💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അജു ഒന്നാലോചിച്ചു ശേഷം ഓഫായി കിടന്ന ഫോൺ അവൻ ഓണാക്കി , അൽപ്പം ചാർജ് ബാക്കിയുണ്ട് . അവൻ നേരെ പ്രണവ് ഇന്നലെ വിളിച്ച നമ്പരിലേയ്ക്ക് തിരിച്ച് വിളിച്ചു , പക്ഷെ ആ നമ്പർ നിലവിലില്ല എന്നാണ് അവനറിയാൻ കഴിഞ്ഞത് ….

അവൻ വേഗം ബുള്ളറ്റ് സ്റ്റാർട്ട് ചെയ്ത് വേഗത്തിൽ മുന്നോട്ട് കുതിച്ചു . നേരെ പോയത് ഇന്നലെ അവനെ ചതിച്ച് കൊണ്ട് പോയ ആ വീട്ടിലേക്കായിരുന്നു …. റോഡിന് വശത്തായി ബുള്ളറ്റ് നിർത്തിയ ശേഷം അവനിറങ്ങി മുന്നോട്ട് നടന്നു …. പക്ഷെ ഇപ്പോൾ ഗേറ്റ് ഉൾപ്പെടെ പുറത്ത് നിന്ന് പൂട്ടിയിരിക്കുകയാണ് …. അവനവിടെ നിന്ന് ചുറ്റും നോക്കി ….

” എന്താ നോക്കുന്നേ … ?”

അതുവഴി പോയ ഒരാൾ അവനോട് ചോദിച്ചു .

” അല്ല ഈ വീട്ടിലുള്ളവരെ ഒന്ന് കാണാൻ …. ”

അവൻ മറുപടി പറഞ്ഞു .

” അതിന് അവരാരും ഇവിടെ ഇല്ലല്ലോ വർഷങ്ങളായി വിദേശത്താ ….. വല്ല ആണ്ടിലും ആരോ വന്ന് ഒന്ന് വൃത്തിയാക്കിയിട്ടിട്ട് പോവും …. ഇതിപ്പൊ നാട്ടിലെ ചെറുപ്പക്കാരുടെ വെള്ളമടി സ്ഥലമാ , അയൽപ്പക്കത്തുള്ളവർക്ക് ശല്യം ഉണ്ടാക്കാനായിട്ട് . ആരോട് പറയാൻ ….. ആ വീട്ട്കാരെ അറിയിക്കാം എന്ന് വച്ചാൽ എങ്ങനെ അറിയിക്കും ….. ”

അയാളത്രയും പറഞ്ഞ് നടന്ന് നീങ്ങി ….
അജുവിന് ഒന്നും മനസ്സിലായില്ല ….

‘ഇന്നലെ അവൾ വീടിന്റെ ഒർജിനൽ കീ ഉപയോഗിച്ചല്ലേ ഡോർ തുറന്നത് ‘

അവൻ സ്വയം ചിന്തിച്ചു , ഒടുവിലവന് ഉത്തരവും ലഭിച്ചു ….