💘 അരികത്തായാരോ – 11 💘 വിച്ചു [ ചെകുത്താനെ സ്നേഹിച്ച മാലാഖ ] 1386

” തനിക്കെന്നെ പേടിയാണോ ? പേടിക്കണ്ടടോ ഞാനൊന്നും ചെയ്യില്ല . തന്നെ സുരക്ഷിത സ്ഥാനത്ത് ഞാൻ എത്തിച്ചിരിക്കും ഉറപ്പ് . എന്നെ ഒരു ഏട്ടനായി കണ്ടാൽ മതി … രക്ത ബന്ധമല്ലെങ്കിൽ പോലും എന്നെ സ്വന്തം ചേട്ടനായി കാണുന്ന തന്നെ പോലുള്ള ഒരുപാട് സഹോദരിമാർ എനിക്കുണ്ട് . ”

അജു ഒരു പുഞ്ചിരിയോടെ പറഞ്ഞതും അവളുടെ മുഖത്തെ ഭയം മാറി ഒരു പുഞ്ചിരി നിറഞ്ഞു … അവളവന്റെ ബുള്ളറ്റിന് പുറകിൽ കയറിയ ശേഷം അവന്റെ തോളിൽ കൈ വച്ചിരുന്നു , അവൻ വണ്ടി മുന്നോട്ടെടുത്തു ….

” എന്താ തന്റെ പേര് ? ”

മുന്നോട്ട് പോകുന്നതിനിടയിൽ അവനവളോട് ചോദിച്ചു …

” ജെന്നി …. ജെന്നിഫർ എന്നാ മുഴുവൻ പേര് , ഏട്ടന്റെ പേരോ ? ”

അവൾ ആകാംഷയോടെ ചോദിച്ചു …

” അർജുൻ , അടുപ്പമുള്ളവർ അജു എന്ന് വിളിക്കും … ”

അവൻ മറുപടി നൽകി …

” താനീ രാത്രിയിൽ എവിടെ പോയി വരുന്ന വഴിയാ … ? ”

അവനവളോട് ചോദിച്ചു ….

” വീക്കെന്റ് അല്ലെ . ഒരു കൂട്ടുകാരിയെ റയിൽവേ സ്റ്റേഷൻ കൊണ്ട് വിടാൻ പോയതാ അവൾക്ക് വീട് വരെ പോകേണ്ട എന്തോ ആവശ്യം … ”

അവൾ അവനോട് മറുപടി പറഞ്ഞു …

അവളുടെ സംസാരമൊക്കെ അവന് ഏറെ ഇഷ്ടമായി . ഇവൾ റോഡിൽ അവർക്ക് മുന്നിൽപ്പെട്ട് നിന്നപ്പോൾ അവനോട് സഹായം അഭ്യർത്ഥിച്ചപ്പോൾ അവന് മനസ്സിൽ പെട്ടെന്ന് ഓർമ്മ വന്നത് തന്റെ സുഹൃത്തായ അനൂപിന്റെ അനുജത്തി അനുപമയെയാണ് ….