെ സ്വാമിക്ക് അയാളെ എങ്ങനെ അറിയാം. ഇതൊക്കെ മുൻകൂട്ടി എങ്ങനെ മനസ്സിലായി. ഇത് വേറെ ആരോ ചെയ്തത് ആണ്. അവനെ കൊണ്ട് ഒറ്റക്ക് എന്തായാലും പറ്റില്ല. പത്തു മുപ്പത് പേരും ആയാണ് കുര്യച്ചൻ പോയത്. പക്ഷെ ബാക്കി ഉള്ളവരെ ഒന്നും കിട്ടിയിട്ടില്ല. പത്രത്തിൽ ഒന്നും മെൻഷൻ പോലും വന്നിട്ടില്ല. അവരൊക്കെ എങ്ങോട്ട് പോയി. അത്ര പേരെ ഇവൻ ഒറ്റക്ക് എന്ത് ചെയ്യാൻ ആണ്. ആരെങ്കിലും സഹായിച്ചു കാണും. വന്യ മൃഗത്തിന്റെ ആക്രമണം എന്നല്ലേ പറഞ്ഞത്. അവൻ അല്ലെന്ന് അപ്പൊ ഉറപ്പായില്ലേ. പക്ഷെ അവർ മരിക്കുമെന്ന് സ്വാമി ഉറപ്പിച്ചു പറഞ്ഞത് എങ്ങനെ എന്നതാണ് ഇപ്പോഴും എനിക്ക് സംശയം”

കുറഞ്ഞ സമയത്തിൽ ഒറ്റ ശ്വാസത്തിൽ ഒരു കെട്ട് ചോദ്യങ്ങൾ ദിവാകരൻ ചോദിച്ചു.

എല്ലാം കേട്ട സ്വാമി ഒന്നു ചിരിച്ചു കൊണ്ട് ചോദിച്ചു.

“തനിക്ക് അക്ഷോഹിണി സേന എന്താ എന്നറിയാമോ?”

“പണ്ട് മഹാഭാരതം സീരിയലിൽ കേട്ടിട്ടുണ്ട്. ഒരു പഴയ കാല സൈനിക വ്യൂഹമല്ലേ.”

“അതേ.. അതിന്റെ കണക്ക് അറിയാമോ?”

ഇല്ലെന്ന അർഥത്തിൽ ദിവാകരൻ ചുമൽ വെട്ടിച്ചു. ഗംഗാധരൻ ഡോക്ടറും അറിയില്ല എന്ന അർഥത്തിൽ മിണ്ടാതെ ഇരുന്നു.

“പ്രാചീനഭാരതത്തിലെ വലിയ ഒരു സേനാവിഭാഗം ആണത്.
21870 ആന, അത്രയും തന്നെ രഥം, അതിന്റെ മൂന്നിരട്ടി (65,610) കുതിര, അഞ്ചിരട്ടി (109,350) കാലാൾ എന്നിവ അടങ്ങിയ സൈന്യം.”

“ആ… അതിവിടെ പറഞ്ഞത് എന്തിനാ”

“താൻ മുഴുവൻ കേൾക്കടോ തോക്കിൽ കേറി വെടി വെക്കാതെ.”