അപരാജിതൻ 25[Harshan] 10154

ആദി തിരികെ വന്നപ്പോളേക്കും ഒരു മൺവീട് അവർ സൂപ്പർമാർക്കറ്റിനായി വൃത്തിയാക്കിയിരുന്നു.

അത് ആദി താമസിക്കുന്ന വീടിനു സമീപം തന്നെയായിരുന്നു , ഒരു മൂലയിലുള്ള വീട്

അതുകൊണ്ടു അവനു പലകവേലിക്കപ്പുറം നിന്നാൽ കാണാനും എളുപ്പമായിരുന്നു.

ആ വീട്ടിലേക്ക് കണക്ഷൻ ഇല്ലാത്തതിനാൽ അപ്പുറത്തെ വീട്ടിൽ നിന്നും ബൾബ് കത്തിക്കാനായി ആദി വയറും ഹോൾഡറും പിന്നും ഒക്കെ റെഡിയാക്കി കൊടുത്തു.

അതോടെ ആ വീട്ടിൽ വെളിച്ചവുമായി.

അവിടത്തെ സ്ത്രീകൾ ആദിയുടെ ഉപദേശപ്രകാരം  മുളയും മുള കഷ്ണങ്ങളും പനമ്പും ഉപയോഗിച്ച് സാധനങ്ങൾ വെക്കാനുള്ള നീളത്തിലുള്ള റാക്കുകൾ കൂടെ ഉണ്ടാക്കി

ഉച്ചയായപ്പോളേക്കും അവിടത്തേക്ക് വേണ്ട സാധനങ്ങൾ ഒരു വാനിൽ അവിടെയെത്തി.

എല്ലാം ആദിയുടെ വീട്ടിലെ തിണ്ണയിലും പനമ്പു പായ വിരിച്ച മുറ്റത്തും ഇറക്കി കൊടുത്തു.

ഹോൾ സെയിൽ റേറ്റിൽ ഡിസ്‌കൗണ്ട് കൂടെ കൊടുത്താണ് അവർ വിലയിട്ടിരുന്നത്.

അപ്പോൾ തന്നെ ഇരുപതിനായിരം രൂപ ഗ്രാമത്തിന്‍റെ  കോമൺ ബെനിഫിറ്റ് ഫണ്ടിൽ നിന്നും സ്വാമി മുത്തശ്ശന്‍റെ  കൈയിൽ നിന്നും വാങ്ങി കൊടുത്തു.

അവിടെ അവന്‍റെ  വീടിന്‍റെ  മുന്നിൽ മുത്തശ്ശന്മാരും പിള്ളേരും മറ്റുള്ളവരും ഉണ്ടായിരുന്നു.

അവർ എല്ലാ സാധനങ്ങളും തരം തിരിച്ചു

ഒരു തുടക്കമായതിനാൽ ഒരുപാട് സാധനങ്ങൾ അധികം  എടുത്തിട്ടില്ലായിരുന്നു.

മുൻപ് പെരുമാൾ കൊടുത്ത പലവകകൾ എല്ലാ വീട്ടിലും ഉണ്ടായിരുന്നു .

അതൊക്കെ തീരുന്ന മുറയ്ക്ക് കൂടുതൽ സാധനങ്ങൾ കൂടെ വെക്കാനുള്ള പ്ലാനായിരുന്നു.

ബിൽ നോക്കി , സാധങ്ങളുടെ എം ആർ പി കൂടെ നോക്കി നാലു രൂപ അഞ്ചു രൂപ വ്യത്യസത്തിൽ വിലയിട്ടു

ഓരോ സാധനങ്ങളൂം ഉള്ളിലേക്ക് കൊണ്ട് പോയി കസ്തൂരിയും ശൈലജയും മറ്റുള്ള യുവതികളും കൂടെ അടുക്കി വെച്ചു.

അങ്ങനെ ഒരു അഞ്ചു മണിയോടെ കടയിൽ സാധനങ്ങൾ എല്ലാം അടുക്കി കയറ്റി

ഒരു ചെറിയ സൂപ്പർ മാർക്കറ്റ് എന്ന രുപം പ്രാപിച്ചു.

ശിവശൈല൦ സൂപ്പർ മാർക്കറ്റ് എന്ന് പേരും പെയിന്റ് കൊണ്ട് ഒരു മരപ്പാളിയിൽ എഴുതി അവിടെ തൂക്കി.

അന്ന് തന്നെ ഉദ്ഘടനം നടത്തണമെന്ന് ആദി ശഠിച്ചു

ആരെ കൊണ്ട് ആദ്യ വില്പന നടത്തും എന്നതായിരുന്നു ചർച്ച

എല്ലാവരും ആദി തന്നെ വാങ്ങണം എന്ന് നിർബന്ധ൦ പിടിച്ചു

അവനു താല്പര്യം  ആദ്യ വില്പന ഡോക്ടർ ഗോപികൃഷ്ണനെ കൊണ്ട് ചെയ്യിക്കാനായിരുന്നു

കാരണം അവൻ ഉദ്‌ഘാടനം നടത്തിയാൽ അവനു ഗ്രാമത്തിൽ പ്രവേശിക്കേണ്ടി വരും

അത് മുൻപ് കൊടുത്ത വാക്കിന് വിരുദ്ധമായി മാറും

അവൻ വേഗം ജീപ്പുമെടുത്തു ഇറങ്ങി.