ഡെറിക് എബ്രഹാം 16 [അഹമ്മദ് ശഫീഖ് ചെറുകുന്ന്] 279

“അവരെ പറഞ്ഞു വിടാൻ അനുവാദം നൽകിയപ്പോൾ പെട്ടെന്ന് ക്യാമറയിൽ ഒരു കുട്ടിയുടെ മുഖം പതിഞ്ഞു..നമ്മുടെ ഫോട്ടോയുമായി ബന്ധമൊന്നും കണ്ടില്ലെങ്കിലും ആ പെൺകുട്ടിയുടെ കാല് നഷ്ടപ്പെട്ടിരുന്നു….ആ കുട്ടി നമ്മൾ തേടുന്ന കുട്ടിയാണോ എന്നൊരു സംശയം ”

” കാൽ നഷ്ടപ്പെട്ടത് കൊണ്ട് മാത്രം അതവർ തന്നെയാകണം എന്നുണ്ടോ….?

അതൊരു കുടുംബമാണെന്നല്ലേ താൻ പറഞ്ഞത്….? ”

“ശരിയാണ് ഡെറിക്… അപ്പോഴാണ് ആദ്യം നിസ്സാരമായി വിട്ടൊരു കാര്യം എന്റെ ഓർമയിൽ വന്നത്..എല്ലാവരെയും പരിശോധിച്ചെങ്കിലും അതിൽ കുറച്ചു പേർ നല്ല ഉറക്കിലായിരുന്നു….. ലൈറ്റ് തെളിച്ചിട്ടും , അത്രയും ബഹളമുണ്ടായിട്ടും അവരിൽ നിന്ന് ഒരു ഞെരുക്കം പോലുമുണ്ടായിരുന്നില്ല…ഈ കുട്ടിയും ആ ഉറങ്ങുന്നവരിൽ ഉണ്ടായിരുന്നു ”

“ആ സമയത്ത് നിങ്ങളെന്തു കൊണ്ടത് ചോദിച്ചില്ല…? ”

“ചോദിച്ചിരുന്നു…. ഇപ്പോൾ ഉറങ്ങിയതാണെന്നാണ് പറഞ്ഞത്…. നമ്മൾ സാധാരണ അത് പോലെയുള്ളവരെ കാണുന്നതല്ലേ…..

അത് കൊണ്ട് സംശയം തോന്നിയില്ല ”

“താൻ പറഞ്ഞു വരുന്നത് , അവരെ ബോധം കെടുത്തിയതായിരിക്കും എന്നാണോ….? ”

“അങ്ങനെയൊരു സംശയമുണ്ട് ഡെറിക്…

പക്ഷേ, കാണാതായവർ ആറ് പെൺകുട്ടികളല്ലേ…. ഉറങ്ങുന്നവർ അതിനേക്കാൾ കൂടുതലാണ്… ആണുങ്ങളുമുണ്ട്….”

“അവർ എത്ര പേരുണ്ടായിരുന്നു….? ”