അപരാജിതൻ 25[Harshan] 10176

അന്ന് സായാഹ്നം

മേരുധാമത്തിൽ

പ്രധാന ആചാര്യനായ കുമാരിലഭട്ടനും അദ്ദേഹത്തോടൊപ്പം ഉപ ആചാര്യന്മാരായ സവ്യസാചി ചിത്രാംഗദന്‍ പദ്മപ്രഭന്‍  അംഗുലിമാലന്‍  വേദപദ്മന്‍  മഹാനാഥന്‍ കൌശികന്‍  ആശ്വാചലൻ  എന്നിവരും മഹാമേരു മണ്ഡപത്തിൽ ചർച്ചയിലായിരുന്നു.

പ്രപഞ്ചത്തിൽ ക്ഷീരപദത്തിലേക്ക് പ്രവേശിച്ചു സഞ്ചരിക്കുന്ന മഹോജ്ജ്വല എന്ന അതിശക്തമായ നക്ഷത്രഭാഗത്തെ കുറിച്ചുള്ള ചർച്ചയായിരുന്നു.

കുമാരിലഭട്ട൯ ആരംഭിച്ചു.

“മഹോജ്ജ്വല ഇതിനു മുന്നേ ക്ഷീരപദത്തിൽ വന്നതായി ലിഖിതങ്ങളിൽ ഉള്ളത് ഇരുപത്തി ഏഴായിരം വർഷങ്ങൾക്കു മുൻപാണ് , അന്നും നവഗ്രഹങ്ങൾ നേർരേഖയിൽ നിൽക്കപ്പെട്ട സമയത്തു ഭൂമിയുടെ അന്തരീക്ഷത്തിൽ പ്രവേശിക്കുകയും പൂർണ്ണമായി പ്രകൃതിയിൽ അഗ്നിയായി വിലയം പ്രാപിച്ചു , അന്നത് സംഭവിച്ചത് സിംഹള ദേശത്തായിരുന്നു  ഇന്നത്തെ ശ്രീലങ്കയിൽ , കൃത്യമായ പറഞ്ഞാൽ ത്രിപുരേശ്വര ഗർത്തത്തിന്‍റെ  മുകളിൽ വെച്ച് , അന്ന് കത്തിയമർന്ന മഹോജ്ജ്വലയുടെ വിഭൂതി ( ഭസ്മം ) ഗിനഗംഗ നദിയിൽ  ലയിച്ചു ചേരുകയും ചെയ്തു.

“ആചാര്യരെ ,,, ഇത് സംഭവിച്ചത് ഇരുപത്തി ഏഴായിരം വർഷങ്ങൾക്ക് മുൻപല്ലേ ,, പക്ഷെ ഇപ്പോൾ ഈയൊരു വരവ് ,, ” സവ്യസാചി ചോദിച്ചു

“ക്ഷീരപദത്തിൽ നിന്നും അനേക  കോടി പ്രകാശവർഷം അകലെ ഉജ്ജ്വല തേജസോടെ വിളങ്ങുന്ന ഉഗ്രശക്തിയുള്ള നക്ഷത്രമാണ് ജ്വാലാമുഖി , ആ ജ്വാലാമുഖിയുടെ ഒരംശമാണ് സ്വയം അടർന്നു മഹോജ്ജ്വല എന്ന പേരിൽ കോടാനുകോടി  പ്രകാശവർഷം ദൂരം അന്തരീക്ഷത്തിലൂടെ സഞ്ചരിച്ച്  ക്ഷീരപദത്തിലേക്ക് പ്രവേശിച്ചു കൊണ്ട് ഭൂമിക്കു മുകളിൽ വന്ന് ,,,ദിവ്യമായ ലയനത്തിന് ,,,സാക്ഷിയായി സ്വയം നിർവാണം (മോക്ഷം ) നേടി ഒടുവിൽ സ്വയം ഭൂമിയുടെ അന്തരീക്ഷത്തിൽ ലയിച്ചു ചേരുന്നത്.ഇത്തവണയും എന്തിനു വേണ്ടിയാണോ മഹോജ്ജ്വല വരുന്നത് ,,ആ ലക്‌ഷ്യം പൂർത്തിയാക്കപ്പെടണം ,,ഇല്ലെങ്കിൽ ഘോര വിപത്തു തന്നെ സംഭവിക്കും ,,ആ വരവിനെ നമുക്ക് തടയാൻ സാധിക്കില്ല ”

കുമാരിലഭട്ട൯ തുടർന്നു

“അതെ സമയം , അത്യുഗ്രമായ ഊർജ്ജം പ്രവഹിക്കുന്ന നേരമായതിനാൽ ശ്രോണപാദന്‍റെ  നേതൃത്വത്തിൽ കലിയുടെ വിഗ്രഹത്തിൽ അവർ ബന്ധനത്തിലാക്കിയ ആദിപ്രകൃതിയുടെ  സർവ്വോജ്ജ്വല ശക്തിയെ സംഭരിച്ചുകൊണ്ട്  ശ്രീവത്സ ഭൂമിയിൽ മഹാസാളഗ്രാമവിഗ്രഹത്തിനു മുകളിലായി കലിയുടെ വിഗ്രഹം പ്രതിഷ്ടിക്കാൻ ചെയ്യാവുന്നതിന്‍റെ  അങ്ങേയറ്റം അവരെ കാലകേയൻ ചെയ്യും ,, അങ്ങനെ സംഭവിച്ചാൽ പിന്നെ മഹാവിപത്തു തന്നെയാകും ”

എല്ലാവരും അൽപനേരത്തേക്ക് നിശബ്ദരായി