അപരാജിതൻ 25[Harshan] 10182

“അതെ ,,ബദരിനാഥത്തില്‍ നിന്നും ബുദ്ധവിഹാരത്തിലും അവിടെ നിന്നും താരാപര്‍വ്വതത്തിലും താരാപർവ്വതത്തിൽ നിന്നും ഈ ജ്വാലാ പർവ്വതത്തിൽ അങ്ങെത്തിയത്  പരമ ശക്തിയുടെ തീരുമാനമായിരിക്കാം , ഒരു പക്ഷെ ഇവിടത്തെ പ്രതിഷ്ഠയായ ശക്തിജ്വാലാ ദർശനം കൊണ്ട് ആ അന്വേഷണം തത്കാലത്തേക്ക് അവസാനിപ്പിക്കാൻ ‘അമ്മ ആഗ്രഹിക്കുന്നുണ്ടാകും ,, ”

അദ്ദേഹം കൈകൾ കൂപ്പി  “അമ്മെ ..ദേവി ..പരാശക്തി : എന്ന് പ്രാർത്ഥിച്ചു

“ഈ ശക്തിപീഠത്തിൽ അങ്ങ് യാത്ര അവസാനിപ്പിക്കുക ,, മധ്യാഹ്നമുള്ള ഭോഗ് ആരതി കൂടെ തൊഴുത് അമ്മയെ പ്രാർത്ഥിച്ചു കൊണ്ട് അങ്ങ് തിരികെ പോകുക , ആ കന്യക എവിടെയാണോ ,,അവിടേക്ക് തന്നെ ,, അങ്ങയുടെ സാന്നിധ്യം അവിടെയിപ്പോള്‍ ആവശ്യമാണ് ” സാധ്വി പുഞ്ചിരിയോടെ എഴുന്നേറ്റു

“ഒരുപക്ഷെ മകളെ കാണുവാനും  ഈ ഒരു അറിവ് നേടുവാനുമായിരിക്കും  ,,ഞാനീ  ജ്വാലാമുഖി ക്ഷേത്രത്തിൽ എത്തിപെട്ടത്,,”അദ്ദേഹവും എഴുന്നേറ്റു.

“കാണാം ,, ” ആ സാധ്വി  അദ്ദേഹത്തെ വണങ്ങി അവിടെ നിന്നും നടന്നകന്നു.

അദ്ദേഹം നടന്നകലുന്ന ആ സാധ്വിയെ നോക്കി കൈകൾ കൂപ്പി വണങ്ങി കണ്ണുകളടച്ചു.

“ശിവശ്ശക്ത്യാ യുക്തോ യദി ഭവതി ശക്താഃ പ്രഭവിതും

നചേദേവം ദേവോ ന ഖലു കുശലഃ സ്പന്ദിതുമപി

അതസ്ത്വാമാരാദ്ധ്യം ഹരിഹരവിരഞ്ചാദിഭിരവി

പ്രണന്തും സ്‌തോതും വാ കഥാമകൃതപുണ്യഃ പ്രഭവതി

എന്ന ആദിശങ്കരവിരചിത സൗന്ദര്യലഹരി ശ്ലോകം ജപിച്ചു.

ആരോ ദേഹത്ത് തോണ്ടുന്നതറിഞ്ഞാണ് സത്യാനന്ദ സ്വാമികൾ കണ്ണുകൾ തുറന്നത്. നോക്കുമ്പോൾ ഒരു പെണ്‍കുട്ടിയായിരുന്നു.

ഇലഞ്ഞി മരചുവട്ടിൽ ഇരുന്നു താൻ ഉറങ്ങുകയായിരുന്നു എന്നദ്ദേഹത്തിനു ബോധ്യമായി.

അപ്പോൾ സ്വപ്നമായിരുന്നുവോ ? അദ്ദേഹം അതിശയത്തോടെ ചിന്തിച്ചു

ആ കുട്ടി ചിരിച്ചു കൊണ്ട് അവിടെയൊക്കെ ഓടി കളിച്ചു കൊണ്ടിരുന്നു

അദ്ദേഹം വേഗം എഴുന്നേറ്റു.

തനിക്ക് തോന്നിയതോ അതോ തന്നെ തോന്നിപ്പിച്ചതോ ? അതായിരുന്നു അദ്ദേഹത്തിനെ ആശങ്കപെടുത്തിയത്.

അദ്ദേഹം ആ ക്ഷേത്രത്തിനു ചുറ്റും നടന്നു നോക്കി , എങ്ങും താൻ കണ്ട സാധ്വി യെ കാണാൻ സാധിച്ചില്ല .

പക്ഷെ ഇപ്പോൾ നടന്നതിന്‍റെ  പൊരുൾ എന്തെന്നറിയാനായി കണ്ണുകളടച്ചു കൊണ്ട് മഹാമായയെ പ്രാർത്ഥിച്ചു.

ആ മഹാസാത്വിക൯ അമ്മയെ ധ്യാനിച്ചു കൈകള്‍  കൂപ്പി വണങ്ങി ചുണ്ടില്‍ ദേവിസ്തവം ജപിച്ച് കൊണ്ടിരുന്നു.