അപരാജിതൻ 25[Harshan] 10182

ശിവശൈലത്ത്

സ്വാമി മുത്തശന്‍റെ  വീട്ടിലെ തിണ്ണയിലിരുന്നു സ്വാമി മുത്തശ്ശനും വൈദ്യരു മുത്തശ്ശനും കഞ്ഞി കുടിക്കുകയായിരുന്നു.അവർക്കു കഞ്ഞി വിളമ്പി ശംഭുവും അവരോടൊപ്പമിരുന്നു കുടിക്കാനാരംഭിച്ചു.

“ഒരുപാട് നന്മയുള്ള കുട്ടിയാ അവൻ ” കഞ്ഞി കുടിക്കുന്ന നേരം വൈദ്യർ മുത്തശ്ശൻ പറഞ്ഞു

“അറിവഴകനല്ലേ ,,,”സ്വാമി മുത്തശ്ശൻ ചോദിച്ചു

“അല്ലാതെ ,,വേറെയാരാ സ്വാമി ”

“അതെ ,,അല്ലാതെ വേറെയാരാ ,, അവൻ പോണെന്നു പറഞ്ഞപ്പോൾ ഞാനൊത്തിരി ഭയന്നു പോയി വൈദ്യരെ ”

“ഞാനും ,,,,,എനിക്കങ്ങു നെഞ്ചിൽ ഒരു കല്ലെടുത്ത വച്ച പോലായിരുന്നു ,, അവൻ പോണുന്നു പറഞ്ഞാ വല്ലാത്തൊരു വിഷമമാ ,,,,,അവനുണ്ടെകിൽ ഒരു ധൈര്യമാ ,, അവന്‍റെ  സാന്നിധ്യം പോലും വിഷമങ്ങളെ ഇല്ലാതെയാക്കും ,,, അതാ അവന്‍റെ  ഗുണം ,,”

“പുണ്യം ചെയ്ത അച്ഛനുമമ്മയ്ക്കും പിറന്ന കുട്ടിയല്ലേ ,,അതാ ദുരിതങ്ങളിൽ കിടക്കുന്നവരെ സഹായിക്കാനുള്ള മനസ്സ് ,, ” സ്വാമി മുത്തശ്ശൻ പറഞ്ഞു

“ഞാനും ആകെ സങ്കടപ്പെട്ടു മുത്തശ്ശാ ,,, അപ്പുവേട്ടൻ പോവാന്നു പറഞ്ഞപ്പോ,,ഇപ്പോ ഓരോ ദിവസം കഴിയുംതോറും പേടിയാ ,,അപ്പുവേട്ടൻ ഇനി കുറച്ചു ദിവസമല്ലേ ,,ഉണ്ടാകൂ എന്നോർത്ത് ” ശംഭു രണ്ടുപേരോടായും പറഞ്ഞു

“സ്വാമി ,,,,”

“എന്താ ,,വൈദ്യരെ ,,,?”

“എടോ ,,എനിക്കങ്ങു മനസിലാകുന്നില്ല ,,ആ കുട്ടി എന്നോട് കൂടുതൽ സ്വതന്ത്യ്രമെടുത്തു പെരുമാറുമ്പോളും അവനെയൊരു  അന്യനായി തോന്നുന്നേ ഇല്ല ,,എന്‍റെ  ആരോ എന്നോട് കൂടുതൽ സ്വാതന്ത്ര്യമെടുക്കുന്ന പോലെ ,, ഞാനതൊക്കെ ഒരുപാട് അങ്ങോട്ട് ആസ്വദിക്കുന്നുമുണ്ട് ,, ”

“എന്നോട് അങ്ങനെ അധികം സ്വാതന്ത്ര്യമവനെടുക്കാറില്ല .” സ്വാമി പറഞ്ഞു

“അത് ,,അപ്പുവേട്ടന് മുത്തശ്ശനെ പേടിയാ ,, മുത്തശ്ശനല്ലേ ഇവിടത്തെ തലവൻ ,,അപ്പോ ആ ഒരു ബഹുമാനം തരുന്നതാ ,, അത് മാത്രവുമല്ല , ആവശ്യമില്ലാത്ത കാര്യങ്ങൾക്കു ഇടപെടരുത് എന്ന് മുത്തശ്ശൻ ഒരിക്കല് വഴക്കു പറഞ്ഞതുമല്ലേ ,,, ” ഒരു ചിരിയോടെ ശംഭു പറഞ്ഞു

“അതന്നല്ലേ ,,,മോനെ ,, ആരാ എന്താ എന്നൊന്നും നമുക്കറിയില്ലല്ലോ ,, എന്നാലും അന്ന് പറഞ്ഞപോലെ അവൻ  ഗ്രാമത്തിന്‍റെ  നിയമങ്ങൾക്ക് എതിരായി ഇതുവരെ ഒരു കാര്യവും ചെയ്തിട്ടുമില്ല ,, അക്കാര്യത്തിൽ അവനെ ഞാൻ  സമ്മതിക്കുന്നു ,, ”

“ഉള്ളിലൊരു പേടിയാണ് വാഹനത്തിലാ ആ കുട്ടി അത്രയും ദൂരം പോകുന്നത് ,,ഒന്ന് അന്വേഷിക്കാൻ പോലും ഒരു മാർഗ്ഗവുമില്ല” വൈദ്യർ മുത്തശ്ശൻ ആശങ്ക പങ്കുവെച്ചു

“ഭയക്കാനൊന്നുമില്ല ,, അവൻ ശ്രദ്ധയോടെ കാര്യങ്ങൾ ചെയുന്നവനാ ,, ഒരു കുഴപ്പവും വരില്ല ,വൈദ്യരെ ”  സ്വാമി മുത്തശ്ശൻ പറഞ്ഞു

അവര്‍ വര്‍ത്തമാനം പറഞ്ഞു കഞ്ഞി കുടിയവസാനിപ്പിച്ചു.

വൈദ്യര്‍ മുത്തശ്ശന്‍ കിടക്കാനായി അവിടെ നിന്നും തന്‍റെ   ഭവനത്തിലേക്ക് നടന്നു.