ഡെറിക് എബ്രഹാം 16 [അഹമ്മദ് ശഫീഖ് ചെറുകുന്ന്] 279

ഡെറിക് കമ്മീഷണറെ വിവരം ധരിപ്പിച്ചും കൊണ്ട് അജിത്തുമായി അവിടുന്നിറങ്ങി….ഫോഴ്സിനെ കൂടെ കൂട്ടാൻ കമ്മീഷണർ നിർബന്ധിച്ചെങ്കിലും അവനത് നിരസിച്ചു…

വൈകാതെ തന്നെ അവർ രണ്ടു പേരും പുറപ്പെട്ടു….പോലീസ് ജീപ്പ് ഒഴിവാക്കി ഒരു പ്രൈവറ്റ് ഇന്നോവയിലായിരുന്നു അവർ പോയത്…അജിത്താണ് വണ്ടി ഡ്രൈവ് ചെയ്തത്….പോകുന്ന വഴിയേ , അവർ സേവിയറും ഗീതയുമായി ബന്ധപ്പെട്ടു കൊണ്ടേയിരിക്കുന്നുണ്ടായിരുന്നു…

അധികം വൈകാതെ തന്നെ മിനിബസ് കോയമ്പത്തൂർ എത്തി…കുറച്ചു കഴിഞ്ഞപ്പോൾ തന്നെ ആളൊഴിഞ്ഞ ഒരു സ്ഥലത്തേക്ക് മാറ്റി നിർത്തി….അവിടെ ഒരു ക്വാളിസ് അവരെ കാത്തു നിൽക്കുന്നുണ്ടായിരുന്നു…ആ രംഗങ്ങളൊക്കെ നേരിൽ കാണുന്ന രീതിയിൽ തന്നെ , മഫ്തയിലുണ്ടായ പോലീസുകാർ അവരുമായി അകലം പാലിച്ചു നിന്നു….. പ്രതീക്ഷിച്ചത് പോലെ തന്നെ ബസിൽ നിന്ന് കുറച്ചു ആളുകൾ ഇറങ്ങി….പക്ഷേ, അവർ ആ ക്വാളിസിലേക്ക് കയറുന്നുണ്ടായിരുന്നില്ല…കുറച്ചു കഴിഞ്ഞപ്പോൾ ക്വാളിസിലുണ്ടായിരുന്ന രണ്ടു പേർ ബസിലേക്ക് കയറി…. അൽപസമയത്തിന് ശേഷം അവർ ആരെയോ ചുമലിലേറ്റി പുറത്തിറങ്ങി…. ശരിക്കും വ്യക്തമാകാത്തത് കൊണ്ട് പോലീസുകാർ , അവരുടെ കൈയിലുണ്ടായിരുന്ന ബൈനോക്കുലർ വെച്ചു നിരീക്ഷിച്ചു…അപ്പോഴാണ് അവരുടെ കണ്ണുകളിൽ ഞെട്ടിക്കുന്ന ആ കാഴ്ച വ്യക്തമായത്..കുറച്ചു പെൺകുട്ടികളെയാണ് ബസിൽ നിന്നും ക്വാളിസിലേക്ക് കടത്തുന്നത്… അവർക്ക് ബോധമുണ്ടായിരുന്നില്ല….

അവരെ കടത്തുന്നവരുടെ കൂടെ , സഹായത്തിന് ബസിൽ വന്ന ചിലരുമുണ്ട്…..

ഗീതയും സേവിയറും പറഞ്ഞത് പോലെ , അവർ പെൺകുട്ടികളെ എണ്ണി നോക്കി…

അവർക്ക് കിട്ടിയ വിവരങ്ങൾ പോലെ തന്നെ ആറ് പെൺകുട്ടികൾ…

അതിൽ ഒരാൾക്ക് കാലുമില്ല….

അതും കൂടി കണ്ടപ്പോൾ അവർക്ക് അവരുടെ കണ്ണുകളെ വിശ്വസിക്കാൻ പറ്റിയില്ല…. കാരണം, ഗീതയുടെ നിർദേശമനുസരിച്ച് പിന്തുടർന്നെങ്കിലും അവർ പോലും കരുതിയിരുന്നില്ല , അത് പെൺകുട്ടികളെയും കൊണ്ടുള്ള വണ്ടിയായിരിക്കുമെന്ന്….

ബസിലുണ്ടായിരുന്ന മറ്റു സ്ത്രീകളോ കുട്ടികളോ പുറത്തിറങ്ങിയിട്ടുണ്ടായിരുന്നില്ല….

പെൺകുട്ടികളെയൊക്കെ മാറ്റിയതിന് ശേഷം മിനിബസ് അവിടുന്ന് വേറെ വഴിക്ക് പോയി….

സമയമിത്തിരി കഴിഞ്ഞിട്ടും പോലീസുകാർക്ക് ഞെട്ടൽ വിട്ടു മാറിയിരുന്നില്ല….

ആ ഞെട്ടലോട് കൂടി അവർ ഗീതയെ വിളിച്ചു കാര്യം പറഞ്ഞു…തങ്ങളുടെ കണക്ക് കൂട്ടലൊക്കെ എല്ലാ രീതിയിലും ശരിയാണെന്ന് മനസ്സിലാക്കിയ ഗീത ഉടനെ ഡെറിക്കിനെ വിളിച്ചു പറഞ്ഞു….

വണ്ടിയെ കണ്മുന്നിൽ നിന്ന് നഷ്ടപ്പെട്ടു പോകരുതെന്ന ഡെറിക്കിന്റെ നിർദേശം പോലീസുകാരെ അറിയിച്ചു…