അപരാജിതൻ 25[Harshan] 10176

“കുഞ്ഞേ ,,, ഇതൊക്കെ പിന്നെ എന്ത് ചെയ്യും ,,ഞങ്ങൾ നട്ടു നനച്ചു വളർത്തുന്നതല്ലേ ,,”

“അതെ ,,നിങ്ങൾ നട്ടു നനച്ചു വളർത്തുന്നത് കണ്ട ചുങ്കക്കാർക്ക് ലാഭമുണ്ടാക്കാനല്ല ,,, അവിടെ കൊണ്ട് ചെന്ന് നാലിലൊന്നു വിലയ്ക്ക് കൊടുക്കുന്ന പണി ഇനി മുതൽ വേ ……ണ്ട ,,,,,,”

അവന്‍റെ  ആ വാക്കുകൾക്ക് മുന്നിൽ അവർ അനുസരണപ്പെട്ടു കൊണ്ടിരുന്നു

“കുഞ്ഞേ ,, നമ്മളപ്പോ എന്ത് ചെയ്യും ,,,,?” സ്വാമി മുത്തശ്ശൻ ചോദിച്ചു

“കൃഷി ചെയ്യാണെങ്കിൽ ലാഭത്തിന് ,,,അല്ലാതെ ആരെയെങ്കിലും ഊട്ടാൻ വേണ്ട ,, അതുപോലെ പാലും ഇന്ന്

മുതൽ നമ്മൾ ചന്തയിൽ കൊടുക്കുന്നില്ല ,,, അതുപോലെ വൈദ്യർ മുത്തശ്ശന്‍റെ  മരുന്നുകളും ,, ”

അങ്ങോട്ടേക്ക് ഉമാദത്തനും കസ്തൂരിയും ശൈലജയും വൈദ്യർ മുത്തശ്ശനും കൂടെ വന്നു

പുറകെ അവിടത്തെ കുട്ടികളടക്ക൦ സകല ഗ്രാമവാസികളും അവർക്കു ചുറ്റുമായി നിന്നു

എല്ലാവരെയും കണ്ടപ്പോൾ ആദിക്ക് ആവേശം കയറി.

“നമ്മൾ നാട്ടുകാർക്ക് അടിമകളല്ല ,, പണ്ടെങ്ങോ ഇവിടത്തെ കാരണവ൯മാർ കൊട്ടാരത്തിനു സത്യം ചെയ്തത് പ്രജാപതികൾക്ക് അടിമകളായി ഇരുന്നോളാമെന്നു മാത്രമാണ് ,,,,,തത്കാലം അവർക്കു മാത്രം അടിമകളായി  നിൽക്കുക ,, ഞാൻ പറഞ്ഞത് മനസിലായില്ലേ ……”

അവന്‍റെ  വാക്കുകളുടെ മൂർച്ച എല്ലാവരും ഉള്ളുകൊണ്ടറിഞ്ഞു

“പേടിയാണ് ,,അറിവഴകാ ,,,അങ്ങനെയൊക്കെ ചെയ്‌താൽ എന്‍റെ  കുട്ടികളെ  ഇല്ലാതെയാക്കും ,,” പേടിയോടെ വൈദ്യർ മുത്തശ്ശൻ കൈകൾ കൂപ്പി പറഞ്ഞു

ആ വൃദ്ധന് മനസ്സിൽ അപ്പോഴും തന്‍റെ   മക്കളെപോലെ കാണുന്ന ശിവശൈലനിവാസികളെ കുറിച്ചായിരുന്നു ആശങ്ക

അതുകേട്ടു ആദി ഉറക്കെ ചിരിച്ചു

ആരെയും ഭയക്കാത്ത ചിരി

“ആരില്ലാതെയാക്കാൻ മുത്തശ്ശാ ?” ആദി ചോദിച്ചു

“ഇവിടത്തെ മനുഷ്യപറ്റില്ലാത്ത മുതലാളികളും കുടുംബക്കാരും ക്ഷത്രിയരും പോലീസും ഗുണ്ടകളുമെല്ലാം ,,”

മറുപടി പറഞ്ഞത് സ്വാമി മുത്തശ്ശനായിരുന്നു

“ശങ്കരനുള്ളപ്പോഴോ ,,,,,?” ആദി ഉറക്കെ ചോദിച്ചു

“ശങ്കരനുള്ളപ്പോൾ നിങ്ങളെയില്ലാതെയാക്കാൻ ആരും വരില്ല ”

വല്ലാത്തൊരു ഭാവത്തോടെ അവൻ ഉറക്കെ ആവശത്തോടെ പറഞ്ഞു

അവന്‍റെ  ആ മുഖവും ഭാവവുമെല്ലാം അവിടത്തെ സാധുക്കളുടെ മനസ്സിന് ധൈര്യം പകര്‍ന്നു.

“ശിവശൈലത്തിനു ഒരു ഈശ്വരനെയുള്ളൂ ,

ഈ അടിമകൾക്ക് ഒരേയൊരു ചക്രവർത്തിയെ ഉള്ളൂ ,,,

അത് ശങ്കര൯ ,,,

അവനറിയാം നിങ്ങളെ പരിപാലിക്കാനും നിങ്ങൾക്ക് വേണ്ട സംരക്ഷണമൊരുക്കാനും ,,

ശങ്കരനിൽ നിങ്ങൾക്ക്  വിശ്വാസമുണ്ടെങ്കിൽ മാത്രം എന്‍റെ  വാക്ക് കേൾക്കുക ,”

എല്ലാവരും തല കുലുക്കി