💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

ആ നിമിഷം തന്നെ അജു അയാളുടെ ഷർട്ടിന്റെ കോളറിൽ പിടിച്ച് അയാളെ കാറിൽ നിന്ന് പുറത്തേയ്ക്ക് വലിച്ചിട്ട് ശക്തമായി നെഞ്ചിൽ ചവിട്ടാൻ തുടങ്ങി . ഉടനെ കാറിന്റെ മറ്റ് ഡോറുകൾ തുറന്ന് മൂന്ന് നാലു പേർ കൂടി പുറത്തേയ്ക്കിറങ്ങി , ആ സമയം തന്നെ ഭയത്തോടെ ആ യുവതിയും കാറിൽ നിന്ന് പുറത്തിറങ്ങി .

നിലത്ത് കിടക്കുന്നവന്റെ നെഞ്ചിലേയ്ക്ക് ശക്തിയായി ചവിട്ടുന്നതിനിടയിൽ ഒരുത്തൻ വന്ന് അജുവിനെ പുറകിൽ നിന്ന് പിടിച്ച് ലോക്ക് ചെയ്യാൻ ശ്രമിച്ചതും അവനെയും കൊണ്ട് അൽപം പുറകിലേയ്ക്ക് ശക്തിയിൽ നീങ്ങി അവനെ കാറിന്റെ ഒരു ഭാഗത്തായി കൊണ്ടിടിച്ചു .. പിടി ഒന്നയഞ്ഞതും അജു വേഗം അവന്റെ വലത് കയ്യിൽ പിടിച്ച് പുറകിലേയ്ക്ക് വലിച്ച് ശക്തിയിൽ തിരിച്ചു …. അയാളുടെ കൈ പൊട്ടുന്ന ശബ്ദവും ഒപ്പം ഒരു നിലവിളിയും അവടെ ഉയർന്നു ….

വേറെ ഒരുത്തൻ തന്റെ നേരെ വരുന്നത് കണ്ടതും അജു വേഗം കാറിന്റെ ബോണറ്റിൽ കൈ കുത്തി ഉയർന്ന് കറങ്ങി വന്നവന്റെ നെഞ്ചത്ത് ആഞ്ഞ് ചവിട്ടി , ചവിട്ടു കൊണ്ടവൻ പുറകിലേക്ക് മറിഞ്ഞ് റോഡിൽ ചെന്ന് വീണു ….

ഉടനെ മറ്റൊരുത്തൻ കാറിന്റെ പുറകിലെ ഡിക്കി തുറന്ന് അതിൽ നിന്ന് ഒരു ഹോക്കി സ്റ്റിക്ക് കയ്യിലെടുത്തു . അജുവിന്റെ നേരെ ഓടി വന്ന് അവൻ തല ലക്ഷ്യമാക്കി സ്റ്റിക്ക് വീശിയതും അജു പെട്ടെന്ന് പുറകിലേയ്ക്ക് വളഞ്ഞ് ആ നീക്കത്തിൽ നിന്നും ഒഴിഞ്ഞ് മാറിയ ശേഷം വേഗം അവന്റെ കയ്യിൽ കയറി പിടിച്ചു …
അയാൾ സ്റ്റിക്ക് പിടിച്ചിരുന്ന ആ കയ്യുടെ കൈപ്പത്തിക്ക് താഴെയായി ശക്തമായി പിടിച്ച് തിരിച്ചതും അയാൾ വേദന കൊണ്ട് അലറി , അയാളുടെ കയ്യിൽ നിന്നും സ്റ്റിക്ക് താഴേയ്ക്ക് വീഴാൻ പോയതും അജു വേഗം അത് കയ്യിലാക്കി .