ദുർഗ്ഗ [മാലാഖയുടെ കാമുകൻ] 2183

“പോകാം ഏട്ടാ….”അവൾ ബാഗും എടുത്തു വന്നു അവരോടു യാത്ര ചോദിച്ചു.. ഞാനും..

വീട്ടിൽ എത്തി അമ്മ അവളെ ഓടി വന്നു കെട്ടിപിടിച്ചു ഉമ്മ കൊടുത്തു.. അച്ഛനും വന്നു അവളെ സ്നേഹത്തോടെ നോക്കി നിന്നപ്പോൾ ആണ് അവൾ എത്രത്തോളം ഇവരുടെ ഉള്ളിൽ കയറിയിരുന്നു എന്ന് എനിക്ക് മനസിലായത്..

ഞാൻ കുളിച്ചു ഒരു മുണ്ടും ബനിയനും ഇട്ടു മെല്ലെ ബെഡിൽ ചാരി ഇരുന്നു.. അവൾ ഒരു ചായയും കൊണ്ട് വന്നു എനിക്ക് തന്നു..

ഞാൻ അവളെ ബെഡിൽ പിടിച്ചു ഇരുത്തി.. യാത്ര ക്ഷീണം ഉണ്ടെങ്കിലും സൗന്ദര്യത്തിനു ഒരു കുറവും ഇല്ല..

“ലക്ഷ്‌മി.. അയ്യോ അല്ല ദുർഗ്ഗെ…..”

എന്റെ നാക്ക് പിഴച്ചു.. അവൾ കണ്ണ് ഉരുട്ടി..

“പൊന്നു മോളെ.. അച്ഛനോട് അവളുടെ കാര്യം പറഞ്ഞിരുന്നു.. അതാണ് വായിൽ വന്നത്….”

ഞാൻ അല്പം പേടിയോടെ അവളോട് പറഞ്ഞു. സംഗതി നമ്മൾ ഭർത്താക്കന്മാർ ആണെങ്കിലും ഇവരെ കുറച്ചു പേടിക്കണം.. കയ്യിൽ തിളച്ച ചായ ആണ്. അതെങ്ങാനും എടുത്തു കണ്ണിൽ ഒഴിച്ചാലോ?

“എന്ത് പറഞ്ഞു എന്ന്?”

ഗൗരവം ആണ്..

“അവളോട് ക്ഷമിക്കണം എന്ന്….”

“ഓഹോ… അപ്പൊ എന്റെ കാര്യം എന്തെങ്കിലും പറഞ്ഞോ?”

“മ്മ്മ്.. പറഞ്ഞു…”

“എന്ത്?”

“ഇവളെ വേഗം വന്നു വിളിച്ചു കൊണ്ട് പൊക്കോ എന്ന്…”

“ഡാ ദുഷ്ട്ടാ…..”

അവൾ ചായ വാങ്ങി മേശപ്പുറത്തു വച്ച് എന്റെ നേരെ ചാടി… എന്റെ കൈ പിടിച്ചു മാറ്റി എന്റെ കവിളിൽ ആണ് കടി കുടുങ്ങിയത്‌…

“ഇനി പറയോ?”

അവൾ കടി വിടാതെ എന്നോട് ചോദിച്ചു…

“ഡീ പോത്തേ.. പൊന്നെ.. ആഹ്ഹ്ഹ്…”

ഞാൻ അലറി.. നല്ല വേദന ഉണ്ടായിരുന്നു.. അവൾ കടി വിട്ടു..

“ഇനി പറയോ? പറഞ്ഞാൽ കടി വേറെ ഇടത്ത് ആയിരിക്കും…”

അവൾ പുരികം പൊക്കി..

“പൊന്നു വാവേ.. ഇല്ല…”

ഞാൻ കൈകൂപ്പി കാണിച്ചു….