അപരാജിതൻ 25[Harshan] 10154

“അരുത് ,,,എന്നെ പ്രണമിക്കരുത് അങ്ങയുടെ പ്രായമോ അനുഭവങ്ങളോ ഒന്നും എനിക്കില്ല ,, വണങ്ങിയത് എന്നിലെ ഈശ്വരാംശത്തെയാണെങ്കിൽ അങ്ങയുടെ ഉള്ളിലും ഉള്ളത് തന്നെയല്ലേ ,,ഞാനാകുന്നതും അങ്ങാകുന്നതും എല്ലാം പരമമായ പൊരുള്‍ , അതിനെ കുമ്പിടേണ്ട ആവശ്യമുണ്ടോ ?”

“എന്‍റെ  കൊച്ചുമകളാണ് ,, കിഴക്കെവിടെയോ താമരപ്പൂക്കളാല്‍  ആരാധിക്കപ്പെടുന്ന ദേവത  ,,എന്തിനാ അവൾ സഹസ്രാബ്ദങ്ങൾക്കു ശേഷം പിറന്നത് ,, ആരാണ് അവളുടെ പ്രാണനെ ആഗ്രഹിക്കുന്നത് ,,എന്താ അവളിൽ ആഭിചാരപ്രയോഗങ്ങൾ നടത്തപ്പെടുന്നത് ,,എന്തിനാണ് മൃത്യു അവൾക്കൊരു ദോഷമായി മാറുന്നത് ,,  എന്താ അവളുടെ നിയോഗം ,,  ഇതൊക്കെയാണ് ഞാൻ തേടുന്നത് ”

അതുകേട്ടു സാധ്വി അല്പം നേരം കണ്ണുകളടച്ചിരുന്നു

എന്നിട്ടു മെല്ലെ കണ്ണുകൾ തുറന്നു അദ്ദേഹത്തെ നോക്കി

“ഇന്ന് എന്നത് ഇന്നലെയുടെ പ്രതിഫലനമാണ് , ഇന്നലെ എന്നത് അതിനു മുൻപുള്ള ദിനത്തിന്‍റെ  പ്രതിഫലനവും , കർമ്മവും അതിനൊരു ഫലവും ഉണ്ട് , ഇന്ന് ചെയ്യുന്നത് ഒരുപക്ഷെ ഇന്നലെ ചെയ്ത കർമ്മത്തിന്‍റെ  ഫലമാ യിരിക്കാം ,, ഇന്ന് ആരെങ്കിലും ശത്രുഭാവത്തിൽ അവളുടെ പ്രാണൻ ആഗ്രഹിക്കുന്നു എങ്കിൽ അയാൾ ഒരുപക്ഷെ ആയിര൦ സംവത്സരങ്ങൾക്കു മുൻപും ആഗ്രഹിച്ചിരിക്കണം , ഇന്ന് അവളുടെ മേൽ ആഭിചാരപ്രയോഗങ്ങൾ ഏൽക്കുന്നുണ്ട് എങ്കിൽ ആയിര൦ സംവത്സരങ്ങൾക്കു മുൻപും ഏറ്റിരിക്കണം,”

“എങ്കിലവളുടെ മൃത്യുയോഗങ്ങളോ ?” അദ്ദേഹം സംശയത്തോടെ ചോദിച്ചു.

“ഇന്നത്തെ മൃത്യുയോഗങ്ങൾ ആയിര൦ സംവത്സരങ്ങൾക്കു മുന്പെ ആ കന്യക നേരില്‍ അനുഭവിച്ച വധശ്രമങ്ങളുമായിക്കൂടായ്കയില്ലല്ലോ, എല്ലാം കണ്ടു പിടിക്കേണ്ടത് അങ്ങ് തന്നെയാണ് ,,,,

മറ്റൊന്ന് “ അവരൊന്ന് നിര്‍ത്തി , അല്‍പ്പം സമയം കഴിഞ്ഞു തുടര്‍ന്നു.

“ജന്മങ്ങൾ ചാക്രിക സ്വഭാവമുള്ളതാണ്  ചിലർക്ക് പരമമായ മോക്ഷത്തിലേക്ക് അനവധി ജന്മങ്ങൾ ജനിച്ചു ജീവിച്ചു മരിക്കേണ്ടി വരും ,, അതൊക്കെ പ്രകൃതിയുടെ തീരുമാനമാണ് ,, ”

“പറയുന്നത് എനിക്ക് മനസ്സിലാകുന്നുണ്ട്, എങ്കിലും ,, ഈ യാത്ര ഞാൻ എത്ര കാലം തുടരണം ??,, അതാണ് എന്നെ  അലട്ടുന്നത് ,, ഞാന്‍ പ്രായമേറിയ വൃദ്ധനല്ലേ   ”

“അങ്ങ് വിഷമിക്കണ്ട ,, സൂര്യന്‍റെ  സ്ഥാനം നമുക്ക് അനുഭവപ്പെടുന്നത് കിഴക്കാണ്‌ , അതിനി ഒരിക്കലും മാറാൻ പോകുന്നില്ല , അതൊരു സത്യമാണ് , അതുപോലെ ഒരു സത്യമാണ് ഈ ഇടവും , പരാശക്തി ജ്വാലയായി വാഴുന്നയിടമല്ലേ , ഈ ജ്വാലാമുഖി ക്ഷേത്രത്തിൽ വച്ച് അങ്ങയുടെ യാത്ര തത്കാലമായി അവസാനിപ്പിക്കണം ,, “സാധ്വി  ഉപദേശിച്ചു

സത്യാനന്ദ സ്വാമികൾ ആശ്ചര്യഭാവത്തോടെ സാധ്വിയെ നോക്കി