💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

” ആരാ അവര് ? എന്തിനാ തന്നെ പിടിച്ചോണ്ട് പോവാൻ നോക്കിയെ ? ”

അവൻ അവളോട് ചോദിച്ചു …

” അവർ ആരെന്ന് എനിക്കറിയില്ല … എന്റെ വണ്ടിയുടെ മുന്നിൽ കൊണ്ട് കാറ് നിർത്തിയ ശേഷം എന്നെ പിടിച്ചോണ്ട് പോവാൻ നോക്കു വായിരുന്നു . ഒരു പാട് നന്ദിയുണ്ട് . നിങ്ങൾ വന്നില്ലായിരുന്നെങ്കിൽ എന്നെ അവന്മാർ … ”

അവളതും പറഞ്ഞ് പൊട്ടിക്കരഞ്ഞു .

” ഏയ് …. കരയല്ലേ … അതിനൊന്നും സംഭവിച്ചില്ലല്ലോ ….. തന്റെ വീട് ഇവിടെ അടുത്താണോ ? ”

അവനവളോട് ചോദിച്ചു …

“അല്ല … വീട് കുറച്ച് ദൂരെയാ …. പഠിത്തത്തിന്റെ ആവശ്യത്തിന് ഇപ്പൊ ഇവിടെ അടുത്ത് കുറച്ച് കൂട്ടുകാരികളോടൊപ്പം ഒരു വാടക വീട്ടിലാ താമസം , ഇവിടുന്ന് രണ്ട് മൂന്ന് കിലോമിറ്റർ ദൂരമുണ്ട് . ”

അവൾ മറുപടി പറഞ്ഞു …. അവളുടെ ശബ്ദത്തിൽ ഭയം നിഴലിച്ച് നിന്നിരുന്നു …

” ആ എങ്കിൽ വേഗം വീട്ടിൽ പോകാൻ നോക്ക് . നാളെ പോലീസ് സ്റ്റേഷനിൽ ചെന്ന് ഒരു പരാതി കൊടുത്താൽ മതി …. ശ്ശെ … അവന്മാരുടെ വണ്ടി നമ്പർ നോട്ട് ചെയ്തില്ല … കുഴപ്പമില്ല പോലീസിന് അവരെ കണ്ടെത്താൻ വേറെയും വഴികൾ ഉണ്ടല്ലോ …. ശരി പൊയ്ക്കോളു …. ”

” താങ്ക്സ് …. ”

ഒരു പുഞ്ചിരിയോടെ കൈകൂപ്പി പറഞ്ഞ ശേഷം അവൾ സ്കൂട്ടിയിൽ കയറി സ്റ്റാർട്ട് ചെയ്യാൻ നോക്കി , പക്ഷെ എത്ര ശ്രമിച്ചിട്ടും അത് സ്റ്റാർട്ടായില്ല ….