💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

അവന്റെ കണ്ണിലെ കാഴ്ച മങ്ങി തുടങ്ങിയിരുന്നു … മുന്നിൽ കിടന്ന ഒരു പ്ലാസ്റ്റിക്ക് ചെയറിൽ പിടിച്ച് നിൽക്കാൻ അവൻ ശ്രമിച്ചു , പക്ഷെ അവനതിന് കഴിഞ്ഞില്ല … ബോധം നഷ്ടപ്പെട്ട പോലെ അവൻ നിലത്തേയ്ക്ക് വീണു , അവന്റെ കണ്ണുകൾ അടയുന്നതിന് മുൻപ് അവൻ കണ്ടത് തന്നെ നോക്കി കൈകൾ കെട്ടി നിൽക്കുന്ന ജെന്നിഫറിനെയാണ് . അവളുടെ മുഖത്ത് ഒരു തരം പുഞ്ചിരിയായിരുന്നു , വിജയം കൈവരിച്ച രാജാവിന്റെ മുഖത്ത് ഉളളതു പോലെയുള്ള ഒരു പുഞ്ചിരി .

ആ സമയം തന്നെ ആ വീടിന് മുന്നിൽ ഒരു കാറ് വന്ന് നിന്നു . അതിൽ നിന്ന് നിവേദും വിപിനും വേറെ രണ്ട് മൂന്ന് പേരും പുറത്തേയ്ക്കിറങ്ങി … അവുടെ കൂട്ടത്തിൽ മറ്റൊരാൾ കൂടി ഉണ്ടായിരുന്നു , പ്രണവ് . അവർ വണ്ടിയിൽ നിന്നിറങ്ങിയതും കാറ് ഓടിച്ചിരുന്നയാൾ വണ്ടിയുമായി മുന്നോട്ട് പോയി . ആ ഇരുട്ടിന്റെ മറവിൽ അവർ ഗേറ്റ് കടന്ന് ഉള്ളിലേയ്ക്ക് കയറി ഒടുവിൽ വീടിനകത്തേയ്ക്കും ….

വീടിനകത്ത് ഹാളിൽ തറയിലായി ബോധമില്ലാതെ കിടക്കുന്ന അജുവിനെ കണ്ടതും നിവേദിന്റെ മുഖത്ത് ഒരു പുഞ്ചിരി വിടർന്നു ….

” ജെന്നി , എക്സലന്റ് ….. ഒരു ബലപ്രയോഗവുമില്ലാതെ ഞാൻ പറഞ്ഞ മാർഗ്ഗത്തിലൂടെ താൻ ഇവനെ ഇവിടെ എത്തിച്ചു … ഇവന്റെ മുന്നിൽ നന്നായി അഭിനയിച്ചു അല്ലേ ? ഗുഡ് … തന്നെപ്പറ്റി വിപിൻ പറഞ്ഞപ്പോൾ ഞാൻ ഇത്രയും പ്രതീക്ഷിച്ചില്ല … ”

അവളെ പുകഴ്ത്തിക്കൊണ്ട് നിവേദ് ഓരോന്ന് പറഞ്ഞു . അത് കേട്ടതും അഹങ്കാരം നിറഞ്ഞ രീതിയിൽ അവളൊന്ന് പുഞ്ചിരിച്ചു …