അപരാജിതൻ 25[Harshan] 10176

പ്രാണൻ പിടിച്ചു നിർത്താനുള്ള മരണ വെപ്രാളത്തിൽ മലമൂത്ര വിസർജ്ജനം സംഭവിക്കുന്നുണ്ടായിരുന്നു.

മരണത്തിലേക്ക് പ്രവേശിക്കാൻ പോകുന്ന യേഷേ വാങ്ചുക് ഭിക്ഷുവിനെ നോക്കി  അജ്ഞാതൻ  ജപിച്ച്കൊണ്ടിരുന്നു.

ഒം ദാരാദാരാ ദിരിദിരി ദുരുദുരു

ഇത്തെ വേ ഇത്തെ ചലെചലെ

പുരചലേ പുരചലെ

കുസൂമേ കുസൂമ വ രെ

ഇലി മിലി ചിതി ജ്വലം അപനായ സോഹാ

ആ സാത്വികനായ ബുദ്ധഭിക്ഷു ശ്വാസം കിട്ടാനാകാതെ പിടഞ്ഞു പിടഞ്ഞു കഴുത്തുയര്‍ത്തി കൊണ്ട് ചലനമറ്റ് നിര്‍ജീവാവസ്ഥയിലേക്ക് വന്നു. തന്‍റെ   കണ്മുന്നിൽ ആ ബുദ്ധഭിക്ഷുവിന്‍റെ  മരണം കണ്ട ആ  യുവാവ്  വേഗം തന്നെ വാതിൽ തുറന്നു പുറത്തേക്കിറങ്ങി.പോകും മുന്പ് ആ യുവാവ് ആ ബുദ്ധഭിക്ഷുവിന്‍റെ  മുറിയില്‍ ബുദ്ധ വിഗ്രഹത്തിന് മുന്നിലായി സൂക്ഷിച്ചു വെച്ചിരുന്ന ഒരു ചെറിയ ലോഹ പേടകം കൂടെ കയ്യിലെടുത്തു.

അവിടെ നിന്നും ശബ്ദമുണ്ടാക്കാതെ മൂന്നാം മുറ്റത്തേക്ക് പ്രവേശിച്ചു

അവിടെ ഗവാങ് നാംഗിയാലിന്‍റെ യും  പതിനഞ്ചാം നൂറ്റാണ്ടിൽ ജീവിച്ചിരുന്ന ഭൂട്ടാനീസ് ബുദ്ധ ആചാര്യനായ പേമ ലിംപയുടെയും ഭൗതിക അവശിഷ്ടങ്ങൾ സംരക്ഷിച്ചിരുന്ന ഭാഗത്തെത്തി വണങ്ങി ,

അവിടെ നിന്നും ആരുടേയും കണ്ണിൽ പെടാതെ മതിലിനിനോട് ചേർന്നുള്ള നീലവാകമരത്തിൽ കയറി മതിൽ ചാടി കടന്നു പോ-ച്ചു നദിയിലേക്ക് ചാടി നീന്തിയകന്നു.