💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

” അവൻ എവിടെ ടാ …. ? ”

മഹേന്ദ്രനാഥ് ദേഷ്യത്തോടെ ചോദിച്ചു …

” എനിക്കറിയില്ല … എനിക്കൊന്നുമറിയില്ല … അവൻ എന്നെയും പറ്റിക്കുകയായിരുന്നു . ”

ഭയത്തോടെ അവൻ മറുപടി പറഞ്ഞു …..

                           …………………………

അജു പതിയെ കണ്ണ് തുറന്നു , തലയാകെ ഒരു തരം പെരുപ്പ് പോലെയാണവന് അനുഭവപ്പെട്ടത് , ഡ്രഗ്സിന്റെ എഫക്ട് പൂർണ്ണമായും അവനെ വിട്ട് മാറിയിരുന്നില്ല . എന്തോ ഓർമ്മ വന്നതു പോലെ അവൻ നിലത്ത് നിന്നെണീറ്റ് ചുറ്റും നോക്കി ….

‘ അതെ ആ വീട് തന്നെ …. ‘

അവൻ സ്വയം പറഞ്ഞു . പക്ഷെ ഇപ്പോൾ അവൻ ബോധമറ്റ് കിടന്നിരുന്നത് ആ വീടിന്റെ സിറ്റ് ഔട്ടിലാണ് …. അവൻ വേഗം എണീറ്റ് വീടിന്റെ മുന്നിലെ ഡോർ തുറക്കാൻ നോക്കി പക്ഷെ അത് ലോക്ക് ആയിരുന്നു , അവിടെ മഴുവൻ അവൻ നോക്കി പക്ഷെ ആരും ഉണ്ടായിരുന്നില്ല .

” ഇന്നലെ ….. ജെന്നി . ജെന്നിഫർ കൂൾ ഡ്രിംഗ്സ് തന്നു …. പിന്നെ എന്താ ….. എന്താ സംഭവിച്ചേ ….? ”

അവൻ തല പുകഞ്ഞ് ആലോചിച്ചു പക്ഷെ അവന് ഒന്നും ഓർത്തെടുക്കാനായില്ല … അപ്പോഴാണ് നിലത്തായി ഒരു ലെറ്റർ കിടക്കുന്നത് അവൻ കണ്ടത് … അവനതെടുത്ത് വായിച്ച് നോക്കി ….

” നീ ഇനി നിന്റെ നാട്ടിൽ പോകണമെന്നില്ല …. നേരെ നിന്റെ പ്രിയതമയുടെ വീട്ടിലേയ്ക്ക് ചെല്ല് … നിനക്കായി ഞാൻ ഒരു സർപ്രൈസ് ഒരുക്കി വച്ചിട്ടുണ്ട് … ”

ഇതാണ് ആ ലെറ്ററിൽ ഉണ്ടായിരുന്നത് . അത് വായിച്ചതും അവന്റെ ഉള്ളിൽ ഒരു ഭയം അനുഭവപ്പെട്ടു , അവൻ പോക്കറ്റിൽ നിന്ന് ഫോണെടുത്തു അഹാനയെ വിളിക്കാനായി പക്ഷെ ഫോൺ ചാർജ് തീർന്ന് ഓഫ് ആയ സ്ഥിതിയിലായിരുന്നു …..