പ്രണയിച്ചിട്ടുണ്ടോ? ഇരുപത്തി നാല് മണിക്കൂറും അവളെ മനസ്സിലിട്ടു താലോലിച്ചിട്ടുണ്ടോ?പ്രണയം ആണ് ദേവി എനിക്ക് നിന്നോട് എന്ന് ആയിരം പ്രാവശ്യം പറഞ്ഞിട്ടുണ്ടോ?

നീയും അവളും മാത്രം ഉള്ളപ്പോൾ കൊച്ചു കുട്ടികൾ ആയി മാറിയിട്ടുണ്ടോ?

അവളുടെ സ്വഭാവത്തെയും അവളുടെ രൂപത്തിനെയും ആരാധിക്കുമ്പോൾ അവളുടെ കണ്ണുകൾ പിടക്കുന്നത് കണ്ടിട്ടുണ്ടോ?

എനിക്ക് നീ ഇല്ലാതെ പറ്റില്ല.. എന്ന് പറയുമ്പോൾ അവളുടെ മുഖത്തേക്ക് ചോര ഇരച്ചു കയറി ആ അധരങ്ങൾ വിറക്കുന്നത് കണ്ടിട്ടുണ്ടോ?

കയ്യിൽ കോരി എടുത്തു നെഞ്ചോടു ചേർത്ത് പിടിക്കുമ്പോൾ അവൾ ഹൃദയതാളം പിടിക്കാൻ ചെവി നെഞ്ചിനോട് ചേർത്ത് വെക്കുന്നത് ശ്രദ്ധിച്ചിട്ടുണ്ടോ?

ഇഷ്ടപെട്ടത് വാങ്ങി കൊടുക്കുമ്പോഴും അവൾക്ക് ഇഷ്ടപെട്ട കാഴ്ചകൾ കാണിക്കാൻ കൊണ്ടുപോകുമ്പോഴും അവൾ ഒരു കൊച്ചു കുട്ടി ആയി മാറുന്നത് ശ്രദ്ധിച്ചിട്ടുണ്ടോ?

യാമങ്ങളിൽ അവളുടെ നഗ്നമേനി അടി മുതൽ മുടി വരെ ചുംബിച്ചു ഉണർത്തുമ്പോൾ അവളുടെ കൂമ്പിയ കണ്ണുകളിലെ പ്രേമം കണ്ടിട്ടുണ്ടോ?

അവൾ പനി പിടിച്ചു വിറച്ചു കിടക്കുമ്പോൾ അവൾ പുതച്ചിരുന്ന കമ്പിളിയുടെ അടിയിൽ കയറുമ്പോൾ “പനി പകരും” എന്ന് ക്ഷീണിച്ച ശബ്ദത്തിൽ അവൾ പറയുമ്പോൾ “എന്നാൽ നമുക്ക് ഇതുപോലെ കുറെ ദിവസം കിടക്കാമല്ലോ ദേവി “ എന്ന് പറഞ്ഞു അവളുടെ കഴുത്തിലേക്ക് മുഖം പൂഴ്ത്തുമ്പോൾ അവളുടെ ഹൃദയത്തിന്റെ ചലനം ശ്രദ്ധിച്ചിട്ടുണ്ടോ?

സുഖമില്ലാതെ കിടക്കുമ്പോൾ ഊണും ഉറക്കവും ഇല്ലാതെ അവൾ ഒരു അമ്മ ആകുന്നത് ശ്രദ്ധിച്ചിട്ടുണ്ടോ?

അവൾ വിളമ്പുന്ന ഭക്ഷണത്തിൽ സ്നേഹം ചാലിച്ച് എടുത്തു തരുമ്പോൾ “നന്നായി…” എന്ന് പറയുന്നത് കേൾക്കാൻ വേണ്ടി അവൾ കാതു കൂർപ്പിക്കുന്നതു കണ്ടിട്ടുണ്ടോ? ആ മുഖം തുടുക്കുന്നത് കണ്ടിട്ടുണ്ടോ?

അടുക്കളയിൽ പോയി പുറകിൽ നിന്നും അവളുടെ വയറിൽ ചുറ്റി പിടിച്ചു കഴുത്തിന്റെ പുറകിൽ ചുംബിച്ചു അവളുടെ വിയർപ്പു മണം ആസ്വദിച്ചിട്ടുണ്ടോ?

അടുക്കളയിൽ അവളെ സഹായിക്കുമ്പോൾ ആ സന്തോഷവും ആരാധനയും നിറയുന്ന മുഖം കണ്ടിട്ടുണ്ടോ?

ഒൻപതു മാസം നമ്മുടെ കുട്ടിയെ വയറ്റിൽ ഇട്ടു, തട്ടാതെയും മുട്ടാതെയും ഉറക്കം വരെ നഷ്ടപ്പെടുത്തി അവസാനം ദേഹം നുറുങ്ങുന്ന വേദന സഹിച്ചു കുട്ടിയെ പ്രസവിച്ചു, സ്വന്തം ഇഷ്ടങ്ങൾ മാറ്റി, ഉറക്കം മാറ്റി കൊച്ചു വാവയെ പരിചരിക്കുമ്പോൾ അവൾ പരാതി പറയാത്തത് ശ്രദ്ധിച്ചിട്ടുണ്ടോ?